TALA O LE SENATE

Pago Pago - AMERIKA SAMOA

IUGAFONO FAAULU E FAASA AI ONA AVEA SE TOTINO O LE KOMITI FAAFOE O FEMALAGAIGA, MA ‘SPONSOR’

O le vaiaso ua mavae, na pasia ai e le Senate,  i lona faitauga lona lua, ia se i’ugafono sa faauluina e le afioga i le Senatoa ia Soliai Tuipine Fuimaono, e taofia ai le toe avea o totino o le komiti faafoe a le Ofisa o Femalagaiga, ma ‘sponsor’.

O lo o ua ave’esea foi e lenei iugafono se vaega o le tulafono e mafai ai ona fa’aauauina tautua a totino o le komiti, seia pasia i latou e sui tulaga ai.  E le gata i lea, ua ave’esea ai foi ma le filifilia e totino o le komiti ia la latou taitaifono, i tausaga taitasi.

O lo o ta’ua i totonu o le i’ugafono le leai o se totino o le Komiti Faafoe o Femalagaiga e mafai ona avea ma ‘sponsor’ i tagata mai fafo.  O so’o se tagata e filifilia i totonu o le Komiti Faafoe, ae o lo o avea ma ‘sponsor’, e tatau ona atoa le 60 aso talu ona filifilia o ia ma totino o le komiti faafoe, ua ave’esea lana ‘sponsorship’.  Afai ae siliga ma le 60 aso o avea pea ma ‘sponsor’, o le a ave’esea loa o ia mai totonu o le komiti faafoe, e le kovana.

Ua aofia foi i totonu o le i’ugafono le tautua o totino e to’afitu a le komiti, ia le silia ma le lima (5) tausaga.  Ae ave’esea le filifilia e le komiti faafoe o le latou lava taitaifono, ae le o ma’oti mai totonu o le i’ugafono le auala e filifilia ai le taitaifono.

O le aso 7 o Fepuari, na auai atu ai le taitaifono o le komiti faafoe o Femalagaiga, ia Fanene Edda Wyberski, i se iloiloga a le komiti o tulafono a le Senate, ina ua sapina o ia e le Loia Silia, ia Fainu’ulelei Falefatu Ala’ilima-Utu.

Sa fa’alauiloa atu i le taitaifono a le komiti o le Senate, le afioga i le Senatoa Magalei Logovi’i, le le auai atu o Fainu’ulelei ona o tulaga le ma’alofia i faamasinoga.

Sa fa’ailoa atu e Fanene i afioga Senatoa, le lagolagoina e le komiti faafoe o femalagaiga ia le i’ugafono e pei ona faauluina.

Sa ta’ua e Fanene, o le mataupu i le taofia o komiti faafoe ma ‘sponsor’, o se tulaga ua leva ona faamamaluina e le latou komiti, talu ona avea o ia ma taitaifono.  Ae na ia fa’aalia lona fiafia, ona o lea o le a pasia ma avea ma tulafono.

Na fesiligia e le afioga i le Peresetene o le Senate ia Tuaolo Manaia Fruean ia Fanene, po o iai ni totino o le latou komiti o ‘sponsoring’ ia ni tagata mai fafo, sa tali Fanene, e na o totino fou ia fa’ato’a filifilia, ma ua tu’uina atu iai le 30 aso e su’e ai ni ‘sponsor’ fou mo a latou tagata.

I le faaiuga o le iloiloga, sa pasia ai loa e le Senate ia le pili, i se palota 13-0.

FAATULAFONOINA SUIGA MO LE FILIFILIGA O SENATOA

Ua mae’a nei ona sainia e le afioga i le kovana, Lemanu P. S. Mauga ia le pili a le Senate, 38-24, e faatulaga ai se taimi ma’oti e faagata ai ona filifilia e itumalo ta’itasi ia a latou sui mo le Maota o le Senate, ina ia le silia ma le aso Lua lona lua o Tesema, i tausaga palota.  E le gata i lea, ia faatulafonoina ia le faaulufaleina uma e Senatoa ia a latou faamaumauga mo agava’a, i le komiti o le Senate, ina ia mafai ona faamaonia ae e le i fa’atautoina i latou. 

O lenei iugafono sa faaulufaleina e le afioga i le Senatoa ia Soliai Tuipine Fuimaono, i le masina o Oketopa 2023.  Ma o lo o ma’oti mai ai le tatau i Senatoa ua filifilia, ona faaulu a latou pepa fanau, e faamaonia ai o i latou o Nesionale po o Sitiseni a Amerika, o tausaga o a latou soifua ma pepa faamaonia o suafa matai ua mae’a ona lesitala, ma faamaoniga o nu’u ma afioaga o lo o fa’amautu ai.

Na faamalamalama e le afioga Soliai, o le faamautuina o se aso patino e faamuta ai ona faaulu atu nei faamaumauga, e mafai ona fofoina ai faafitauli i le toso e itumalo o le filifiliga o a latou Senatoa, ina ia mafai ona faatautoina uma Senatoa ia Ianuari 3, o le tausaga e soso’o pe a mae’a palotaga.