Loka le avetaavale sa so’aina se tagata i luga o le alatele, ae sola

Pago Pago - AMERIKA SAMOA

Ua lokaina nei se alii e 33 tausaga, mai Samoa, e suafa ia Pati Lafaele, ma molia i le Faao’olima i lona tikeri muamua – o se vaega ‘A’ o solitulafono mamafa, lea e mafai ona soloatoa ai se tagata, i le falepuipui, po o le va o le 10 ma le 30 tausaga.

Ae e $30,000 le tinoitupe ua faatulaga e mafai ona tatalaina ai o ia i tua, e faatali ai lona faamasinoga.

Ua mafua ona molia Lafaele i le tulafono, ona o se faalavelave tau taavale, na tula’i mai i Mesepa, i le ulua’i aso o lenei tausaga, Ianuari 1, 2024.

E tusa ai ma faamaumauga a le ofisa a leoleo i Tafuna, sa o latou mauaina se telefoni i le afiafi o Ianuari 1, 2024, ona o se taavale lanu mumu pauli, sa na ia so’aina se tagata ma sola ese le taavale.  Sa maua foi e le molimau ia le numera o le laisene o le taavale na tupu ai le faalavelave.

Ina ua taunuu atu leoleo i le nofoaga na tupu ai le faalavelave, sa maua atu ai le susuga ia Larry Samatua, o ta’atia fao mai i luga o le itu taumatau o le alatele, i luma tonu o le falesa a le Ekalesia a Iesu Keriso.  Ae ua malepe le pito i tua, o lana pasika.

Sa ta’ua i faamaumauga a leoleo, sa faapea foi ona o’o atu ma se alii kapeteni a leoleo i se taimi mulimuli ane, ma sa ta’uina iai e le molimau, o le igoa o le tagata na tupu ai le faalavelave, ma e sau mai i Faleniu, i le auala sima lea e agai atu i le falesa a le Ekalesia a Iesu Keriso.

Sa faapea loa ona agai atu le alii kapeteni ma se leoleo, i le auala na faasino ifo e le molimau, ae peitai, e la te le i vaaia le taavale a Lafaele.

Ae o le taimi lea, na taunu’u ai le vaega a le EMS ma aveina ia Samatua, i le falemai mo togafitiga.

Sa faapea foi ona fesoasoani uma leoleo na iai i le nofoaga na tupu ai le faalavelave, e tau saili ia Lafaele.  Sa o latou talanoa i se ave pasi ma sa ta’ua e le ave pasi, e masani ia Lafaele ma e iai sana taavale lanu mumu, ma na faasino foi e le ave pasi ia le fale a Lafaele, i leoleo.

Ina ua agai atu leoleo i le nofoaga sa faasino iai e le ave pasi, ma va’aia ai le taavale mumu ma le laisene sa maua mai i le molimau, o lo o tu i fafo o le fale.  Sa iai foi i le fale ia le faletua o Karen Lafaele.  Sa fa’ailoa atu e leoleo o lo o latou sailia lona to’alua, lea o lo o masalomia i le faalavelave lea na lavea ai se tagata, sa faamatala mai e Karen i leoleo, o Lafaele o lona toalua ae na te leiloa po o fea o iai.

E tusa ai ma faamaumauga a leoleo, sa faamatala e Karen, sa o la auai ma lona to’alua i se inuga pia, ae tulai mai ai se fe’ese’esea’iga i loa la va, ma tago ai lona to’alua, ave le ki o le taavale ma tu’ua le pati, e sau i le fale.  Ae na ta’ua e Karen, na momoli atu o ia i le fale, e sana uo.

I le toe fo’i ese mai o leoleo mai i le fale a Pati, sa toe talanoa leoleo ma le ave pasi, ma sa faamatalaina e le ave pasi, o ia leisi molimau i le faalavelave na tupu.

Sa faamatala e le ave pasi, sa ia va’aia le pasi e Lafaele o ni taavale se lua i luma o le Kolisi i Malaeimi, a’o aga’i mail ana taavale i Sisifo.  Na o’o mai le taavale a Lafaele i tua o le pasika, ma so’a e Lafaele ia tua o le pasika ma tau se ese ai le pasika mai i le auala.  Ae ina ua toe sa’o le alu a le pasika, sa faapea ona toe so’a mai i tua e le taavale a Lafaele, ma u’unai ai aga’i i luma le pasika, ma o iina na pa’u atu ai le pasika i tua ma le auala.

Na faapea foi ona agai atu leoleo i le faleoloa lea sa i leisi itu o le auala, i le mea na tupu ai le faalavelave, ma talosagaina ia ata vitio  o le mea pu’eata lea e fa’asaga i le alatele.  Ma sa mafai ona maua ai e leoleo le vitio o le faalavelave.

Sa mafai ona agai atu leoleo i le falemai e siaki le susuga ia Samatua, lea na faamaonia mai iai e le fomai, le faamanu’alia o tua o lona ulu ma ona lima.  Ae o lo o faatalitali le faia o sana fa’ata.  I se aso mulimuli ane, ina ua fa’afeso’ota’i e leoleo ia le uso a Samana, i le tulaga ua iai lona soifua maloloina, ae na faailoa mai iai e lona uso i leoleo, na te’a i tua mai i le falemai ia Samatua, i le aso 2 o Ianuari, 2024.

E le i aofia i totonu o faamaumauga a leoleo le aso ma pe na faafefea ona maua Lafaele.