O OE O LO’U TAMA?

(w/ banner)

VAEGA 42

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 42.

******************************************

Ua alu le tafaoga a le aiga a le tamaloa o Tanielu ma si ona toalua o Eseta, o si a la fanau o Ruta, Iakopo ma Naomi i le aiga a le alii fomai o Taki.  O lenei tafaoga sa fuafua e Taki e momoli atu ai lona agaga fa’afetai i le tamaloa o Tanielu ma si fafine o Eseta, aemaise o si a la fanau, i le tatalaina o lo latou fale mo ia, faapea ma le taliaina o ia e avea ma se faaopoopoga i totonu o le latou aiga.

Ua taunu’u manuia le faigamalaga ma ua agai atu nei mo se malologa i le fale o le aiga a le alii fomai.  Manatua foi, o le aiga a Taki, e na’o ia ma lona tina.

Sa va’aia e Naomi le fa’aalia o uiga polepole vale a le alii fomai, a’o aga’i atu le latou ta’avale i lona fale.

“E iai se mea o tupu?” o le musumusu atu lea a Naomi ia Taki.

“E leai, o lo o okay mea uma,” o le tali mai lea a le alii fomai.  Ae sa le i talitonu ai ia Naomi on aua sui lava lana vaai i taga a le alii fomai.

Ua taunuu le ta’avale i le fale a le alii fomai.

Sa matua’i maofa ia Tanielu ma Eseta ma le la fanau to’atolu, e fai o le tele o le fanua e tu ai le fale a le alii fomai, ae o le tele toe matagofie o le fale lea ua latou taunuu iai.

Ua feosofi i fafo ia Naomi, Ruta ma Iakopo ma sioa i le fale o lo o tu i o latou luma.  E tau falo agai i luga le tilotilo a le to’atolu lea, i le tau tilotilo i le fale.

Na va’aia e le aiga, le tau fai tamomo’e mai o ni tagata mai i totonu o le fale ma tutu i se laina faaituala lua.  Ua geno atu nei ia Taki ia Tanielu ma Eseta, e pei o lo o fai atu iai, e muamua atu i la’ua.  Ua savavali atu nei Tanielu ma Eseta a’o tu fa’aaloalo le aufaigaluega a le alii fomai o Taki. 

Ua liliu atu Iakopo, Ruta ma Naomi o le a la’u mai a latou atopa’u, ae taofi mai latou e le alii fomai ma ia faapea mai, “Tu’u e o mai iai le aufaigaluega”.

Ua talie ia Naomi ma nai ona tei i le tala a le alii fomai.

“O mai loa tatou o i totonu,” o le tala lea a Taki ma savali atu loa i totonu o le fale.

Na faapea Tanielu, Eseta ma le la fanau, ua o latou va’ai i le mea e gata mai ai le manaia, i le latou va’ai mai fafo.

Ae na matua’i fa’ate’ia i latou i le tulaga ese o totonu o le fale.  Ua le iloa e le aiga se tala e faamatala ai le fe’ilafi o teuteuga i totonu o le fale faapea le tele.  

“Oka se tele o le fale,” o le tala ofo lea a Iakopo.

“Ai se toatele o ni tagata e nonofo i totonu o lenei fale, a ea?” o le fesili atu lea a Naomi.

“E leai, e na o ma’ua ma lo’u tina.  O la e iai fale a le aufaigaluega i tua atu o le fanua,” o le tali mai a le alii fomai.

Ua feva’aia’i ia le fanau a Tanielu ma Eseta i le tala a Taki.

[E FAIA PEA]