POU TIUTE A LEOLEO

Pago Pago - AMERIKA SAMOA

PUAPUAGAIMOANA IOLAMA

O le 10:25 i le po o Tesema 16, 2023 na valaau ai le susuga ia Jared Liu Kuey i le Ofisa a Leoleo i Tafuna (TPS) e tusa ai ma se tamaitai o lo o palauvale solo ma fa’aumu i luma o lona fale i Puapua.

Ina ua taunuu atu leoleo, o lo o saofa’i mai le tamaitai o Puapuagaimoana Iolama i luma o le fale fa’atali pasi.  Na fa’alogoina e leoleo le manogi pia o Iolama ma aveina atu ai loa o ia i le TPS mo le su’esu’eina.

E tusa ai ma fa’amaumauga a leoleo, sa faamatalaina e Kuey, na ia fa’alogoina le palauvale o Iolama, a’o savali atu agai i le alatele.  Ma sa ia taumafai e tuli ese le tamaitai ae na ta’ua e Kuey le fa’aumu o Iolama ma savali ese.

Ina ua fa’atalanoaina Iolama, sa ia fa’amaonia lona fa’aumu ae fai mai a ia, e na te le i palauvale.

Sa faamalamalama e Iolama i leoleo, sa inu ni nai ana apa pia ae e le i savali agai i le alatele.

Ua molia nei Iolama i le moliaga o le Faatupu Vevesi i nofoaga faitele, e mafai ona nofosala ai i le ono (6) masina, po o se sala tupe e $500; po o fa’asalaga uma e lua.

STONE FILISI

O le po o le aso 16 o Tesema, 2023, na vala’au atu ai se alii leoleo, le susuga Maj. Leone, i le Ofisa Leoleo i Tafuna (TPS) e lipotia se alii o lo o fa’atupu vevesi i le afioaga o Fagaima.

Sa fa’amatala e Leone, sa faia se tapenaga fale a le latou aiga ae ona faalogoina se tasi o palauvale solo i luma o le latou fle ma fa’aumu.  Na ta’ua e Leone, na fa’ato’a ia iloa ifo o lona atali’i fai, o Stone Filisi, lea sa faia lea tulaga, ina ua ia (Leone) savali atu i fafo.  Ae ina ua latalata atu i lona atalii, sa ia sosogia le manogi pia o Filisi, ma ia vala’au ai loa i le ofisa a leoleo.

Na faapea loa ona aveina e leoleo ia Filisi i lo latou ofisa.  Sa ta’ua i fa’amaumauga a leoleo, le le mafai ona fa’amanino atu ia Filisi ona aia tatau, ona o le fa’asuaava.  Ae na iloa mulimuli ane e leoleo, o Filisi e i lalo ifo ona tausaga ma tausaga fa’atulafono e mafai ai ona tagofia i le ‘ava malosi.

Na molia loa o ia i le Faatupu Vevesi i nofoaga faitele faapea ma le tagofia o le ‘ava malosi, ae le i atoa tausaga faatulafonoina e fa’ataga ai lea tulaga. 

O le moliaga o le fa’atupu vevesi, e mafai ona fa’asala ai le ua molia, i le ono (6) masina i le falepuipui, po o le sala tupe e i le va o le $150 ma le $500; po o fa’asalaga uma e lua.   Ae i le moliaga o le tagofia o le ‘ava malosi, e mafai ona nofosala ai le ua molia, i le falepuipui i le ono (6) masina, po o se sala tupe e $500; po o fa’asalaga uma e lua.

E $300 le tinoitupe faatulagaina e mafai ona tatalaina ai le ua molia, mai i le falepuipui e fa’atali ai lona fa’asalaga.

O lo o ua taofia nei Filisi i le falepuipui mo fanau talavou.

JOSEPH TAYLOR

O le aso 15 o Tesema, 2023 na valaau ai Deon Taylor i le ofisa a leoleo i Tafuna (TPS) e uiga i lona tama, o Joseph Taylor, o lo o fa’atupu vevesi i lo latou fale i Fagaima.

Sa ta’ua e Taylor, ua le mafai ona momoe si ana fanau, aemaise le pepe fou, ona ua alu le po atoa o faapisa lona tama, ona o le fa’asuaava. Sa ia ta’ua foi, le palauvale o lona tama ma sasa ia le latou fale i se samala.  O le mafuaaga lea na ia valaau ai i le TPS.

Na aveina e leoleo ia Taylor matua ma molia o ia i le Faatupu vevesi i totonu o lona aiga, o se moliaga e mafai ona faafalepuipui ai o ia i le o’o atu i le sefululima (15) aso, po o se sala tupe e $300; po o fa’asalaga uma e lua.

E $300 le tinoitupe ua faatonuina e totogi, ina ia mafai ona tatala i tua ia Joseph Taylor, e faatali ai lona faamasinoga.

RAYMOND FAALOUA

O le 7:00 i le po o le aso 12 o Tesema, 2023, na valaau ai le susuga Jerry Faaloua i le ofisa leoleo i Fagatogo (FPS) e lipotia ai Raymond Faaloua, ona o le faapisa i luma o lona fale.

Ina ua taunuu leoleo sa va’aia Raymond o lo o palauvale agai i fale o tuaoi.  Ma ina o lokaina mai o ia e leoleo, sa vaaia ni fagu pia o ta’atitia i ona autafa ma na sogia e leoleo ia lona manogi pia.

Sa faamatala e Jerry i leoleo, sa ia lagonaina mai lona tausoga (Faaloua) o lo o palauvale agai i le fale o ona tuaoi ma na alu atu e vaai po o le a le mea o tupu, ae na manatu e sili ai ona le a’afia ai o ia.

Ua molia nei Raymond i le moliaga o le Faatupu vevesi i nofoaga faitele, lea e mafai ona fa’afalepuipui ai i le ono (6) masina, po o se sala tupe e $500; po o fa’asalaga uma e lua.

E $500 le tupe fa’atulagaina e mafai ona tatala mai ai Raymond mai i le falepuipui, e fa’atali ai lona faamasinoga. 

VANI VAEGA

I le aso 17 o Tesema, 2023 na valaau mai ai se tamaitai i le ofisa a leoleo i Tafuna (TPS) e lipotia ni alii se toalua o lo o fufusu i luma o le pakaga a le TSM.

Ina ua taunuu atu leoleo i le nofoaga na tupu ai le fa’alavelave, na feiloai ai ma le susuga ia Vani Vaega, lea na masalomia na amataina le fusuaga.  Faapea ma se ave taxi e suafa ia Simiona Savelio.  Ma aveina uma i la’ua i le ofisa a leoleo e fa’aauau ai a latou suesuega.

Sa faamatala e Savelio i leoleo e faapea, na alu atu Vaega ma fesiligia o ia po o le a lana mea sa fai i lona (Vaega) i lona fale, i le po ua mavae.  Na tali mai iai Savelio, na alu atu e avatu sana pasese mai Vaitogi.  Na ta’ua e Savelio, le taumafai o Vaega e tatala le faitoto’a o lana taxi ae ina ua le mafai, sa ia tago loa ua tatu’i le fa’amalama pito i tua o lana taavale.  Sa ta’ua Savelio, ina ua au atu lima o Vaega, na amata loa ia tatu’i ia foliga o Savelio ma afaina ai lona laugutu pito a lalo.

Ae i le fa’atalanoaga o Vaega, sa ia fa’amatalaina i leoleo, o lona taumafai e tatala mai le faitoto’a o le taxi a Savelio, na tau ai lona lima i lona gutu.

Ua molia nei Vaega i le Faatupu vevesi i nofoaga faitele faapea ma le Fa’ao’olima i lona tulaga e tolu.

O le moliaga o le faatupu vevesi, e mafai ona nofosala ai se tasi i le falepuipui i le ono (6) masina, po o se sala tupe e $500; po o fa’asalaga uma e lua.  O le moliaga o le fa’ao’olima, e mafai ona fa’afalepuipui ai se tasi i le o’o atu i le tasi (1) tausaga, po o se sala tupe e $1,000; po o fa’asalaga uma e lua.

E $500 le tinotupe fa’atulagaina e mafai ona tatalaina ai le ua molia mai i le falepuipui, e fa’atalitali ai lona fa’amasinoga.