Misa se aiga ona o le le fufuluina o ipu

Pago Pago - AMERIKA SAMOA

I le aoauli o le aso 24 o Tesema, 2023 na fa’afeso’ota’i ai e se tina le ofisa a leoleo i Tafuna, e lipotia ai lona tuagane, i le fa’atupu vevesi i totonu o le latou aiga, ma le talepeina o fa’amalama o le latou fale.

Ua molia ai nei le susuga ia Lawrence McFall i le moliaga o le Faatupu vevesi i nofoaga faitele, lea e mafai ona nofosala ai se tasi i le falepuipui i le o’o atu i le sefululima (15) aso, po o se sala tupe e $300; po o fa’asalaga uma e lua.

Sa fa’atalanoaina e leoleo ia le tina i le nofoaga na tupu ai le fa’alavelave, ma sa ia faamatalaina lo la taunu’u atu ma sona alo tamaitai, i le latou fale, ae ona lagonaina le leo tele o lona tuagane e uiga i le fanau a lenei tina, a’o faamamaina e lona tuagane ia ipu.

O lo o ta’ua i totonu o fa’amaumauga a leoleo e faapea, sa faatonuina e lenei tina ia le to’alua a lona tuagane, ua tatau ona su’e loa so la’ua lava fale, ma le tele o le pisa i le va o a latou aiga.  Sa faamatalaina e le to’alua a le tuagane ia le tala a le tina (lona tuafafine) ma o iina na amata ai loa le tauga upu a le tuafafine ma lona tuagane, ma togi ai e le tuagane ia se ulo ma ta’ei ai fa’amalama o le fale.

Sa faamatala e le tuafafine le savali atu o lona tuagane ma se falai ia te ia, ma o I’ina na amata ai ona ia sasau lona to’oto’o, ae e le i tau lona to’oto’o i lona tuagane.

Ua ta’ua foi i fa’amaumauga a leoleo le u’una’i atu e le tama teine a lenei tina, ia lona tina i totonu o le potu e fa’afilemu ai, ae o le taimi lea, ua tatu’i ai e le tuagane o le tina ia le fale ma le faitoto’a ma i’u ai ina lele atu le faitoto’a ma tau i le tama teine a lona tuafafine, lea o lo o taumafai e u’u le faitoto’a.  O iina na valaau ai loa e le tina/tuafafine ia leoleo mo se fesoasoani.

Sa ta’ua e lenei tina/tuafafine, lona fefe ona e le o se taimi muamua lea ua tupu ai se pisa i totonu o le latou aiga.

Sa fa’atalanoaina e leoleo ia le tama teine a lenei tina/tuafafine ma sa fa’amatala e lenei tamaitai lo la taunu’u atu ma lona tina i le fale, ae o lo o tomumu le tuagane a lona tina i le le fufulua o ipu.  Sa ta’ua e lenei tamaitai, le amataina o se taugaupu i le va o lona tina ma lona tuagane ma i’u ai i le fa’aleagaina e le tuagane a lona tina ia meatotino i totonu o le fale ma ta’ei fa’amalama, a’o palauvale i lona tina.  Sa faamatala foi e lenei tamaitai, le savali atu o le ua molia i lona tina ma se falai, ma o le mafuaaga lea na ia u’unai ai lona tina i totonu o lona potu, ma loka mai le potu.

Sa faamatala foi e le alo tamaitai a lenei tina, le tatu’i e le ua molia ia le fale ma le faitoto’a ma I’u ina malepe ai le faitoto’a ae peitai, sa ia taofia le faitoto’a e puipui lona tina.

Sa aveina loa e leoleo ia McFall ma tu’uina i totonu o le ta’avale leoleo, ae talatalanoa ma le to’alua a McFall, le tina ia Tausala McFall.

Sa faamatala e Tausala le la taunu’u atu ma lona to’alua i le fale mai le lotu ae o la va’aia le iai o ni ipu palapala i totonu o le ‘sink’, ae na iai le fanau teine a le tuafafine a lona toalua i le fale, ae e le i manana’o e fufulu ia ipu.  Sa ta’ua e Tausala le fa’ailoa atu e lona to’alua i lona tuafafine, sa tatau ona fa’amama e lana fanau teine ia ipu, ona o la sa i le fale.

Na faamatala foi e Tausala ia le to’atama’i lona to’alua ma amata ona otegia fanau a lona tuafafine, ae fai atu ai loa lona tuafafine, ua tatau ona o ese ma le fale.  O iina na amata ai loa le taugaupu i le va o le tuafafine ma lona tuagane.  Sa ta’ua foi e Tausala le alu atu o le tuafafine o lona toalua ma sasau atu lana to’oto’o i lona toalua, ae sa le i mana’o lona to’alua e fa’ao’olima i lona tuafafine, o le mea lea na ia fa’aleagaina ai fa’amalama o le fale.

Ina ua su’esu’eina e leoleo ia McFall i le mea na tupu, sa ia fa’amatalaina foi le tala e tasi sa fa’amatala e lona to’alua.  Ae e pei ona ta’ua i fa’amaumauga a le malo, sa ta’ua foi e McFall lona le iloa sa fai se tala a lona tuafafine, i lona toalua, i le taimi o lo o ia faamamaina ai ip.  Ae ina ua ia malamalama mulimuli ifo i le faamatalaga a lona tuafafine, sa ia tago loa ua togi le ulo i fa’amalama, ona o lona ita tele.  Sa ta’ua foi e McFall, le leai o sana faamatalaga leaga pe taufa’afefe na fai i lona tuafafine, ae sa ta o ia e lona tuafafine, i lona to’oto’o.

O lo o ua taofia nei le ua molia i le toese i Tafuna e fa’atalitali ai lona fa’amasinoga.