Telefoni mai i Savaii se tina-lipoti le fusuaga a lana fanau tama i AS

Pago Pago - AMERIKA SAMOA

E tusa ai ma fa’amaumauga a le faamasinoga, o le aso 14 o Tesema, 2023 na maua mai ai se vala’au, a le ofisa leoleo i Tafuna, mai i se tina loto mafatia i Savaii, mo se fesoasoani ona o lo o fasi e lana tama matua lona uso laititi, i Malaeimi.

O lea ua lokaina ai nei le alii matua, i moliaga i lona fa’ao’olima i lona uso laititi, a’o la e i fafo o la matua.

O moliaga ua fa’asaga nei i le uso matua, e aofia ai le Fa’ao’olima lima i lona tulaga e lua ma le Faatupu vevesi i totonu o le aiga.  O le moliaga o le fa’ao’olima, e mafai ona faasala ai se tasi i le falepuipui, e o’o atu i le lima (5) tausaga, po o se sala tupe; po o fa’asalaga uma e lua.

O le moliaga o le faatupu vevesi, e mafai ona faasala ai se tasi i le falepuipui, e o’o atu i le lima (5) tausaga, po o se sala tupe; po o fa’asalaga uma e lua.

O le a le ta’ua igoa o le ua molia ma le ua a’afia i lenei mataupu, ona o le puipuiga i le alii talavou).

Ina ua maua mai le vala’au a le tina, sa faapea loa ona agai atu leoleo e su’esu’e lenei mataupu, ma fetaui ai ma le uso laititi ma ia fa’amatalaina ai le mea na tupu.  Sa ta’ua e lenei alii, le fasiina o ia e lona uso matua i se pa’u ta’avale ma manu’a ai le itu tauagavale o lona ua.

Sa pu’eina e leoleo ata o le manu’a o le uso laititi.  Ma sa ta’ua foi e lenei alii talavou, i leoleo, le fa’aleagaina e lona uso matua o le ta’avale a o la matua.

O lo o ua ta’ua i fa’amaumauga a le faamasinoga, le logoina o le vaega a le EMS e tusa ai ma manu’a o le alii talavou ma sa faatonuina ai loa lenei alii talavou i luma o lona ‘Aunt’ ina ia malaga atu i le ofisa a leoleo.

O se taimi mulimuli ane, na vaaia ai e leoleo le agai atu o le ua molia, i lo latou fale, ma lokaina mai ai o ia ma aveina atu loa i le ofisa a leoleo i Tafuna mo nisi suesuega.

O lo o ta’ua i fa’amaumauga a le faamasinoga, sa fa’amatalaina e le uso matua i leoleo, ina ua taunu’u i le ofisa a leoleo, na fa’alua ona ia vala’au atu i lona uso laititi e sau i le fale.  Ae na fa’ate’ia o ia ina ua savali atu i le mea na iai lona uso laititi, ae tu’i o ia e lona uso laititi.

Sa faamatala e le uso matua, na fiu lava e taofiofi lona uso, ae ta tu’i mai lava o ia e lona uso laititi.

I le molimau tusia a le uso laititi, sa ia ta’ua ai e faapea, na valaau atu lona uso matua e sau i le fale ona e le mana’o e tafao i le fale o le latou tuaoi.  Ma o lona toatama’i tele, na ia oso mai ai i lona uso matua, ma avau ai loa a la fusuaga.

O lo o ta’ua foi i fa’amaumauga a le malo e faapea, e le i manatua e le alii laititi pe na faapefea ona manu’a; ae pau le mea sa ia manatua, na u’u e lona uso matua ia se pa’u ta’avale.

Sa faamatala e se molimau i lenei mataupu e faapea, o lona agai atu i lona fale ina ua manava mai i galuega, na ia molimauina ai le fusuaga a le au uso lea, ma sa ia molimauina foi le tu mai i luga o le uso matua ma ta lona uso laititi i le pa’u ta’avale, ma tau i le itu tauagavale o ona foliga.

E $5,000 le tinoitupe ua fa’atulagaina e mafai ona tatalaina mai ai le ua molia mai i le falepuipui, e fa’atali ai lona fa’amasinoga.