POU TIUTE A LEOLEO

Pago Pago - AMERIKA SAMOA

TOATAMA’I LE TAMA O LE AIGA I LE TV FOU AE LAVEA AI SI TINA

Ua molia nei se tamaloa i le fa’ao’olima i lona to’alua ma fa’afefe o ia i se agaese, ona o se TV fou na fa’ato’a fa’atau mai.  Ae na ta’ua e le tina, e na te le malamalama pe aisea na le fiafia ai le tama o le aiga i le TV fou.

O le po o le aso 28 o Novema, 2023, na valaau atu ai se tina i le ofisa a leoleo i Fagatogo, e lipoti atu iai le fasia o ia e lona toalua ma fa’afefe o ia i se agaese.

Sa malaga atu sui malu o le maota o lenei tina ma fa’atalatalanoa ai e tusa ai ma lenei fa’alavelave.  Sa fautuaina e leoleo ia le valaauina o le vaega a le EMS mo le togafitia o manu’a a le tina, ae peitai, sa te’ena e le tina lea tautua.  Ae sa faamatala e le tina  i leoleo, sa le fiafia lona toalua, le susuga ia Filemoni Taleni, i le latou TV fou na fa’atau.  Ma na ta’ua e le tina, ona o lona le amanaia o le tomumu a lona to’alua e uiga i le TV, sa faateteleina ai lona to’atama’i.

Sa ta’ua e le tina, le palauvale atu o le tama o le aiga ia te ia, ma tau’ai solo ia aluga.  Ae ina ua fai atu iai le tina ua ova le le mafaufau, e pei ona ta’ua i fa’amaumauga a le malo, sa liliu mai Taleni ma tu’i le tau’au taumatau o lona to’alua.  Ae ina ua fai atu le fafine o le a valaau leoleo, na ta’ua e le fafine le tu’iina fa’alua e lona toalua, o ona foliga i le itu taumatau, ona ia a’apa atu lea ua u’u mai lana agaese ma fa’afefe ai o ia.

Na faamatala foi e le tina, na savali ese atu lona toalua mai lo latou fale ma se ato fa’afafa.

Sa taumafai leoleo e saili ia le ua molia, ae peitai, e le i mauaina o ia.  Ae sa maua e leoleo ia le agaese lea na fa’alala i le tina o le aiga.

O lo o ua molia nei Filemoni Taleni i moliaga e tolu, e aofia ai le Faatupu Vevesi i totonu o aiga ma le Fa’ao’olima i lona tulaga e tolu.  O le moliaga o le Faatupu Vevesi e mafai ai ona fa’afalepuipui se tasi i le o’o atu i le sefululima (15) aso, po o se sala tupe e i le va o le $150 ma le $300; po o fa’asalaga uma e lua.  Ae o le moliaga o le Fa’ao’olima i lona tulaga e tolu, e mafai ona nofosala ai se tagata i le falepuipui i le o’o atu i le tausaga e tasi (1), po o se sala tupe e $1,000; po o fa’asalaga uma e lua.

E $1,000 le tinoitupe faatulagaina e mafai ona tatalaina ai Taleni i tua mai i le falepuipui, e fa’atali ai lona fa’amasinoga.

MOLIA SE ALII I LE FA’AOOLIMA I TAGATA O LE AIGA AE TAUMAFAI AI E PULE I LONA OLA

O le afiafi o le aso 12 o Tesema, 2023 na valaau ai se tamaitai i le ofisa a leoleo i Tafuna, mo se fesoasoani ona o lona tuagane, o lo o fa’asuaava ma fa’avevesi i totonu o le latou aiga.  Sa ta’ua foi e le tamaitai, o lo o taumafai lo latou aiga e taofiofi lona tuagane mai i lona pule i lona ola.

Ina ua taunu’u leoleo i le fale o le aiga sa tupu ai le fa’alavelave, na fa’asino iai e le tamaitai lea na valaau i le ofisa a leoleo, ia le mea o iai lona tuagane, ma sa molimauina e sui malu o le malo ia le taumafai o lea alii, e sisi lona ua i se maea.

Na ave faapagotaina loa e leoleo ia le susuga ia Sila Felise ma sa molimauina foi e leoleo le manogi pia o le alii.

Sa fa’atalanoa e leoleo ia le tuafafine a Felise i lo le nofoaga na tupu ai le fa’alavelave ma sa ia faamatalaina i leoleo, o le 6:00 i le afiafi o lea lava aso, na inu ai pia a lona tuagane, ma ia ona tu’i ina lona ‘nephew’ e aunoa ma se agasala a lona ‘nephew’.  E le gata i lea, na taumafai foi Felise e togi lona ‘nephew’ i se ma’a ma faafefe o ia i se agaese.  Na ta’ua foi e le tuafafine o Felise, le fa’ateteleina o le ita o le ua molia ma amata ona faafaigata ona taofiofi.  O le mafua’aga lea na ia valaau ai loa le ofisa a leoleo.

Na ta’ua foi e le tuafafine a Felise, le taumafai o lenei alii e pule i lona ola ona ua ia manatu, e le o lelei le faiga o ia e lona aiga.

Sa le i mauaina e leoleo ia le ‘nephew’ i lea afiafi mo sana faamatalaga.

Ae ua molia nei Felise i moliaga o le Faatupu vevesi i totonu o aiga, ma moliaga e lua o le Fa’ao’olima.  O le moliaga o le Faatupu vevesi e mafai ai ona nofosala se tasi i le falepuipui i le o’o atu i aso e sefululima (15), o se sala tupe e i le va o le $150 ma le $300; po o fa’asalaga uma e lua.

O le moliaga o le Faaoolima i lona tulaga e tolu, e mafai ona nofosala ai se tasi i le falepuipui i le o’o atu i le tausaga e tasi (1), o se sala tupe e $1000 po o fa’asalaga uma e lua.

Ma le moliaga o le Fa’ao’olima i lona Tulaga e tolu, vaega C o solitulafono; e mafai ona faafalepuipui ai se tasi i le o’o atu i aso e sefulu lima (15) po o se sala tupe i le va o le $150 ma le $300; po o fa’asalaga uma e lua.

E $1,000 le tinoitupe fa’atulagaina e mafai ona tatalaina ai i tua le ua molia, e fa’atali ai lona fa’amasinoga.