Pasia e le Senate pili ma se faaopoopoga o le $1 miliona mo le Fono

Pago Pago - AMERIKA SAMOA

Ua pasia nei e le Maota o Sui le iugafono na faaulufaleina e le Faigamalo, mo le faasoasoaina o le $3,100,000 mai tupe maua o le tausaga tupe 2022, lea sa le i paketiina.  O lea vaegatupe ua faaopoopo nei i lenei tausaga tupe 2024.  

Sa pasiaina lenei pili e le Senate, i lona faitauga faatolu i le aso Faraile o le vaiaso ua mavae, ma se faaopoopoga e tasi.

O lea faaopoopoga, e ave’ese mai ai le $1 miliona, lea na fuafua le kovana e fa’aaoga mo le Sisiga Fu’a 2024, ae o le a fa’aaogaina mo le faatauina o meafale ma isi tulaga mana’omia, mo le fale fou a le Maota Fono.

I le iloiloga a le Komiti o Paketi ma Tupe Faasoasoa, a le Senate, i le aso Lua o le vaiaso ua mavae, na fa’aalia ai le fia malamalama o afioga i Senatoa, pe o le paketi lea mo le Sisiga Fu’a o le tausaga nei.

Sa saunoa le afioga i le Senatoa ia Utu Sala Poasa, o ia lea o le Taitaifono a le Komiti, e na te le o mautino po o le paketi lea mo le Sisiga Fu’a, ona e le o ma’oti mai i totonu o le pili.

Ae peitai, sa saunoa le afioga i le Peresetene o le Senate, ia Tuaolo Manaia Fruean, o lo o ia manatuaina, ua mae’a ona pasia le $1 miliona mo le Sisiga Fu’a o le tausaga nei, ae o lea ua toe aofia i totonu o le pili, seisi $1 miliona mo lea lava fuafuaga e tasi.

Sa fa’aalia e le afioga i le Senatoa ia Muagututi’a M. Tauoa lona tete’e i le $1 miliona lea o lo o i totonu o lenei pili mo le Sisiga Fu’a.  Na saunoa Muagututi’a, ua tele tele lenei $2 miliona, mo se fuafuaga e mo ni nai aso, ae e mafai ona fa’aaoga lelei le $1 miliona lea mo se mea e mafai ona fa’aaoga e sui faitulafono i tausaga a sau.

Sa fia malamalama Muagututi’a po o fea o le a fa’aaoga iai e le komiti o le Sisiga Fu’a lenei tupe tele, mo ni nai aso.  Ae i sona manatu fa’aalia, e sili atu le taua o le fale fono ona o le maota a tagata o le atunu’u.  Saunoa Muagututi’a, o Faipule ma Senatoa ia o le a fa’aaogaina lenei fale fou, o sui ia o tagata o le atunu’u, o le a fai mo latou fofoga i totonu o lenei lala taua a le malo.

O lo o ua fuafuaina le umusaina o le fale fono fou ia Ianuari o le tausaga nei.

Ma o lea na pasia ai e le Senate i lona faitauga faatolu, ia le iugafono taufa’aofi a le Faigamalo, e aofia ai ma le suiga lea ua ave’esea ai nei le $1miliona mai i fuafuaga o le Sisiga Fu’a o lenei tausaga, ae ua faatulagaina mo meafale ma isi mea totino, mo le fale fono fou.

Ae o lo o tumau pea isi fuafuaga e pei ona sa faaulu mai e le kovana, e aofia ai le $400,000 mo Polokalama Faapitoa a le Kovana, o le $75,000 mo CJPA, ma le $125,000 mo galuega faaleleia i le fale mata’aga a le malo (Jean P. Hayden Museum).