Taofia uma auaunaga a le Medicaid ia Mati 1, 2024

Pago Pago - AMERIKA SAMOA

O le aso 16 o Ianuari, sa faapea ona fa’ailoa atu ai e le ASMSA (American Samoa Medicaid State Agency) i le afioga i le Kovana ia Lemanu P.S. Mauga ma le afioga i le Lutena Kovana, ia Laapui Talauega E. V. Ale, ia le le toe iai o se tupe (local match) i le faaiuga o le kuata lona lua a le tausaga faaletupe 2024, pe a o’o atu i le aso 31 o Mati, 2024.  Ma ua faapea ona talosagaina e le ofisa Medicaid ia le toe tuluiina mai o se vaegatupe e mafai ai ona fa’aauau polokalama a le Medicaid seia o’o i le faaiuga o le tausaga faaletupe 2024.

O le masina na soso’o ai, sa toe tusi atu ai foi ia taitai o le ASMSA i taitai o le malo, le tapunia po o le taofia o auaunaga uma a le Medicaid ia Mati 1, 2024.

I le ‘memo’ muamua a le ofisa a le Medicaid, ia Ianuari 16, 2024, sa fa’ailoa atu ai e le Faatonusili a le ASMSA, o Sandra King Young ia Lemanu ma Laapui e tusa ai ma le tala faanoanoa, i le le toe iai o se tupe lotoifale e faatutusa ma le tupe feterale, mo polokalama a le ASMSA, i le ogatotonu o le kuata lona lua o le tausaga faaletupe 2024 (Fepuari).

Sa ta’ua ai e King Young, ina ia mafai ona fa’aauau polokalama a le Medicaid seia o’o i le faaiuga o le tausaga faaletupe (Setema 30, 2024), ua ia talosagaina ai se $6 miliona faaopoopo. 

Ma na fa’aalia foi e King Young, ua mafua lenei faaopoopoga ona o le faalauteleina o le auaunaga a le Medicaid, faatasi ai ma le toe fo’i o la latou tautua i tulaga na iai, ae e le i tapunia tuaoi a le teritori ona o le Koviti-19.

E le gata i lea, na fa’aalia foi e King Young, le faaopoopina o le fa’aaogaina o penefit a le Medicaid, aemaise i le polokalama lea o lo o aveina atu ai tagata o le atunuu, mo talavai i atunu’u i fafo.

Ma aunoa ma le toe tuluiina o le latou tupe, ma le puipuia o le ‘credit’ a le Medicaid faapea le polokalama, e ao ona tapunia pe taofia uma auaunaga a le Medicaid, mo sina taimi puupuu, e pei ona sa faia foi i tausaga ua tuanai.

Na faailoa foi a le faatonusili a le ASMSA, o le a logoina uma a latou pa’aga e tusa ai ma le tapunia o auaunaga a le Medicaid i le aso muamua o Aperila, 2024, seia maua se tupe fa’aopoopo.

Sa ta’ua foi e King Young, e tusa ai ma tulafono a le malo, e le mafai ona sili atu le fa’aalu a le latou ofisa, nai lo le tupe ua mae’a ona faasoasoaina, e $4 miliona mo le tausaga faaletupe 2024.  E $3 miliona le tupe ua mae’a ona fa’aaoga e le ASMSA, ae o lo’o totoe ai le $1 miliona lea o lo o tau fa’asoasoa ina ia mafai ona au atu i le faaiuga o le tausaga faaletupe.

O lo o iai se talitonuga ia King Young, e pe a ma se masina ae mae’a ona fa’aaogaina le tupe o lo o totoe.

Sa aofia foi i le ‘memo’ a King Young ia nisi o fautuaga e mafai ona fesoasoani i le latou paketi, lea e aofia ai le toe faaitiitia o fuainumera o tagata o le atunu’u e aveina i atunu’u i fafo mo talavai (off-island referrals) faapea ma tautua lotoifale.  E le gata i lea, o le taofia o le toe kavaina o pasese mo femalagaiga i luga o le ea, o nofoaga e faamautu ai faatasi ai ma le totogia o pasese mo aiga e malaga faatasi ma le o lo’o gasegase (non-medical escorts).  Ma afai e le lava lea, e tatau loa ona taofia uma auaunaga.

I le ‘memo’ lona lua lea sa aveina atu e King Young i taitai o le Faigamalo, ia Fepuari 16, 2024, sa ia toe fa’ailoa atu ai le tele o tupe ua fa’aalu i le paleni e $200,000 afe mo le kuata muamua ma le kuata lua o le tausaga faaletupe 2024, ma le $1 miliona lea o lo o totoe mo le ofisa a le Paketi ma Tupe e faaulu, ma taofia ai loa auaunaga a le Medicaid ia Mati 1, 2024.

Sa ta’ua e le faatonusili a le ASMSA, e le o gafatia e le tupe o lo o totoe, ona fa’aauauina ai la latou tautua se’ia o’o atu i le faaiuga o le tausaga faaletupe 2024.  Ma sa ia ta’ua foi, le le gafatia e le polokalama ona totogi uma pasese, nofoaga e faamautu ai faapea ma talavai mo gasegase uma na malaga atu i Niu Sila, Hawaii faatasi ai ma isi o lo o fa’atalitali mo avanoa e faimalaga ai.

Sa ta’ua e King Young, o le taimi nei, e 10 gasegase a Amerika Samoa o lo o talavai i Hawaii, 35 i Niu Sila ma le 57 lea o lo o fa’atalitali e faimalaga ese atu.

Ae i le taofia po o le faamutaina o le tautua a le Medicaid, o le a aofia ai talavai i atunu’u i fafo, o polokalama mo le siakiina o fofoga (DMEPOS), seia vagana ai peimeni mo le falemai a le LBJ, Ofisa o le Soifua Maloloina (FQHC) faapea le Hope House, aua o lo o latou gafatia le totogia o le ‘local match’.

Ae o le fa’ailoa atu i pa’aga uma a le Medicaid le faamutaina o a latou auaunaga ia Mati 1, 2024 seia toe maua se tupe faasoasoa faaopoopo a le polokalama.