E FAI O LENEI AE O LENA

O LE LIMASEFULU SENE

Na iai se ulugalii na alu se la malaga i atunu’u i fafo.  Ma ua toe fo’i mai i fanua le la faigamalaga.  Ma ua la agai atu nei i lo la fale, ae sa o la fa’aaogaina se ta’avale toso solofanua. 

Ua fai sina leva o le po o alu le faigamalaga a le ulugalii, ona e fai sina mamao o le nu’u e malaga mai ai.  O lea na tonu ai ia i la’ua, e la te afe i se nu’u lata mai, e malolo ai i le po, ona toe fa’aauau lea o le la faigamalaga i le taeao e soso’o ai.

Na iloa mamao atu lava e le tamaloa le mumu mai o se moli i se fale, ma o la afe loa iai.  O se fale e tu i luga o se mati’e ma na tatala mai e se toeaina ma se lo’omatua, le faitoto’a.  Ma e foliga mai, o lea na sauni o le a momoe le loomatua ma le toeaina, ae tu’itu’i atu loa le ulugalii faimalaga.

Sa faaulufale mai e le toeaina ia le ulugalii faimalaga, ae o le taimi lea ua faatopetope atu le loomatua i le umukuka ma tapena se ti taumafa e tali ai a la malo.  Ina ua mae’a le inuga ti a le toeaina ma le loomatua, ma le ulugalii, sa faapea loa ona fa’asino iai e le toeaina le la potu, e malolo ai.  Sa taumafai le ulugalii e tu’u atu se seleni i le loomatua ma le toeaina e totogi ai lo la potu, ae peitai, sa lulu mai o le ulu o le loomatua, ma tete’e mai e le toeaina le tupe.

O le taeao po na soso’o ai, na tolotolo atu ai le ulugalii ma tu’u se limasefulu sene i luga o le laulau ‘ai a le loomatua ma toeaina, ae le’i malaga ese atu, e fa’aauau le la faigamalaga i lo latou nu’u. 

E le’i umi foi ona alu toe fa’aauau le faigamalaga a le ulugalii, ae o la lagona le fia ‘a’ai, ma o la afe ai loa i se fale’aiga sa o la tau atu iai.

A’o talatalanoa le ulugalii ma le pule o le fale’aiga, sa faamatala e le ulugalii ia le loomatua ma le toeaina lea na la afea i le po.

Ua va’aia e le ulugalii, le fa’ate’ia o le pule o le fale’aiga ma ia fesili mai, “O fea le fale na lua momoe ai?”

Sa faamatala atu iai e le ulugalii ia le mea o iai le fale a le toeaina ma le loomatua.

“A’e, ailoga o sa’u le lua faamatalaga,” o le oso mai lea a le pule o le fale’aiga.  “Ua tolu tausaga talu ona mu le fale lena a si ulugalii o Palauni.”

Ua tau fai feva’aia’i le ulugalii ma le le talitonu i le faamatalaga a le pule o le fale’aiga.

“E leai, na matou inu ti anapo ma le loomatua ma le toeaina i le la fale,” o le tali atu lea a le ulugalii.

Ina ua vaai atu lava le pule o le fale’aiga e le talitonu le ulugalii, o lea na ia faapea atu ai, “O mai, tatou o, e toe faasino mai ia te a’u le fale na lua afea anapo.”

Ua toe feosofi le ulugalii ma le pule o le fale’aiga i le ta’avale solofanua, ae foi atu i le mea na agai mai ai le faigamalaga a le ulugalii lenei.  Ma e le’i umi lava ae fa’aafe loa e le tamaloa ana solofanua, i luga o le mati’e lea sa iai le fale lea na malolo ai i le po lena.

Ae peitai, na fa’ate’ia le ulugalii, ina ua afe atu le la ta’avale solofanua, ae ua fiu e tau autilo le fale a le loomatua ma le toeaina.  Ua leai se fale, ae ua na o la’au ma le vao ua sosolo solo i luga o se fale, e foliga mai ua leva na mu, ma e le nonofo ai ni tagata.

Ua feosofi i lalo le ulugalii ma le pule o le fale’aiga ma savavali atu i le mea na tu mai ai le fale, pei o se fale ua leva na mu.

“Pei uma lava ua vave ona afe le tatou taavale,” o le tala mai lea a le tamaloa.

Ae fa’ate’ia i le ‘e’e mai o le fafine i se vaega pito i tua o le fale.

Ma le faatopetope atu a le tamaloa ma le pule o le fale’aiga, ma o la va’aia, le na o le tu o le fafine ma u’u lona gutu, ma ona mata ua lapopo’a, ae o lo o fa’asino i se mea o lo o ta’atia i luga o le laulau.

Ina ua savali atu le tamaloa ma tilotilo i le mea o faasino iai le lima o lona to’alua, sa ia vaaia ai, se limasefulu sene o ta’atia i luga o le laulau.

[IA MANUIA TOE FUAFUAGA O LENEI VAIASO]