Molimau Faatonusili DMWR i ona atugaluga i poloketi a le malo ua faagasolo e aunoa ma ni pemita

Pago Pago - AMERIKA SAMOA

Ua ta’atia nei i le Ofisa o Fefaatauaiga (DOC) ma lona Faatonusili ia se tusi mai i le Faatonusili a le Ofisa o Puna’oa o le Gataifale ma le Vaomatua (DMWR), le susuga ia Taotasi Archie Soliai, o lo o faaleoina ai ni ona atugaluga tau i le siomaga, ona o ni galuega o lo o faataunuuina i Malaeimi/Nu’uuli.

O le poloketi lea o lo o fa’atatau iai le tusi a Taotasi, o lo’o fa’apea foi ona avea ma mafatiaga i nisi o aiga ma avea ma faavae o ni a latou fa’atu’I’esega, i luga o upega tafa’ilagi i le masina ua tuanai.

O le aso 21 o Fepuari, 2024, na salalau ai i luga o upega tafa’ilagi se ata na pu’eina e le tina ia Kolopa Tuiasosopo ma fa’aalia ai le tete’e o lo latou aiga, i galuega ua faia i fanua i Malaeimi/Nu’uuli, ona ua talitonu le tina ia Tuiasosopo ma le aiga, e leai se pemita e faatagaina ai le faia o lenei galuega, po o se maliliega foi.

Ma o le faaiuga foi o le vaiaso na se’i mavae atu nei, na tu’uina ai foi e Tuiasosopo le kopi o le tusi a Taotasi, i luga o upega tafailagi.

Sa ta’ua e Taotasi i lana tusi i le Faatonusili o le DOC, ia Petti Matila, le atugalu tele o lona loto ona o le leai o se pemita e faia ai galuega i nei fanua, ae le gata i lea, e leai se fuafuaga (plan) ua o’o atu i le Komiti Faafoe a le PNRS mo le iloiloina.  O le PNRS o le Komiti Faafoe lea e iloiloina ma pasiaina, so’o se galuega po o poloketi e fia faataunuuina i totonu o Amerika Samoa, ma e mataituina lea komiti faafoe e le DOC.

E tusa ai ma le tusitusiga a Taotasi, na ia fa’aalia ai, a aunoa ma se pemita, e ono iai a’afiaga pe a fa’agasolo le poloketi, e aunoa ma le iloiloina o tulaga e ono a’afia ai le siosiomaga.

Ma sa fa’aalia foi e Taotasi le taua tele o le vaega a le PNRS ina ia faamautuina le iloiloina uma o poloketi, ina ia faamautuina le a’afiaga o le siosiomaga, vaomatua ma nu’u.  E le gata i lea, e taua tele le taulimaina o se Pemita e faamautuina ai le mulimulita’i o le galuega i aiaiga ma tulafono.

Sa fa’aalia e Taotasi lona atugalu ona o le le mautonu i le a’afiaga o puna’oa o matafaga ma le gataifale ma meaola i totonu o ogasami, ona o poloketi ua fa’agasolo. E le gata i lea, na ta’ua foi e le faatonusili le taua ona iloiloina so’o se suiga e ono tulai mai i le siosiomaga, ina ia fa’aitiitia le faaleagaina.  

Aemaise ai le puipuia lelei o meaola o lo o i lalo o le faamalumaluga o le tulafono ua ta’ua o le ‘Endangered Species Act’, e pei ona faamalosia i tulafono feterale.

Sa ta’ua e Taotasi nisi o mataupu o lo o tuliloaina e le to’atele o le atunu’u – e pei o galuega a le malo (feterale pe lotoifale) o lo o fa’ataunuuina, e aunoa ma ni pemita, e pei o le taofiga o se galuega lea na ‘eli ai tua o le Kolisi mo le faatuina o se fale fou, faapea ma le galuega a le Paramount Builders i matafaga o Tula ma le vaitafe i Nu’uuli, lea na taofia e le Ami (Corps of Engineers) ona o le leai o se pemita feterale.

Sa fa’apea foi ona ta’ua e Taotasi i lana tusitusiga, sana imeli sa lafo atu i le ofisa a le faatonusili a le DOC, i le masina o Aukuso o le tausaga ua tuanai atu, e tusa ai foi ma seisi galuega sa faia i le vanu i Malaeimi.  Ae o le masina o Tesema, sa ia fesiligia ai foi le ‘eliina o se auala fou i mauga o Faga’alu. 

 Lea na o’o mai lava i le aso o 22 o Fepuari, 2024, e leai se tali mai a le faatonusili a le DOC.

Ma sa fa’ao’oina atu foi kopi o nei imeli i le sui taitaifono a le PNRS ma le laulauafono.

Sa ta’ua e Taotasi, le faamaonia e le sui taitaifono a le PNRS i le sui o le DMWR o lo o i totonu o le komiti faafoe a le PNRS, le leai o ni pemita mo galuega e lua.

Ma o lea na talosagaina ai e Taotasi ia le tamaitai faatonusili ia Matila, ina ia fofoina lenei faafitauli ma ia faamautuina le iai o pemita ma faataunuuina iloiloga uma, e tusa ai ma aiaiga ma tulafono ua faavaeina.

Sa faapea foi ona talosagaina e Taotasi ni faamaumauga po o lipoti foi e tusa ai ma nei poloketi, ina ia mafai ona faataunuuina suesuega a le DMWR, e faamaonia ai le puipuiga o puna’oa i le gataifale ma le vaomatua aemaise.

O lenei tusi a le Faatonusili a le DMWR, ua faapea foi ona fa’ao’oina atu kopi i le komiti faafoe a le PNRS, le Faatonusili a le Matagaluega o Galuega Lautele (DPW) ma le Faatonusili o le Ofisa o le Puipuiga o le Siosiomaga (ASEPA).

FAAMATALAGA FA’ALAUA’ITELE

E tusa ai ma se faamatalaga a le faletua ia Kolopa Tuiasosopo, e pei ona fa’asalalauina ai le vitio i luga o upega tafa’ilagi, le le’i fa’afeso’ota’ia o aiga e ana fanua ia na a’afia i le poloketi i Malaeimi/Nu’uuli.  Ma e foliga mai, ua ta’atia atu lava e le malo i le pule o le Paramount Builders, le susuga Papalii Laulii Alofa (e pei ona sa faaleoina i totonu o le vitio).  

Sa ta’ua foi e Tuiasosopo, i se su’esu’ega a aiga, na faamaonia ai le leai o ni pemita mo lea galuega, ma o le lautele o le galuega, e le o i totonu o tuaoi e pei ona faaalia mo lenei poloketi $15 miliona.  Sa ta’ua foi e Tuiasosopo, le latou feso’ota’i ma le ASDRO ma na fa’ailoa atu ia i latou, le taofia o le galuega ona e le o toe iai se tupe lotoifale e faatino ai, ma o ua fesiligia ai e Tuiasosopo, po o ai la lea o lo’o fa’atupeina lenei galuega.

O se tasi o vaega na faaleoina e Tuiasosopo, o lo o faapopoleina o latou aiga, ona o fanua tanu o lo o i fanua ua ‘eliina.