POU TIUTE A LEOLEO

Pago Pago - AMERIKA SAMOA

MOLIA NI ALII FUSU SE TO’ALUA

O le afiafi o le aso 2 o Ianuari, 2024 na valaau ai se tamaitai i le Ofisa a Leoleo i Tafuna i se fusuaga i luma o le fale fa’atali pasi i tafatafa o se fale’aiga, i Tafuna.  

E taunuu leoleo i le nofoaga sa tupu ai le fa’alavelave, o lo o nofonofo mai le susuga ia Prince Palepoi (o se tasi ua molia i lenei mataupu) i luga o le vao e fesagai ma le kamupani a le SOPAC i Tafuna, ae o lo o palauvale agai ia Austin Fanene (lea foi ua molia i lenei mataupu).

Sa aveina uma Palepoi ma Fanene e leoleo i le Ofisa Leoleo i Tafuna mo le suesueina atili o le faalavelave.

Sa te’ena e Fanene le faia o se faamatalaga, ae peitai, sa faamatala e Palepoi na amata le la taugaupu ma Fanene ina ua la o i le faleoloa e faatau se apa inu a Fanene.  Ae ina ua fai atu Palepoi ua fia inu foi ma ia, sa tali mai Fanene e alu ia e fa’atau sana apa inu.  O i’ina na amata ai le la taugaupu, ae fa’ai’u i le pa’i o lima.

O lo o ta’ua i faamaumauga a leoleo e faapea, o Palepoi na sasau muamua lana tu’i ma tau i le ulu a Fanene, ona a’apa atu lea o Fanene i se laau kerisimasi laupapa lea sa teuina ai le auala ma ta fa’alua ai le lima a Palepoi.  Ma ua masalomia ai le faapisa o Palepoi i nofoaga faitele i Tafuna, e ala i lona palauvale i ta’avale o lo o fepasia’i i luga o le alatele.

O lo o ta’ua foi i fa’amaumauga a leoleo le leai o ni manu’a na va’aia i nei alii ma na te’ena foi e la’ua se auaunaga mai i le falemai.

Ua molia nei ia Palepoi ma Fanene i le Faatupu vevesi i nofoaga faitele faapea le Faaoolima i lona tulaga e tolu.

O le moliaga o le faatupu vevesi i nofoaga faitele, e mafai ona faafalepuipui ai se tasi i le ono (6) masina, o se sala tupe e $500; po o faasalaga uma e lua.

O le moliaga o le faaoolima i lona tulaga e tolu, e mafai ona nofosala ai se tasi i le falepuipui, i le o’o atu i le tasi (1) tausaga, po o se sala tupe e $1,000; po o fa’asalaga uma e lua.

E $500 le tinoitupe ua faatulagaina e mafai ona tatalaina ai Palepoi ma Fanene, e faatali ai a la’ua faamasinoga.

FELISE FALANAI

O le aoauli o le aso 29 o Tesema, 2023 sa valaau ai e se tamaitai ia le ofisa a leoleo i Tafuna (TPS) ona o se fa’alavelave na tulai mai i le afioga i Mapusaga.

I le taunu’u atu o leoleo, sa faasino ane iai e le tamaitai na valaau i leoleo, ia le susuga ia Felise Falanai, o lo o nofonofo i luma o lona fale.  Ma sa ta’ua e le tamaitai le faaumu solo o Falanai i totonu o le nu’u.

Ina ua taumafai leoleo e fa’atalanoa ia le ua molia, ae toe fa’aumu le alii.  Sa vaaia e leoleo ia ni manu’a i le tino o le ua molia ma le malosi o le manogi pia. 

Na fa’afeso’ota’i ai loa e leoleo ia le vaega a le EMS mo le togafitia o manu’a a le ua manu’a ma aveina atu ai loa o ia i le ofisa a leoleo.

Ua molia nei Falanai i le Faatupu vevesi i totonu o aiga, lea e mafai ona faafalepuipui ai se tasi i le o’o atu i le ono (6) masina, po o se sala tupe e $500; po o fa’asalaga uma e lua.

DENNIS ELISARA

O le taeao o le aso 3 o Ianuari, 2024, sa valaau ai se tamaitai i le ofisa a leoleo i Tafuna, e lipotia se alii o lo o faatupu vevesi i totonu o se faleoloa i Iliili.  Sa ta’ua e lenei tamaitai, le togiina e le alii o Dennis Elisara ia se faitoto’a tioata i se ma’a ma fa’afefe se fafine i se ma’a.

E taunu’u atu leoleo, ua sola ese ia Elisara mai i le nofoaga na tupu ai le faalavelave.

Sa talatalanoa leoleo ma le tamaitai sa fa’afefeina e Elisara ma sa ia faamatalaina e faapea, na savali atu i totonu o le faleoloa ia Elisara ma amata ona palauvale, lea na fa’ate’ia ai tagata sa fai a latou faatauga.  O lea na talosagaina ai e le tamaitai ia Elisara e aua le palauvale pe ‘e’e i totonu o le faleoloa ona o lo o fefefe ai tagata o lo o fai a latou faatauga.

Ae na fa’amatala ifo e Elisara i le tamaitai e faapea, sa alu i le ASNAP e piki mai ana ‘food stamps’ ae e le o faigaluega le tagata faigaluega lea o lo o mataituina lana mataupu.  Ma e tusa ai ma faamaumauga a leoleo e faapea, sa fautuaina loa e le tamaitai lea ia Elisara, e toe fo’i i le ofisa a le ‘food stamp’ e talanoa i seisi o galue ai e faamalamalama iai lana mataupu.

Ae peitai, na ta’ua e le tamaitai ia le le fiafia o Elisara ma faatonu o ia e aua le pisa.  Ma savali loa Elisara agai i fafo ma tapuni malosi mai le faitotoa, ma tu’i i lona lima.  Ona toe amata loa lea ona ‘e’e ma palauvale Elisara.

Sa faamatala foi e lenei tamaitai, na tu’ua e Elisara le faleoloa ae peitai, na toe fo’i atu ma amata ona tau’ai i lalo oloa a le faleoloa, mai luga o fata.

Na ta’ua foi e le tamaitai lona fefe tele ina ua amata ona ‘e’e ia Elisara.  Ma o lo o masalomia foi le togiina e Elisara o le faitoto’a tioata a le faleoloa, i se ma’a.

O iina na vala’au ai loa le tamaitai i le ofisa a leoleo.

Ua ta’ua foi i totonu o faamaumauga a leoleo ia le taumafai o le ua molia, e tu’i ia le na a’afia i lenei faalavelave, i se ma’a ma vala’au solo, o ia e le popole i se tasi.

Sa aga’i suesuega a leoleo i le aiga o le ua molia, i Futiga, ae peitai, sa le’i mauaina ai o ia.  O se taimi mulimuli ane na va’aia ai Elisara i tafatafa o le Kolisi i Malaeimi, ma lokaina ai loa e leoleo ma aveina atu i le Ofisa a Leoleo.

Ua molia nei Elisara i le faatupu vevesi i nofoaga faitele, o le faaoolima i lona tulaga e tolu faapea ma le fa’aleagaina o meatotino i lona tulaga e lua.

O le moliaga o le faatupu vevesi i nofoaga faitele, e mafai ona nofosala ai se tagata i le falepuipui mo le ono (6) masina po o se sala tupe e $500; po o faasalaga uma e lua.

O le moliaga o le faaoolima i lona tulaga e tolu, e mafai ona faafalepuipui ai se tasi i le o’o atu i le sefululima (15) aso, po o se sala tupe e $300; po o faasalaga uma e lua.

Ae o le moliaga o le faaleagaina o meatotino i lona tulaga e lua, e mafai ona faafalepuipui ai se tasi i le o’o atu i le tasi (1) tausaga, po o se sala tupe e $1,000; po o fa’asalaga uma e lua.

E $500 le tinoitupe faatulagaina e mafai ona tatala ai le ua molia mai i le falepuipui, e fa’atali ai lona faamasinoga.

MOLIA SE ALII I LE FA’AO’OLIMA I LONA TUAFAFINE

O le po o le aso 3 o Ianuari, 2024 sa valaau ai se tina i le Ofisa a Leoleo i Tafuna e lipotia ai le faatupu vevesi o sona tuagane laititi, i lo latou aiga i Pavaiai.

Ina ua taunuu leoleo i le nofoaga na tupu ai le faalavelave, sa faapea ona talatalanoa ma le tina o Talisuaga Aiulu ma sa ia faamatalaina i leoleo, le ita o lona tuagane o Louis Levi (o ia lea ua molia), ina ua soli a lana fanau ia le mea o tofa ai lo la tina.  Sa ta’ua e Aiulu le leotele o le ua molia i lana fanau, ma amata ai ona o la tau upu.

Sa faamatala foi e Aiulu, na ia fai atu i lona tuagane e fai faalelei lana fanau, ae tali mai Levi e faatonu faalelei lana fanau.

Sa ta’ua e Aiulu, na alu ese ma le fale ina ia taumafai e fa’ato’ato’a le mataupu, ae na toe tamo’e mai totonu o le fale, ina ua ia faalogo mai, ua pisa atu lona tuagane ma le la tama.  Sa ta’ua e Aiulu, e fai atu i lona tuagane e soia, ae liliu mai lona tuagane, ma tu’i o ia.

Na fa’asino e Aiulu i leoleo le mea o nofonofo mai ai Levi ma sa faatonuina foi e leoleo ia Aiulu ina ia agai atu i le ofisa a leoleo, i lana ta’avale, mo le fa’aauauina o le su’esu’ega o lenei mataupu.

Sa molimauina e leoleo, le taumafai o le tina a Levi, e fa’ato’ato’a o ia ae o lo o u’uina e Levi ia ni naifi se lua i lona lima taumata.  Ma na faapea mai Levi i leoleo, e leai so latou aia e ulufale atu i totonu o le latou fale.

Ma o lo o ta’ua i fa’amaumauga a leoleo le savali mai o Levi i leoleo ma naifi, ae peitai, sa taumafai pea le tina o lenei alii e tu i le va o le ua molia ma leoleo, ma taumafai e fa’ato’ato’a o ia.  Ma sa faapea mai le tina, e leai se mea o tupu i le fale.

Sa ta’ua foi e le tina, o lo o le fiafia le atalii ona o le soli tofaga a le fanau a lana tama teine ma o le mafuaaga lena na tau upu ai lana fanau.

Ina ua mae’a le faamatalaga a le tina, na tago loa Levi ua tu’u ia naifi i luga o le laulau.  Ma na faamanino atu iai e leoleo ia Levi, e manaomia ona o latou malaga i le ofisa a leoleo, ae peitai, sa musu Levi.  Ina ua taumafai leoleo e ta’ita’i ma Levi i le ta’avale leoleo, sa tete’e lenei alii ma na avea lea ma tulaga, na atoa ai le to’alima (5) o leoleo, na galulue fa’atasi i le tu’uina o Levi i totonu o le ta’avale a leoleo ma aveina atu o ia i le ofisa a leoleo i Tafuna.

O ina sa faamatala ai e Levi, lona leotele i le fanau a lona tuafafine ona o le solia o tofaga a lona tina, ae leotele ai lona tuafafine ia te ia.  Sa ta’ua e Levi, na atili lona ita ona sa fai atu lona tuafafine, o ia e valea, ae na ta’ua e Levi, o lona tuafafine e faamaualuga.  Sa ta’ua foi e Levi lona po ina  foliga o lona tuafafine.

Sa togafitia e le vaega a le EMS ia Aiulu, ae aveina Levi e lokaina i le to’ese i Tafuna.

Ua molia Levi i le Faatupu vevesi i totonu o aiga, o le Faaoolima i lona tulaga e tolu faapea ma le tete’e i le faataunuuina o tiute a leoleo.

O le moliaga o le faatupu vevesi i totonu o aiga, e mafai ona fa’asala ai se tasi i le falepuipui i le o’o atu i le sefululima (15) aso po o se sala tupe e i le va o le $150 ma le $300; po o fa’asalaga uma e lua.

O le moliaga o le faaoolima i lona tulaga e tolu, e mafai ona nofosala ai se tasi i le falepuipui i le o’o atu i le tasi (1) tausaga, po o se sala tupe e i le va o le $150 ma le $1,000; po o fa’asalaga uma e lua.

O le moliaga o le tete’e atu i leoloe a’o faatinoina a latou tiute, e mafai ona faasala ai se tasi i le tasi tausaga i le falepuipui, po o se sala tupe e $1,000; po o fa’asalaga uma e lua.

E $1,000 le tinoitupe ua faatulagaina e mafai ona tatalaina ai le ua molia mai i le falepuipui, e fa’atali ai lona fa’amasinoga.