E FAI O LENEI AE O LENA

O AOLELE MA LE LIONA

Sa iai se alii tavini o se tasi o malo, e igoa ia Aolele, na sola ese mai ai lona matai, ma lafi i le togavao.  Sa umi se taimi o feseta’i solo ia Aolele i le togavai ma ua amata ona lelava ma fia ‘ai.  Ae ona fa’alogoina le leo o se liona.  Sa taalili atoa le tagi a le liona i totonu o le togavao.  Ma e ui i le lelava o Aolele, ae ua tu i luma ma faatopetope ese mai le mea o lo o tatagi ai le leo o le liona.

Ae o le faatopetope o le tamo’e a Aolele, sa ia le iloa lelei atu ai le a’a o se la’au tele ma sulu atu ai loa agai i luma.  E fetaui le toe tu a’e i luga o Aolele, ae ona iloa atu loa le agai mai o se liona ia te ia.  Ua tu malo Aolele ua matua’i le mafai ona minoi i lona pala’ai ina ua vaai atu i le Liona.

Na iloa atu e Aolele, le ‘etu mai o le savali a le liona ma fa’alala lona vae taumatau,  ua fula uma ae o lo o kava uma i le toto.

Ua mou lemu atu le fefe o Aolele, ae ua ia tu nei ma tilotilo atu i le liona ua o’o mai i ona luma ma ia iloa ai, o le mafua’aga lea o lo o taalili ai le tagi a lenei manu feai, ona o lo o mau se lala ma’ai o se la’au, i lona vae taumatau.  Ua fa’alatalata atu nei Aolele i le Liona ma a’apa lemu atu lava ma se’i ese le lala ma’ai lea o lo o mau i le vae a le liona.  

Na maualuga le oso a Aolele ina ua sau i fafo le la’au ma’ai mai i le vae o le liona, ae toe ta’alili le tagi a le liona.  Na gatete atoa le tino o Aolele e faatali le taimi o le a oso atu ai le liona e ai o ia.  Ua pupuni mau mata o Aolele ae peitai, sa leai se mea na tupu.  Ua tau pulapula ane nei o ia i le liona, ae o le taimi lena, ua taotooto lelei le liona ma saeto lona vae lea na mau ai le la’au ma’ai.

E le’i umi ae va’aia e Aolele le tu lemu ifo i luga o le liona ma toe savali mai ia te ia.  Na fa’ate’ia Aolele ina ua tu’u atu le ulu o le liona ma fa’asolo ona olo lona ulu ma lona ua i foliga, o le ua ma le tino a Aolele.  E foliga mai o lo o momoli atu lana fa’afetai ia Aolele mo lana galuega alofa, ua mapu mai ai i ona tiga.

Ua liliu nei le liona ma savali ese atu, ae ua saofa’i ifo i lalo ia Aolele ma ataata lemu ma taumafai loa e fai sana malologa.  Ae ua le mafai ona moe Aolele ona ua ova lona fia ‘ai.  E le i umi ona alu ese le liona, ae toe gase mai faaputuga vao i tafatafa o Aolele ma ia pupula atu, o lo o toe savali mai le liona ma se tama’i pua’a, e foliga mai na tape e le liona.

Ua savali mai le liona ma fa’ata’atia le manu mate i luma  o Aolele ona saofai lea i tafatafa ane.  Ua tu i luga Aolele ma tapena loa se afi ma kuka ai le pua’a ma ‘ai ai loa.  Ma o iina na amata ai le faigauo a Aolele ma le tupu o le togavao.

Ma o aso uma lava, e sau ai lava le liona ma se manu fasi ma tu’u i luma o Aolele aua sana taumafataga.

Ae o se tasi aso, na sau ai se savaliga a ni fitafita i totonu o le togavao ma o latou maua ai le mea o lo o lafi ai Aolele, ma ave faapagota loa o ia.  Ua o atu nei ia fitafita ma toe faafo’i Aolele i le nu’u lea na sola mai ai, ma ave sa’o atu lava i lona matai lea na sola mai ai. 

O tu ma aga a le nu’u lea, o so’o se tagata lava e solia se tulafono, e lafo i totonu o se lua o iai ni manu fe’ai.  Ma o le fa’asalaga foi lea na tu’u ia Aolele. 

Ua o’o i le aso e fa’ao’o ai le faasalaga a Aolele ma ua lolofi uma atu tagata e matamata i le lafoina o Aolele i totonu o le lua o manu fe’ai.  Ua filemu uma tagata ina ua aveina atu e fitafita ia Aolele ma fa’atu i le ogatotonu o le lua, e faatalitali ai lona iuga.  Sa va’aia le savali mai i fafo o le liona ma ua leai seisi e toe manava.

Ae na fa’ate’ia tagata uma, ona ua le va’aia le osofaia e le liona o Aolele, ae ua savali sa’o mai lava le liona ma tu’u lona ulu i le lima a Aolele ma ua tago atu Aolele ma milimili le ulu o le liona.  Ona saofa’i lea o le liona i autafa o Aolele.  Ua ata leotele Aolele ina ua na iloa atu lana uo, le liona lea sa la faauo i le togavao.

[IA MANUIA TOE FUAFUAGA O LENEI VAIASO]