POU TIUTE A LEOLEO

Pago Pago - AMERIKA SAMOA

LE USITA’IA FAATONUGA MAI I LE FAAMASINOGA

O le aoauli o le aso 21 o Ianuari, 2024 na fa’afeso’ota’i ai e se tina ia le Ofisa a Leoleo i Tafuna (TPS), ma talosagaina se fesoasoani i le ave’esea o lona toalua, le susuga ia Faigame Iuta, mai i lo latou fale i Vaitogi talu ai, o lo o iai se faatonuga mai i le faamasinoga, e faasa ai ona latalata Iuta pe a ma le 100 futu mai i le mea o iai lona to’alua.

Ina ua taunu’u leoleo i le fale o le tina, sa ia faamatalaina i leoleo e faapea, sa ia iloa mai Iuta o tu tu atu i luma o le latou fale, ma sa mana’o Iuta e toe fo’i atu i le latou aiga ma toe fa’alelei lo la aiga.  

Sa ta’ua e le tina lona le amanaia mai o Iuta, ma savali ese atu i totonu o le potu.  Ae i le atoa o le 30 minute, na toe savali mai ai fafo, ua saofai atu ia Iuta, i luga o le moega lea o lo o i totonu o le potu malolo o le fale.  O le mafuaaga lea na ia valaau ai i le Ofisa a Leoleo e o mai e ave’ese atu le ua molia, ina ia le tulai mai se faalavelave.

Ae ina ua su’esu’eina e leoleo ia le ua molia, sa ia ta’ua e faapea, na pau le mafuaaga na alu ai i le fale a lona to’alua, o le fia aumai o ana mea totino.

Ua lokaina nei Iuta i le to’ese i Tafuna ma molia i le faitauga e tasi, i le le usitaia o se faatonuga mai i le faamasinoga, o se solitulafono e mafai ona faasala ai se tasi i le falepuipui, mo le tausaga e tasi (1) po o se sala tupe e $1,000; po o fa’asalaga uma e lua.  Se’ia vagana ua soli se vaega o le palakalafa (1), ona o’o atu lea o le faasalga i le ono (6) masina i le falepuipui po o se sala tupe e $500; po o faasalaga uma e lua.

E $1,000 le tinoitupe ua faatulagaina e mafai ona tatalaina ai le ua molia, e faatali ai lona faamasinoga.

FAATUPU VEVESI I PAGO PAGO (HAPPY VALLEY)

O le aso 21 o Ianuari, 2024, na lipotia ai e se tamaloa ia lona ‘nephew’ i le Ofisa a Leoleo i Fagatogo, ona o le faatupu vevesi i Pago Pago (Happy Valley). 

E tusa ai ma le lipoti a le susuga ia Va’a Feleni, na manava atu lona ‘nephew’ o Ava Visesio po o Mikaele Faleava, mai lana galuega i lena afiafi ma alu i totonu o lona potu.  Ae i le ta o le 12 i le tulua o po ma ao, na faalogo atu ai Feleni o palauvale leotele mai ia Visesio mai i totonu o lona potu.

Sa faamatala e Faleni, na alu atu ma tatala le faitoto’a o le potu e va’ai po o le a le mea o tupu.  Ma na ia vaaia ai o lo o faia se inuga pia a Visesio ma palauvale i se tagata o la e la te talanoa i luga o lana telefoni.  Sa faatonu loa e Faleni ia Visesio e aua le pisa ma palauvale i totonu o le fale.  Ae le gata i lea, sa faatonuina foi e Faleni ia Visesio, ua lava loa lana inuga pia la e fai, ae alu e ai ma sau e mo.  Ae peitai, na avea lea ma tulaga na palauvale mai ai Visesio ia Faleni ma savali i fafo ma le fale.

O lo o ua ta’ua foi i faamaumauga a leoleo, le tuliloaina e Faleni o Visesio ma taumafai e toe aumai i totonu o le fale ona ua pisapisao i tafatafa o fale a tuaoi, ae tago ai Visesio i ma’a ma tau’ai mai ai Faleni.

O lea na fa’afeso’ota’i ai e Faleni ia leoleo mo se fesoasoani.  Ma e taunu’u atu leoleo, ua sola ese Visesio.  Sa taumafai leoleo e saili le ua molia i tuafale o le maota a Faleni, ae na o latou va’aia le savali mai o Visesio ma agai atu i le mea o iai taavale a leoleo.  Sa faalogoina e leoleo le malosi o le manogi pia i lea alii.

Ua lokaina nei ia Visesio i le to’ese i Tafuna ma ua molia i le Faatupu Vevesi i Nofaga Faitele, o se solitulafono e mafai ona faasala ai se tasi i le ono (6) masina i le falepuipui po o se sala tupe e $500; po o fa’asalaga uma e lua.

E $300 le tinoitupe faatulagaina e mafai ona tatalaina ai le ua molia, mai i le falepuipui, e faatali ai lona faamasinoga.