O OE O LO’U TAMA?

VAEGA 54

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*******************************************

Sa gata mai le tatou Fagogo i le vaiaso ua mavae, i le talanoaga a le tamaitai o Naomi ma lona tina loto mafatia, lea o lo o taoto nei i luga o lona moega, ma u mai lona papatua ia Naomi, ua le mafai ona fa’asaga mai i si ana tama.

E ui ina sa savali ese Naomi mai i le potu a ona matua, ae na ia iloa lelei, o lo o iai se me aua tupu.  Ma na lagona lelei atu lava e Naomi, a’o la talatalanoa ma lona tina, e foliga mai o lo o tagi lona tina.

Ua savali atu Naomi i le fale’aiga, lea o lo o pisi mai ai si ona tama aua fa’atauga o taeao.  Ua pisi mai ai foi ma lona uso matua o Ruta ma lona tuagane o Iakopo, ona o lea e le o iai lona tina.

Ua vave na galo ia Naomi lona tina loto mafatia, ae ua oso atu ma ia e fesoasoani i lona tama ma pisi atu ai lava.

O le tau maui atu o le pisi o faatauga o le taeao, na saofafa’i ane ai loa le tamaloa o Tanielu ma si ana fanau to’atolu e tau to le manava.  

“Oka, ua lua tuai i lua galuega,” o le tala lea a Tanielu i nai ona afafine o Ruta ma Naomi.

“E leai, o a’u la ua uma ona logo lo’u ofisa ou te tuai atu,” o le tali mai lea a Ruta.

“Aua e te popole Dad, o la ua uma na fai fo’i ma la’u faanoi,” o le tala lea a Naomi.

“Oi, ae o a’u lea la’a o’u alu,” o le oso mai lea a le alii o Iakopo ma a’apa atu u’u mail ana sanuisi ma tu’u i lona gutu.

Ae e le’i o’o atu Iakopo i le faitoto’a, ua valaau atu le tamaloa o Tanielu, “Iakopo fa’atali mai.  Sau e nofo mai i lalo.”

Ua tutu vae o Iakopo i le faitoto’a ma toe liliu mai ma tilotilo mai i lona tama.

“E iai se mea ua tupu?  O ma’i Mom?” o le fesili faatopetope mai lea a Iakopo ma toe savali mai, ma saofa’i ifo i le laulau lea ua nonofo ifo a’e ai ona tuafafine ma lona tama.

“E iai se mea o tupu ia Mom?” o le fesili atu lea a Naomi ma na va’aia e le tamaloa o Tanielu le popole o foliga a lana fanau.

“E leai, o lo o malosi le tou tina.  Ae vaai outou si a’u fanau.  A mae’a galuega ma a’oga i le afiafi nei, ona vave mai lea i le fale.  E iai se mea taua lava lea e manaomia ona o tatou talanoa ai,” o le tala atu lea a le tamaloa o Tanielua i lana fanau.

Ua fetilofa’i ia le fanau a Tanielu.  “A lua tete’a?” o le oso mai lea a Iakopo.  Ae tau ai ma le po a Ruta.

Ua ata le tamaloa o Tanielu ma faapea atu, “E leai.  Ae aua le so’ona faamamafa lea mea ou te fai atu ai i tou mafaufau.  Ae o mai loa e o ma ia fa’aeteete i lenei aso ma ona fuafuaga.  Tatou toe feiloai ananei.”

Ua tulai i luga ia Tanielu ma tutu a’e ai i luga lana fanau ma savavali atu agai i le faitoto’a.

E o lava la le fanau a Tanielu, ae tilotilo mai lava i le mea o tu atu ai le tamaloa ma talotalo atu ia i latou.

[E FAIA PEA]