Molia se tamaloa i le fa’ao’olima i lona to’alua

Pago Pago - AMERIKA SAMOA

Sa lokaina mai e leoleo ia se tamaloa i le taeao o le aso 12 o Fepuari, 2024 ina ua valaau e se faiaoga ia le ofisa a leoleo i Fagatogo ma lipotia ai se tamaloa, e foliga mai o lo o fa’ao’olima i se fafine, i leisi itu auala o le fale ta’alo a le aoga maualuga a Samoana.

E tusa ai ma faamaumauga a leoleo, ina ua taunu’u atu leoleo i Utulei, sa o latou maua atu ai se ulugalii ma se la tama e valu (8) tausaga le matua.  Sa faapea loa ona aveina uma i latou i le ofisa a leoleo i Fagatogo mo le faataunuuina o su’esu’ega.

(O le a le lomia suafa o i latou o lo o a’afia i lenei mataupu, ona o le puipuiga o fanau iti).

O lo o ta’ua foi i faamaumauga a leoleo, le faatalanoaina e leoleo o le faiaoga tamaitai lea na valaau i le ofisa a leoleo ma sa faamatala e le faiaoga, a’o fa’agasolo a latou vasega i lea taeao, sa faasino atu e nisi o fanau aoga ia te ia, se tamaloa i leisi itu auala o le fale ta’alo, o lo o ‘e’e ma tatu’i le fafine.

Sa molimauina foi e le faiaoga lea gaioiga a le tamaloa, a’o si’i e le fafine ia lona alo.  Na ta’ua e le faiaoga, lona valaau atu i le tamaloa, o le a ia valaau i leoleo.  Ma na taofia ai le gaioiga a le tamaloa.  Ae ina o savavali ese atu, sa toe vaaia e le faiaoga ia le u’una’iina e le tamaloa o le fafine ma taumafai e se’i ese le tamaititi mai lima o le fafine.

 I le faatalanoaina e leoleo o le fafine na a’afia i lenei faalavelave, sa mafua ona tupu le la vevesi ma lona to’alua, ina ua o atu lona to’alua ma lona alo, o lo o la nonofo mai ma seisi tamaloa i fale la i le paka i Utulei.  Ma na manatu lona to’alua, o sana uo fou.  Sa ta’ua e le fafine, le palauvale atu o lona to’alua ia te ia ma fai atu, o le a ia (tamaloa) fasiotia o ia (fafine).

Sa ta’ua e le fafine lona taumafai e si’i mai lana tama, ae o le taimi lena, na taumafai ai lona to’alua e titina o ia.  Ae ina ua le mafai, sat ago loa le tamaloa ua u’u mai lona mitiafu ma tatu’i faalua ona foliga.  Ae o le taimi lena ua mau ai le fafine i lona alo  ma sa taumafai le tamaloa e u’una’i ese o ia, ae toso atu lana tama.

Ua molia nei lenei alii i moliaga e 4;

Faitauga 1:  Faatupu Vevesi i Nofoaga Faitele – Vasega ‘B’ o solitulafono mama, lea e mafai ona fa’afalepuipui ai se tasi i le ono masina, po o se sala tupe e $500; po o fa’asalaga uma e lua.

Faitauga 2:  Faao’olima i lona tulaga e tolu (DV) – Vasega ‘C’ o solitulafono mama, lea e mafai ona faafalepuipui ai se tasi i le o’o atu i aso e sefululima (15), po o se sala tupe e $300; po o fa’asalaga uma e lua.

Faitauga 3:  Fa’ao’olima i lona tulaga e tolu – Vasega ‘C’ o solitulafono mama, lea e mafai ona faafalepuipui ai se tasi i le o’o atu i aso e sefululima (15), po o se sala tupe e $300; po o fa’asalaga uma e lua.

Faitauga 4:  Faia o se gaioiga e ono afaina ai le saogalemu o fanau iti (DV) – Vasega ‘A’ o solitulafono mama, lea e mafai ona lokaina ai se tasi i le o’o atu i le tasi (1) tausaga; po o se sala tupe e $1,000; po o solitulafono uma e lua.

E $3,000 le tinoitupe faatulagaina e mafai ona tatalaina ai le ua molia, mai i le falepuipui, e faatali ai lona faamasinoga.