POU TIUTE A LEOLEO

Pago Pago - AMERIKA SAMOA

TU’UAIA SE TAMALOA I LE FA’AO’OLIMA I LANA SUPAVAISA

O le aso 13 o Ianuari, 2024, na fa’afeso’ota’ai ai e se tamaloa ia le ofisa o leoleo i Fagatogo, ma lipotia se alii e la te galulue faatasi, le susuga ia Junior Sootaga, i le fa’ao’lima ia te ia, i le nofoaga e la te faigaluega faatasi ai, i Fagatogo, i le ofisa a le Harbor Maritime.

E taunuu atu leoleo i le nofoaga na tupu ai le faalavelave, o lo o faatali mai leoleo po a le Ofisa o Va’a a le malo ma Sootaga ma le susuga ia Jone Vosaraya, o lo o sai lona ulu i se ofu.  Sa valaau loa e leoleo ia le EMS ina ia togafitia le ulu o Vosaraya.

Sa faamatala e Vosaraya, o ia o se tasi o supavaisa a le Harbor Maritime, ma o lea taeao na tuai atu ai So’otaga, ae le o se taimi muamua lea ua tuai atu ai i le galuega.  Sa ta’ua foi e Vosaraya, i le avea o ia ma supavaisa a Sootaga, sa ia faatonuina ai loa Sootaga e toe fo’i i le fale ona e le i valaau muamua atu, e tuai atu.

Ma na avea lea na tulaga na to’atama’i ai Sootaga, ma ona tu’ia faalua ai foliga o Vosaraya ma faamanu’alia ai ona mata.

Sa lokaina ai loa e leoleo ia Sootaga ma aveina atu i le falepuipui e faatali ai lona faamasinoga.

Sa faamatalaina e Sootaga i leoleo, e moni sa ia fasia Vosaraya ona ua le lava i le auala e faatonutonu ai o ia e Vosaraya, pei ia o se taifau.

E lua moliaga ua faasaga nei ia Sootaga, o le Faaoolima i le tulaga e tolu faapea ma le Faatupu Vevesi i nofoaga faitele.

O le moliaga o le faao’olima, e mafai ona nofosala ai se tagata i le falepuipui, i le le sili atu i le tasi (1) tausaga po o se sala tupe e le silia ma le $1,000; po o faasalaga uma e lua.

O le moliaga o le faatupu vevesi, e mafai ona faafalepuipui ai se tagata i le le silia ma le ono (6) masina po o se sala tupe e le silia ma le $500; po o faasalaga uma e lua.

MOLIA SE TAMALOA I LE FA’AO’OLIMA I LONA TO’ALUA MA’ITAGA

O le tu lua o po ma ao i le aso 10 o Ianuari, 2024, na valaau ai se tina i le ofisa a leoleo i Fagatogo e lipotia lona toalua i le fasia o ia, i le latou aiga i Amouli.  Sa faamatala e le tina, lea ua lima masina lona ma’itaga, na ta e lona to’alua lona ulu i se ili uila.

(O le a lomia suafa o i latou ua a’afia i lenei faalavelave ona o le puipuiga o fanau iti o lo o a’afia).

Ina ua taunuu atu leoleo i le nofoaga na tupu ai le faalavelave, sa talanoa leoleo ma le tina o lo o a’afia i lenei mataupu ma sa ofoina e leoleo e valaau le EMS ae peitai, sa te’ena e le tina na a’afia.

Sa faamatala e le tina, na amata ona tupu le la pisa lona toalua ina ua su’e le ki o le taavale, ae na ita lona to’alua ina ua fai atu le tina, e na te le iloa po o fea o iai le ki o le taavale.  I lona ita tele na faaleaga ai e le ua molia ia le latou AC.  Ona liliu lea i le se’i mai le ili ma ta ai lona ulu, e pei ona faamatala e le tina o lo o a’afia i lenei faalavelave.

O lo o ta’ua foi i totonu o faamaumauga a leoleo, le faamatalaina e le tina, na pa’u i lalo a’o ia taumafai e u’una’i ese atu lona toalua.  Ae na tago mai lona toalua i le futi atu lona ulu ma tu i luga o lona ulu, ina ua matapogia.  Ae o le taimi lea na tamomo’e atu ai le la fanau toatolu ma fai atu i le tamaloa, e alu ese ma lo latou tina.  Sa faapea foi ona tamo’e mai totonu o le potu, ia le tina a le tina ua a’afia ma taumafai foi e u’una’i ese le tamaloa, ma valaau loa leoleo mo se fesoasoani.

O le lagona mai e le ua molia, le valaauina o leoleo, na sola ese mai ai loa mai lo latou fale.

Sa faamatala e le tina a le ua a’afia, sa i totonu o le potu malolo ae ona lagonaina le pa’o mai totonu o le potu a lana tama ma lona toalua.  Sa alu atu e vaai po o le a le mea o tupu, ae ona vaaia lana tama teine o taoto, ae o lo o fasi mai e lona toalua ma futi lona ulu.  O i’ina na oso atu ai loa ma taumafai e u’una’i ese le tamaloa.

A’o feoa’i leoleo i luga o le auala e saili le ua molia, sa va’aia se alii o talotalo mai, ma iloa mulimuli ifo ai, o le alii lea na tupu ai le faalavelave.  Ma aveina ai loa o ia i le ofisa a leoleo i Fagatogo mo le su’esu’eina.

Sa faamaonia e le ua molia ia lona ta ina o lona to’alua i le ili uila.

Ua molia ai nei o ia i le Faaoolima i lona tulaga e lua ma le Faatupu Vevesi i totonu o lona aiga.

O le moliaga o le faao’olima, e mafai ona lokaina ai se tasi i le le sili atu ma le lima (5) tausaga po o se sala tupe e i le va o le $150 ma le $5000; po o faasalaga uma e lua.

O le moliaga o le Faatupu Vevesi e mafai ona faasala ai se tasi i le falepuipui i le le silia ma le sefululima (15) aso po o se sala tupe e i le va o le $150 ma le $300; po o faasalaga uma e lua.

E $10,000 le tinoitupe faatulagaina e mafai ona tatalaina ai le ua molia, mai i le falepuipui, e faatali ai lona faamasinoga.