Aloaia e le Senate se alo o le atunu’u

Pago Pago - AMERIKA SAMOA

O le aso Faraile, Ianuari 9, 2024, na faataunuuina ai se sauniga puupuu i totonu o le Maota o le Senate, e aloaia ai se tasi o alo o le atunu’u, lea o lo o avea nei ma pailate a le kamupani vaalele a le Hawaiian Ea, ma o ia o lo o fa’afoeina femalagaiga i le va o Honolulu ma Tutuila nei.

I se Iugafono Aufa’atasi a le Senate sa tauaaoina atu i le alii kapeteni, ia Talisau Lincoln Moliga, o lo o faapea ona aloaia ai o ia e tama o le atunu’u e tusa ai ma lenei tulaga ua mafai ona ia ausia.

O i latou na mafai ona auai atu i lenei sauniga puupuu, na aofia ai le Peresetene o le Senate, le afioga Tuaolo Manaia Fruean, faapea afioga i Senatoa faatasi ai ma le Fofoga Fetalai o le Maota o Sui, le afioga Savali Talavou Ale.

Na auai fa’atasi le alii kapeteni Moliga ma si ona faletua ia Jenna ma e na o le to’alua nisi o a la alo e to’atolu, na mafai ona auai.

O le alii kapeteni o le alo a le afioga i le Senatoa ia Malaepule Fuega Moliga mai i le Manu’atele, Atu’u ma Iliili, faapea le tina ia Moya Yandall Moliga, o Atu’u ma Vaisala, Savaii.

E tusa ai ma faaupuga o le iugafono, o lo o ta’ua ai le faaiuina mai o uluai aoaoga a Talisau i aoga tulaga muamua i Olosega ma Lupelele ona fa’aauau lea o ana aoaoga i aoga maualuga a Fagaitua, ma Tafuna lea na faau’u mai ai.

Sa faamatalaina e Talisau i le sui o le Samoa News, sa mana’o e ulufale atu i totonu o le militeri pe a fa’au’u mai i Tafuna, ae peitai, sa finagalo lona tama ina ia fa’aauau ana aoaoga i le ASCC ma agai atu ai i aoga i atunu’u i fafo.  Na mafai ona maua se la maliliega, o le a ulufale Talisau i vaega’au fa’aleoleo, ae fa’aauau ana aoaoga i le ASCC.  

Ae ina o iai o ia i totonu o vaega’au faaleoleo, sa valaauina la latou iunite mo le taua ma sa faamatalaina e Talisau, le tulaga ese o le mea na o’o iai o ia i lena vaitaimi.  Ae sa faamafanafanaina o ia, ona sa ia iloa, o lo o nofo tatalo lona aiga mo ia faatasi ai ma lona faauo atu i nisi o Toa o Samoa sa o latou tautua faatasi.  Sa ia ta’ua lo la iai faatasi ma le afioga i le Senatoa ia Olo Uluao Letuli i Iraq.

E o’o mai i le aso, i tala faamaumau, o Talisau Lincoln Moliga, o le fitafita pito sili ona talavou sa faapea ona aveina sa’o atu i tafaotaua mai i totonu o aoga maualuluga.

O lo’o ta’ua foi i totonu o le Iugafono Aufa’atasi e faapea, ae e le i faau’uina Talisau i le tausaga e 2003, sa apalai o ia i le aoga militeri i Wentwork ma maua ai lona faailoga o le ‘Associate of Arts’ i mataupu lautele, ma fa’aeaina o ia o se 2nd Lieutenant i totonu o le Ami, i le taimi lava e tasi.

Sa aloaia o ia i lona faapinega i Wentworth, o se tasi o fitafita mataina i le vaega faau’u a le militeri.

Sa ausia foi e Talisau ia le faailoga, o le ‘George C. Marshall’, ma o i latou e ausia nei faailoga e filifili i luga o a latou sikolasipi, taitaiga, malosi faaletino ma le galue tautua i totonu o nu’u ma malo.

Sa fa’aauau aoaoga a le Talisau i le Iunivesite o Misuri Tutotonu, i mataupu o le ‘Criminal Justice’.  Ina ua ia ausia lana ‘Bachelor’s Degree’, sa faamatala e Talisau lona manatuaina i lea taimi, sona manaoga faatamaititi na iai, o le avea ma pailate e fesoasoani ai i ona tagata i Amerika Samoa.

Sa faapea loa ona ia auai atu i le Iunivesite a Dubuque i Iowa, i a’oga vaalele ma ia ausia ai lana fa’ailoga lona lua.  Sa faapea ona fa’aauau atu ai lava le fa’aauauina o ana aoaoga mo le sailiga o lona laisene faapailate ma ua atoa nei le fitu tausaga o umia lona laisene faapailate.

Sa le gata i lona ausia o ona mo’omo’oga e avea ma pailate, ae sa faapea ona fa’aauauina ona tiute faalemiliteri, e pei ona sa tautua i totonu o Iraq ma Afekanisitani ma o nisi o pine ua ia ausia, e aofia ai le ‘Order of Saint George Bronze Medallion’, Bronze Star Medal, Combat Action badge, ma le Combat Infantryman badge. 

I le 36 tausaga o lona talavou, sa faapea loa ona litaea mai ia le susuga ia Tulisau mai i le Ami a Amerika.

I le va o le tausaga e 2019 ma le 2021 sa avea ai o ia ma faiaoga pailate, a’o galue foi mo le ofisa vaalele a le Sky West.

Ia Setema 2022, na se’e atu ai loa Talisau i le ofisa vaalele a le Hawaiian Ea ma o le aso 19 o Mati, 2023, na tino mai ai lona faanaunauga, ina ua kapeteniina lana faigamalaga faatausala mai i Honolulu mo Amerika Samoa.  Ma sa ia ta’ua foi, sa na o tagata Samoa na galulue i totonu o le vaalele, i lea faigamalaga.

Na fa’aalia e Talisau le fa’ate’ia o ia i le i’ugafono ua ia tau’a’aoina mai i le Maota o le Senate ma o sona faamoemoega maualuga, ia avea lenei fa’ailoga ma u’unaiga mo fanau talavou a le atunu’u.  

O lo o aofia ai foi i faaupuga a lenei iugafono, le agaga faamalo ma le faafetai a le fono faitulafono, ona o le tautua matavela a lenei atalii ma le faatuina o se sini taua mo fanau a le atunu’u, ina ia mafai ona avea ma pailate.