TALA O VAIFANUA

Pago Pago - AMERIKA SAMOA

FAAMANINO E SUI O OFISA TELEFONI I LUMA O SENATOA LE MAFUA’AGA O FAALETONU I LAINA TELEFONI

O le aso Lulu o le vaiaso ua mavae, sa faataunuuina ai se iloiloga a le Komiti o Feso’ota’iga a le Maota o le Senate, lea na auai atu ai le susuga Aloiamoa Anesi Jr., mai i le Bluesky ma le susuga ia Fa’asala Augafa mai i le ofisa a le ASTCA, e faamanino i afioga Senatoa le mafuaaga o faaletonu i laina o fesootaiga i vaiaso ua tuanai, lea e fiu ai e vili ni numera a le ASTCA, ae na o le upu ‘unknown’, e oso mai.

Sa fa’aalia e sui mai i ofisa telefoni e lua, ua mae’a ona fofoina lea faafitauli.

E tusa ai ma le molimu a Aloiamoa, sa mafai ona galulue faatasi ia le Bluesky ma le ASTCA e saili le mafuaaga o lenei faafitauli, ma fofoina vave.

Sa faamalamalama e Aloiamoa, e luga maga o lenei faafitauli.  Muamua, o le tautua fou lea o lo o kava ai le motu atoa, ma sa o latou taumafai e faalauteleina vaega e o’o atu iai lenei auaunaga fou.

Sa faamanino atili e Aloiamoa, o nisi o nofoaga e le mafai ona fai ai ni telefoni, ona o le le malosi o le ‘signal’.  Ma le lona lua, o faafitauli sa tulai mai i le va o telefoni ma a latou ‘SIM cards’, ona o le auaunaga (network) fou.

Sa molimau Aloiamoa, sa mafai ona o latou fofoina le tele o faafitauli na tulai mai, ma o lo o faamaumauina e lo latou ofisa ia suafa o i latou uma o lo o valaau atu ona o faafitauli tulai mai i a latou telefoni.

Ae peitai, sa saunoa le afioga i le Senatoa ia Magalei Logovii, o lo o iai lava faafitauli o lo o tupu mai i lana telefoni feaveai, Bluesky.  Na faamatala e Magalei se valaau na alu atu i lana telefoni i lena taeao, ae e le o faailoa mai le numera o le telefoni lea e valaau atu i lana telefoni, ma o le mafua’aga lea na ia le fia taliina ai lea valaau.  Sa fesiligia e Magalei le taimi o le a mafai ona fofoina uma ai nei faafitauli.

Na tali mai le susuga Aloiamoa, e mafai ona ave atu le telefoni a le afioga i le Senatoa e su’esu’e, atonu o se faafitauli patino i lana telefoni.  Aua, e pei ona ta’ua e Aloiamoa, ua tele ina mae’a ona fofoina le tele o faafitauli i le tele o telefoni.

O seisi fesili na fesiligia ai e afioga Senatoa ia molimau, o le $3.3 miliona mai tupe a le ARPA lea na tu’uina atu i le Bluesky e toe siitia ai tulaga o la latou tautua, i le ‘5G Network’, ona o lo o pulea lea auaunaga e se kamupani mai fafo.

Sa saunoa le afioga i le Senatoa ia Poumele Pete Poumele, i sona malamalama’aga i lenei mataupu, o tupe mai i le ARPA, o tupe feterale, ma e le mafai ona totogi ai ni kamupani mai atunu’u ese, e na o kamupani po o polokalama o lo o i lalo o le puleaga a le Malo Tele ma Amerika Samoa.

Na faamanino mai e le sui a le Bluesky e faapea, o le latou kamupani matua, o le Amalgamated Telecom Holdings, e i Fiti, ae o le latou kamupani o le Bluesky o lo o faamautu i totonu o Amerika Samoa.

Sa ta’ua e Aloiamoa, sa mauaina e le Bluesky le $3.3 miliona mai i le Ofisa o Fefaatauaiga, i lalo o tupe a le ARPA, ina ia siitia ai tulaga o la latou tautua, i le ‘5G Network’, ina ua maea ona faaulufaleina sa latou talosaga mo se fesoasoani tau tupe – ina ia mafai ai ona o’o atu la latou auaunaga (broadband) i nu’u ma afioaga e le i o’o iai le latou tautua.

TOE MANUMALO LE AOGA MAUALUGA A TAFUNA I LE TAUVAGA LONA 37 O LE ‘SPEECH FESTIVAL’

Ua lona fa a’i nei tausaga soso’o ua faapea ona manumalo ai le aoga maualuga a Tafuna, i tauvaga o le ‘Speech Festival, lea e tausinio ai aoga uma a le teritori, i tausaga aoga uma.  O le lona 37 tausaga lenei o lea tauvaga, e pei ona sa faataunuuina i le Aso Faraile, Fepuari 23, 2024 i le fale ta’alo a le aoga maualuga a Samoa.

O kamupani sa lagolago malosi i lenei faamoemoe, na aofia ai le ASTCA, Starkist, Carl’s Jr., McDonald’s, KS Mart ma le faleoloa a Manu’a.

O aoga uma sa mafai ona tauva i lenei tausaga, na aofia ai aoga maualuga mai Fagaitua, Leone, Manu’a, Samoana, South Pacific Academy ma Tafuna.

Na manumalo le aoga maualuga a Tafuna, ae tulaga lua le aoga maualuga a Leone ma le aoga maualuga a Samoana sa aveina le tulaga tolu.

O ni fa’ailoga faapitoa sa maua lea e Mataio Suluai mai i le aoga maualuga a Samoana, o le ‘Kneubuhl Award’ – Tolu tausaga soso’o o manumalo i le vaega o le ‘Impromptu Speech Category’.

Ia ma se fa’ailoga faapitoa e fa’ailo ai le agaga fa’afetai, mo le susuga ia Dr. Dottie Aga Tuisamatatele.

FAATAUTO SUI FOU O LE ASCC-PTK

O le aso Tofi, FEpuari 9, 2024, sa faatauto ai ni fanau aoga se to’a sefulu ma le lima (15) a le Kolisi a Amerika Samoa (ASCC), e avea ma totino fou o le Sosaiete a fanau aoga ua ausia togi maualuluga (Phi Theta Kappa-PTK).  O lea polokalama sa faataunuu i le fale fou a le ASCC ma sa faatumulia i aiga, uo ma matua a nei fanau aoga e to’asefulu ma le lima, faatasi ai ma taitai o le ASCC.

O le saunoaga autu o le polokalama, sa fofogaina e le susuga ia Saipele Matagi Tofiga, o se tasi na faauuina mai i le ASCC ma o se tama tuai a le PTK.  I le mae’a ai o le saunoaga a Saipele, sa faapea loa ona taitaia sui fou o le PTK i le tutuina o moliga’o ma le faalauiloa atu o i latou, ona soso’o ai lea ma la latou faatautoga.  O i latou ua faamanuiaina i lenei tausaga, e aofia ai Sedzaeda Tiatia, Jennifer Leigh Vaiau, Letoe’e-Lillyann Heta Launiu, Leleagaatutuila Poulima, Monica Maeataanoa, Ati E. Paea Indira Saufagaloa Carmellite Lemana, Isaac B. Alosio, Anthony Salave’a, Saufoi Tavete, Destiny Savusa Filomena Afioa’e, Daphne Falesoa Puni, Leilani Togi, Monica Papalii ma Ashley Leu Lualua.

O lenei sosaiete sa faavaeina i le 1918, e peresetene a le Kolisi i Missouri, e aloaia ma u’unaia ai fanau aoga uma, mo kolisi ta’i lua tausaga ae le gata i lea, o se avanoa le aumaua mo le alualu i luma o fanau aoga.

O le susuga ia Kuki Tuiasosopo, ma nisi o faiaoga i totonu o le ASCC, e aofia ai Dr. Ernie Seiuli, faletua ia Amete Mulipola-Moefiainu ma Adrien Vasai-Moana, o lo o faafoeina lenei polokalama mo fanau aoga i le ASCC.

O taitai o le PTK mo le Tautotogo 2024, e aofia ai Donwen Hong (Peresetene), Veronica Tuna (sui Peresetene), Queenie Fomai (Failautusi), Krista Timoteo (Teutupe) ma Michael Iosefo (Failautusi PR).