TALA I VAIFANUA

Pago Pago - AMERIKA SAMOA

LITAEA TAITAI O LE OFISA TINEI MU

I se fa’aaliga fa’alauaitele mai i le Matagaluega o Sailiga ma Lavea’i (DSAR), i le aso 22 o Ianuari 2024, sa fa’alauiloa mai ai le litaea o le susuga ia Cliff U. O’Brien, lea sa fa’auluulu i le Vaega Tinei Mu, ma o lona aso mulimuli i le galuega, o le aso 25 o Tesema, 2023.

O le aso 19 o Ianuari, sa faia ai se fa’atasiga faamavae mo O’Brien, lea sa auai atu ai nisi o lana aufaigaluega, aiga ma uo ma sa aloaia ai e le Faatonusili a le DSAR, le susuga ia Save Liuato Tuitele, ia le litaea a O’Brien.

Sa ta’ua e Save, le atoa o le 48 tausaga o le tautua matavela a O’Brien i tagata o Amerika Samoa ma sa ia fa’aleoina le agaga fa’afetai ma le fa’amalo i lona aiga, e tusa ai ma le lagolagoina o le alii taitai, a’o feagai ai ma ona tiute i totonu o le galuega.

Na amata galue le susuga ia O’Brien i totonu o le vaega tinei mu, mai ia Setema 1975.  E tele ni a’oa’oga sa ia auai ai, e aofia ai totonu o le Matagaluega Tinei Mu a le malo tele, faapea le vaega a le FEMA-Homeland Security.

O le tausaga e 2005 na filifilia ai o ia e avea ma Ulu o le Vaega Tinei Mu, a’o iai i lalo o le faamalumaluga a le Matagaluega mo le Puipuiga o le Saogalemu Lautele (DPS) ma e 18 tausaga na tautua ai i lea tofiga fa’aletaitai, ae le i faauluina lana talosaga faamavae, i le tausaga ua mavae.

Sa saunoa le susuga O’Brien, i nei mau tausaga sa iai o ia i totonu o lenei tautua, sa ia molimauina le tuptupu a’e ma le faaleleia atili o lenei auaunaga.

Sa faapea foi ona aloaia e le faalapotopotoga a le Boys Scout ia O’Brien, i le avea ai o ia ma ulua’i ‘Eagle Scout’ na filifilia e avea ma Taitai o le Vaega Tinei Mu, i totonu o Amerika Samoa.

SINI AUTU A LE FAIGAMALO:  FA’ALELEIA ATILI TAUTUA MO LE TAUSIGA O LE SOIFUA MALOLOINA O TAGATA

I se lipoti faauluina a le Faigamalo a Lemanu-Talauega, e auiliili ai ni sini faatuina ma sini ausia, o se tasi o sini autu o lo o tausinio iai pea lenei faigamalo, o le siitia lea o le tulaga o auaunaga i le tausia lelei o le soifua maloloina o tagata lautele.

E tele ni poloketi ma polokalama sa ta’ua e le faigamalo ua mafai ona ausia, e aofia ai ma le mauaina o se tinoitupe e $44 miliona mai i le ARPA (American Rescue Plan Act).

 I le tausaga ua mavae, i lalo o se faatonuga a le afioga i le Kovana Lemanu P. S. Mauga, sa ave’esea ai le poloketi mo se falemai fou, mai i le LBJ, ae tu’uina atu i lalo o le vaavaaiga a le Matagaluega o le Soifua Maloloina (DOH). 

Sa faaleoina e le LBJ lo latou le ‘auai i se fuafuaga mo se falemai fou, ae ia fa’aaogaina le tupe e toe faaleleia atili ai le falemai o iai nei faapea lana auaunaga.  Ma e ui lava i le lagolagoina e le Fono o le fautuaga a le LBJ, ae peitai, ua tu malosi le afioga I le Kovana, i lana fuafuaga mo le falemai fou lea o le a fausia i Tafuna.

O lo o iloiloina foi suiga i pili totogia i totonu o lenei matagaluega, e aofia ai ma pemita o le soifua maloloina mo tagata faigaluega, o sala mo pisinisi ia o lo o tapunia i le le tausia o tulafono a le DOH ma isi pili.  E le o ma’oti mai se aso o le a amata ai ona faamalosia nei suiga.

(E mafai ona tagai i le lipoti faaperetania 01/23/24 mo pili ‘ese’ese a lenei matagaluega).

O lo o aloaia foi i lea lipoti ia galuega faatino a le LBJ i ana poloketi fa’ainisinia ma isi galuega e fa’aleleia atili ai le falemai.  E aofia ai le masini MRI ma le CT Scan lona lua.

O nisi o vaega sa tulimatai e le faigamalo, o le fa’aleleia atili lea o tautua faa tausimai, lea na mafua ai ona aumai nisi o tausi mai e 36 mai Thailand.  E to’a 15 lea ua taunuu mai.  Faapea ai ma tausimai pasi lotoifale (RNs & LPNs); o le fa’afaigaluegaina o ni tausimai Fiti se to’atolu ua pasi a latou NCLEX-RN; 18 nisi tausimai mai Fiti o lo o fa’aauauina aoga i le Iunivesite a Chaminade.

O le iloiloina o le Matagaluega Saili ma Lavea’i, i lona 15 masina talu ona fa’avaeina, faapea ma la latou galulue so’o tau’au ma le vaega a le EMS, Tinei Mu, ma le vaega e mataituina le puipuiga o le gataifale.

O seisi vaega o lenei auaunaga o lo o ave iai le fa’amuamua a le Faigamalo, o le vaega o le Medicaid ma le Medicare.  O nisi o poloketi mo le Medicaid, mo sina taimi puupuu (tasi tausaga), e mafai ai ona aveina atu ni gasegase filifilia ua a’afia i le kanesa ma nisi e le agava’a i nei polokalama.  O i latou ia e aofia ai tagata nofomau a Amerika Samoa.

MOLIMAU TALAUEGA I SUIGA FUAFUAINA I AUALA FAATULAFONOINA E SUIA AI FAAVAE A AMERIKA SAMOA

I lana saunoaga amata i luma o le Komiti o Alagamanuia Faalenatura a le Maota o Sui i le konekeresi, i le vaiaso ua mavae, sa faamanatu atu ai e le afioga i le Lutena Kovana ia Talauega E. V. Ale, e na o Amerika Samoa le teritori e manaomia se fa’atagana mai i le konekeresi, i so’o se taimi e finagalo a ona tagata, e suia lona faavae.

I se pili taufa’aofi sa faaulufaleina e le sui Faipule a Amerika Samoa i le konekeresi a Amerika, le afioga Uifa’atali Amata Radewagen, o lo o talosagaina ai le ave’esea o le vaega lea o lo o faatulafonoina ai le tatau ia Amerika Samoa, ona tapa muamua se faatagana mai i le Konekeresi, e faia ai so’o se suiga i lona faavae, ae toe faafo’i i le mea na iai muamua, lea e mafai ai ona pasia e tagata o le teritori ma le Failautusi o le Initeria, so’o se suiga e finagalo iai.

Na fesiligia e le Faipule mai Arkansas, o Bruce Westerman ia le afioga i le lutena kovana, po o iai se talitonuga, o le a sili atu ona vave maua se faaiuga pe a pasia lenei pili.  Sa saunoa Talauega, i le avea o le tulaga o iai nei lenei mataupu, ma avega mamafa i tagata ma taitai o Amerika Samoa, faapea sui o le Konekeresi. 

E tusa ai ma manatu fa’aalia a i latou na auai i le iloiloga i le laumua i Uasigitone, sa faamalieina le toatele o sui o le komiti i tali ma saunoaga a le afioga i le lutena kovana.  Na aloaia e le lutena kovana ia le manatu fa’aalia a le sui mai Swains ma talosagaina le komiti ina ia fa’atauaina manatu fa’aalia mai i le sui mai Swains, ona e fa’alauteleina ai fa’afitauli tau i le faavae, o feagai nei ma Amerika Samoa.

Na mafai foi ona auai le afioga i le Faipule mai Swains, le susuga ia Su’a Alexander Jennings, i lea iloiloga ma ia fa’aalia lona fa’atu’I’ese i lenei pili, ona i sona talitonuga, afai ae pasia lenei pili, o le a le puipuia ai aia tatau o tagata Swains.  

Na molimau foi Talauega, o le tasi o faaopoopoga e lima i le faavae sa mafai ona faatuali mai i se iloiloga lautele sa faia i le 2022 lea o lo o taoto nei i luma o le Failautusi o le Initeria, o Deb Haaland, o le tuuina atu lea i le Faipule mai Swains, le aia tatau e mafai ai ona palota i tauaofiaga a le Fono Faitulafono.  Afai ae pasia lea suiga, o le a avea ai Su’a ma uluai Faipule a Swains, i tala faasolopito a Amerika Samoa, o le a palota i totonu o le fono faitulafono.