Molia se alii o lo’o masalomia i le tagofia o fualaau fa’asaina, i lona talepe fale

Pago Pago - AMERIKA SAMOA

O le aso 30 o Tesema, na agai atu ai leoleo i le afioaga o Pava’ia’i, e su’esu’e se mataupu na valaau mai ai se tamaitai, e faapea, o se alii ua alu atu i totonu o lona fale e aunoa ma se fa’atagana, e ala i le tatalaina o se faamalama ma le faitoto’a pito i luma o le fale.

Ina ua taunuu leoleo i le fale na tupu ai le fa’alavelave, sa o latou va’aia se ali’i o ulufafo mai i le itu taumatau o le fale a le tamaitai na valaau i leoleo.  I le taimi sa faatalanoaina ai e leoleo lea tamaitai, sa maitauina le gatete o lona tino ma ona foliga ua tumu i le fefe.

Na faamaonia e le tamaitai sa valaau i le ofisa a leoleo, o le alii lea na ulufafo mai i lona fale, o lona tausoga o Michael Tunoa, lea ua molia nei i le talepe fale i lona tulaga e lua, faapea ma le solivale o fanua a isi.

O le moliaga o le talepe fale, e mafai ona fa’afalepuipui se tasi i le o’o atu i le tasi (1) tausaga, ma se sala tupe e $1,000; po o fa’asalaga uma e lua.  O le molivale o le soli fanua, e mafai ona fa’asala ai se tasi i le o’o atu i le ono (6) masina, po o se sala tupe e $500; po o  fa’asalaga uma e lua. 

E tusa ai ma le faamatalaga a le tamaitai na valaau i leoleo, sa fa’ate’ia o ia mai i sana malologa, i se pa’o i luma o lona fale.  Ina ua ia ulufafo mai i lona potu moe, sa ia faalogoina se tasi o magamagagu mai i luma o le fale, ma ia valaau ai loa le igoa o ‘Michael’.  Sa ta’ua e lenei tamaitai lona fefe ona e le masani i se mea faapea, po o uiga faapea a se tagata, ae ua na iloa, o le masani lea a Tunoa.

Sa faamatala foi e lenei tamaitai, sa faapopoleina o ia ona e na te le iloa po o a gaioiga e ono faia e nei tagata, i taimi e tagofia ai fualaau fa’asaina.

Sa faamatala e lenei tamaitai, na malaga mai o ia i Amerika Samoa ona o le maliu a si ona tina.  Ma e fou le tulaga lea o le osofaia o lona fale e tagata.  Ae na lapata’ia o ia e tagata o lona aiga, e uiga i ona tausoga (Tunoa ma lona uso), o lo o tagofia fualaau faasaina ma masani ona talepe fale a isi aiga.  

Sa ta’ua e lenei tamaitai, e le o se taimi muamua lea ua faia ai e Tunoa lenei tulaga i lo latou fale.  O leisi taimi na ona mauaina mai ai Tunoa, ua oso i totonu o le latou fale mai i se faamalama ma masae ai le ‘screen’ o le faamalama.  Ae ina ua ia su’esu’eina Tunoa, sa leotele atu lenei alii ia te ia, ma fai atu na faatonu o ia e lona uso e alu i totonu o le fale e aumai se naifi.

Sa lokaina mai loa e leoleo ia Tunoa ma aveina atu o ia i le Ofisa a Leoleo i Tafuna mo nisi suesuega.

O iina sa faamatala ai e Tunoa, sa faatonuina o ia e lona uso o Apolo, e alu e tatala le fale ma alu e aumai a se naifi.

O lo o ua lokaina nei Tunoa i le to’ese i Tafuna ma e $1,000 le tinoitupe faatulaga e mafai ona tatalaina ai i tua e faatali ai lona fa’amasinoga.