Fesiligia Malemo pe sa ia fa’aaogaina se vaega o le $4.4 miliona

Pago Pago - AMERIKA SAMOA

O le aso Tofi o le vaiaso ua tuanai, na faataunuuina ai iloiloga a le Komiti o Paketi ma Tupe Fa’asoasoa, a le Maota o Senate, e fa’atatau i le $4.4 miliona lea se teuina sese i le faletupe i le Wells Fargo, i le tausaga ua tuanai, lea o lo o tau saili le $100,210, e le iloa po o fea ua o’o iai.

Sa fa’ailoa atu foi i afioga Senatoa, le aofia ai ma le vaega su’esu’e a le FBI i le suesueina o lenei mataupu, ma o lo o galulue fa’atasi ma le Malo o Amerika Samoa, i le sailiga o le vaegatupe lea ua leiloa.

Sa auai le Tausitupe a le Malo, le susuga ia Malemo Tausaga, i lenei iloiloga, e faamanino i afioga Senatoa, le toe maua o le $957,192.00 ia Aukuso 25, 2023 ae o le $3.4 miliona na toe maua e le malo ia Tesema 12, 2023.

Sa tauaaoina atu e Malemo i luma o le Komiti ia le kopi o le siaki e $3.4 miliona mai i le faletupe a le Wells Fargo e avea ma fa’amaoniga.

Na fesiligia e le Taitaifono o le Komiti, le afioga Senatoa Utu Sala Poasa, ia Malemo, pe iai se mafuaaga o lo o taofia ai e le Wells Fargo ia le $100,210, ae na tali le Tausitupe a le malo, e tusa ai ma suesuega a le FBI, o le aofaiga lea sa to’esea mai i le aofaiga atoa.

Ae na saunoa Utu, afai na iai atoa le $4.4 miliona, i le taimi na suesue ai e le FBI lenei mataupu, sa tatau ona toe fa’afo’i uma mai le aofaiga atoa lea.

Sa fesili foi Utu pe sa iai se fesootaiga i le va o le malo o Amerika Samoa ma le Wells Fargo e tusa ai ma le tupe ua to’esea, pe sa fa’aaogaina e totogi ai se pili mo le feavea’iina o tupe.

Sa tali Malemo, e na te le iloa pe sa iai se pili, ae i sona talitonuga, o le tupe lea ua to’esea, atonu na gaoia e se tagata, po o ni tagata, sa fuafuaina ma lafoina atu le fa’atonuga pepelo i lona ofisa.

E pei ona sa lipotia e vaega fa’asalalau i taimi tuanai, o lenei mataupu sa tulai mai i le tausaga ua mavae, lea na aveina atu ai se tinoitupe e $4.4 mai i le tusitupe a le malo o Amerika Samoa, i le TBAS, i lalo o se faatonuga mai i le komiti fa’afoe a le LBJ, i le Ofisa o Tupe.

Ae peitai, na fa’amaonia mulimuli ifo, o lenei faatonuga tusitusia mai i le LBJ, e le i sau mai i le LBJ.  Ae paga lea, e faamaonia ifo lea tulaga, ua mae’a ona ave’eseina atu le $4.4 miliona mai i le tusitupe a le malo.

Sa fesiligia e le afioga Utu ia Malemo, po o fa’aauau pea feso’otaiga i le va o lona ofisa ma le faletupe a le Wells Fargo, e mafai ai ona nofo malamalama le malo o Amerika Samoa, i auala o lo o uia, e saili ai le tupe ua leiloa.  Sa tali Malemo, o le faletupe a le TBAS lea o lo o feso’ota’i ma le Wells Fargo, ina ia mafai ona nofo iloa ia le malo o Amerika Samoa, i tulaga uma o lenei mataupu.

Na fesiligia foi e le afioga Utu ia le sui peresetene o le TBAS ia Owen Peery, lea sa auai i le iloiloga i le vaiaso ua mavae, pe mafai ona feso’ota’i sa’o le e ana le tupe ma le faletupe, e fa’atonutonu le mea e feavea’i ai ana tupe.

Sa tali Peery, so’o se taimi e finagalo ai se tagata e iai sana tusitupe i le TBAS, e ‘transfer’ sana tupe i se faletupe i fafo, e leai se fesootaiga i le va o lea tagata ma le TBAS.  Sa faamalamalama foi e Peery, e le i mafai ona faamaonia mai le e ana le tusi tupe lea sa teuina ai le $4.4 miliona i le faletupe a le Wells Fargo Bank, ona o aiaiga fa’aletulafono o lo o puipuia ai lea tusi tupe.

Ae sa faamanino a Peery, ua mae’a ona filifilia ia tagata patino i totonu o le Ofisa o tupe a le malo, e mafai ona ‘access’ ia tusitupe a le malo i luga o ‘upega tafa’ilagi, e mafai ai ona fai ‘transfers’.  Ae sa faamaonia e le TBAS ia le ave’eseina atu o le tupe lea, i le Ofisa o Tupe, ona o le tele o le aofaiga o le tupe.

I le saunoaga a le afioga i le peresetene o le Senate, ia Tuaolo Manaia Fruean, sa ia ta’ua ai le tele o lenei tupe ma ua toatele nisi o le atunu’u ua le fiafia i lenei mataupu.  Sa saunoa Tuaolo, e le tele sana tala e faia i lea tulaga, ae sa ia lapata’ia le tausitupe a le malo, ina ia aua ne’i le fiafia i lana fesili.  Ma fesiligia ai loa e Tuaolo ia Malemo, pe sa ia fa’aaogaina se tupe o le tinoitupe lea o lo o tau saili.  Na tali le tausitupe, e leai.

Sa faapea foi ona fesiligia e le afioga Senatoa Satele Lili’o ia Malemo, po o iai sana pisinisi faufale o lo o konakalate e le malo, sa tali Malemo, e leai.

Na toe fesiligia e Satele ia Malemo, pe o iai se faamaoniga i tala salalau i luga o ‘upega tafa’ilagi, e tusa ai ma le faigamalaga a ia ma lona faletua, lea na alu ai le $30,000.

Sa tali Malemo, e iai malaga a le malo e totogi e le malo, faapea foi malaga mo le Retirement Fund, ae e na te le maua ni tupe (per diems) mo nei malaga.

O le aso Faraile, Ianuari 12, 2024, na toe fa’aauau ai ia iloiloga a le Komiti o le maota maualuga.