Malaga atu le Tausala a Amerika Samoa i le tauvaga Tausala o le Pasefika 2024

Pago Pago - AMERIKA SAMOA

O le aso Sa na se’i mavae atu nei, na tu’ua ai e le Tausala a Amerika Samoa, le tamaitai o Judy Fa’afetai Taunu'u, ia le teritori mo le motu o Nauru, e tausinio i le tauvaga Tausala o le Pasefika 2024.

Ae e le i faimalaga atu Tausala, sa mua’i faataunuuina se aiga fa’amavae, ae o se sauniga lotu tapuai, aua lona faimalaga atu i Nauru.  O lea fa’atasiga na faia i le faletalimalo a le Tradewinds i le afiafi o le aso Lulu, Ianuari 17, 2024.

Sa fa’alauiloa mai e le Peresetene o le Asosi o le Tausala a Amerika Samoa (MASI), o lea fa’atasiga na fa’ao’oina atu ai se fa’afetai i le malo, pisinisi ma tagata ta’ito’atasi na foa’i ma fesoasoani i tapenapenaga a le Tausala, aua le alo atu i le tauvaga ia Fepuari 3-4, 2024.

Sa auai atu i lea fa’ataasiga ia le susuga ia Loa Tauapai Laupola mai i le Ofisa o le Kovana, o le Faatonusili o le Ofisa o Turisi ia Taimalelagi Minnie Tuia, o totino o le Komiti Faafoe a le MASI, o sui mai i pisinisi ma fa’alapotopotoga o lo o lagolagoina le taumafaiga a le Tausala a Amerika Samoa, faapea nisi o lona aiga ma uo.

O le susuga i le Faafeagaiga ia Filipo Tuigamala na tatala aloaia le fa’atasi i lea afiaf i se talosaga, ona soso’o ai lea ma le tautalaga a le Tausala a Amerika Samoa, le tamaitai o Judy Fa’afetai Tauanu’u.

Sa ia momoli le fa’afetai i le faalapotopotoga a le MASI mo la latou fesoasoani i ana tapenapenaga aua le faamoemoe i le masina fou.  E le gata i lea, sa ia fa’aleoina se faafetai faapitoa ia Matauaina To’omalatai, lea sa paleina le tofi o le Tausala o Amerika Samoa ma le Tausala o le Pasefika, i ni nai tausaga na se’i mavae atu nei, mo lana fesoasoani aua le tauvaga o le a alo atu ai, i Nauru.

O Toomalatai sa manumalo i le tauvaga o le Tausala o le Pasefika i le tausaga e 2002, lea sa faia i Fiti.  Ae o le taimi mulimuli na umia ai e Amerika Samoa le pale o le Tausala o le Pasefika, o le tausaga e 2017, lea sa manumalo ai Lupe Kenape Aumavae, i le tauvaga na faia i le atu Kuki.

I le fa’atasiga sa faia i le po o le aso Lulu, sa mafai ona maimoa ai le auvalaaulia i la’ei ‘ese’ese ua saunia mo le alo atu o Tauanu’u i le tauvaga i Nauru.

Sa faamatalaina e se tasi o totino o le MASI, o Niko Tupou, le nofo saunia o Tauanu’u mo le vaega o le tauvaga mo ofu fa’asavili, lea o lo o ua tusia ai le ata o le “I’a Sa” ma mamanu Samoa.  Ae o lenei ata, e fa’ato’a iloa atu pe a ki ni moli fa’apitoa.

I le vaega o le taleni, o le a faapea ona sa’asa’a le tausala a Amerika Samoa i se siva Samoa ma faai’u ai i isi siva fa’aleatunu’u e pei o siva Tahiti, Tonga ma Hawaii.

Na fa’ailoa mai e le tausala a Amerika Samoa, i sana faatalatalanoaga, lona nofo saunia mo lenei faamoemoe ma o le a ia taumafai i lona malosi atoa.

Sa ia fa’aalia foi lona mitamita ma lona agaga fiafia e fai ma sui o Amerika Samoa i lenei faamoemoega taua, lea foi o le a ia maua ai se avanoa e feiloai atu ai i isi tausala mai i isi motu o le Pasefika.

O Tauanu’u e malaga mai i Fagasa ma Nu’uuli, ma e 23 tausaga o lona soifua.  Sa ia fa’ailoa mai i le Samoa News, le iai o sona faamoemoega e ulufale atu i totonu o vaega’au a le malo tele, ma fa’aauauina ai ana aoaoga ina ia mafai ona ausia lana sini fa’atuina, o le avea ma loia, i le lumanai.

Na fa’aalia le agaga fa’afetai o Tauanu’u ia i latou uma o lo o fa’auau ona lagolagoina lana taumafaiga, aemaise le afioga i le Kovana ia Lemanu P. S. mauga, o le afioga i le Lutena Kovana ia Talauega E. V. Ale, o le Ofisa o Turisi, le Ofisa o le Soifua Maloloina, kamupani a le All Stars, GHC Reid, Cost U Less, Talofa Inc., le fale’aiga a le Cecilias, o Sue Tavake faapea le susuga ia Justin Tuiasosopo ma le Bluesky.