POU TUTE A LEOLEO

Pago Pago - AMERIKA SAMOA

MOLIA SE ALII I LONA FA’AO’OLIMA I LANA UO TEINE I LUMA O FANAU

O le vaveao o le aso 16 o Tesema, 2023, na valaau ai se tina i le Ofisa a Leoleo i Tafuna e lipotia ai le fa’ao’olima o sana uo tama ia te ia, a’o iai sana tama teine e 4 tausaga i tafatafa ane.

Ina ua taunu’u leoleo i le nofoaga na tupu ai lenei fa’alavelave, sa faamatala ifo e le tina na valaau i le ofisa a leoleo, le o’o atu o lana uo tama i lena vaveao, ma e’e atu ia te ia, fa’afefe o ia ma taumafai e fa’amalosi o ia.  Sa faamatala e lenei tina, na alu atu lana uo tama i lea taeao, ae o lo o fa’asuaava.  Ma ina ua ia le usita’ia fa’atonuga a lana uo tama, sa ia (le ua molia) tosoina atu lona lima, fa’atonu o ia (le tina) e tatala ese ona ofu. 

(O le a le fa’ailoa suafa o lenei ulugalii, ona o le puipuiga i fanau o lo o a’afia i lenei mataupu).

Sa faamatala foi e le tina i leoleo, o lona tago atu e u’unai i fafo lana uo tama mai i le potu ma faatonu e alu e moe, na atili ai ona ita le ua molia ma amata loa ona palauvale ma ‘e’e atu ia te ia, e tatala le faitotoa.

Ona o le musu o le tina e fa’ateleina le la misa i totonu o le fale, ae e le o se la fale (o le fale a le uo a le tina), sa ia tatalaina ai le potu.  Ae tu’i mai ai e le ua molia tua o lona ulu ma pa’u ai i lalo.  O iina, e pei ona faamatala e le tina, na amata ai loa ona fasi o ia e le ua molia.

Sa fa’aauau le faamatalaga a lenei tina e faapea, sa ia lagonaina le leo o si ana tama teine e 4 tausaga, o lo o ‘e’e ma fai atu i le ua molia, e soia, ae peitai sa ta’ua e le tina, lona fa’alogoina le otegiaina e le ua molia o lana tama teine ma faatonu e aua le pisa. 

Sa ta’ua e le tina, ina ua maua sona malosi, sa ia u’una’i ese atu ai le ua molia ma ia tago atu i le si’i mai lana tama teine ma ia tamo’e ese loa ma valaau loa leoleo mo se fesoasoani.

Sa faamatalaina e lenei tina i leoleo, ua atoa le masina o le la mafutaga ma le ua molia, ae e ese le tama o lona alo.  Sa ta’ua foi e lenei tina, e le’i iai sona manatu e tupu se tulaga faapea i lo la va ma le ua molia.

Ina ua aveina atu le ua molia i le ofisa a leoleo i Tafuna mo le suesueina, sa ia faamaonia lona fa’ao’olima i lana uo teine ona o lona otegiaina o ia i le tuai atu i le fale ma le fa’asuaava.  Sa ia faamatalaina foi, lona ita ona o le musu o lana uo teine, e tatala atu le faitotoa o le la potu.

Ua molia nei lenei alii i moliaga o le Faatupu vevesi i totonu o le aiga, faapea ma le Fa’ao’oliima i lona tulaga e tolu.  

O le moliaga o le faatupu vevesi, e mafai ona nofosala ai se tasi i le falepuipui, e o’o atu i le sefululima (15) aso, po o se sala tupe e i le va o le $150 ma le $300; po o fa’asalaga uma e lua.

O le moliaga o le fa’ao’olima, e mafai ona fa’afalepuipui ai se tasi i le o’o atu i le tasi (1) tausaga, o se sala tupe e $1,000; po o fa’asalaga uma e lua.

E $500 le tupe fa’atulagaina e mafai ona tatalaina ai le ua molia, mai i le falepuipui, e faatali ai lona fa’amasinoga.

DEON TAYLOR

O le aso 15 o Tesema, 2023 na valaau ai e le susuga ia Deon Taylor ia le Ofisa a Leoleo i Tafuna, e tusa ai ma lona tua’a lea sa faapisa i lo latou aiga i Fagaima.

Ina ua taunuu leoleo ma talatalanoa ma Deon, sa ia fa’amanino i leoleo le tatu’i e lona tama o lo latou fale ma palauvale solo.  Ma sa ta’ua foi e Deon, le fa’asuaava o lona tama i lea taimi.

Ua molia nei le susuga ia Joseph Taylor i le Faatupu vevesi i totonu o aiga, ma o se solitulafono e mafai ona nofosala ai se tasi i le o’o atu i le sefululima (15) aso, po o se sala tupe e $300; po o fa’asalaga uma e lua.

E $300 le tupe fa’atulagaina e mafai ona tatalaina ai le ua molia, mai i le falepuipui, e fa’atali ai lona fa’amasinoga.