E FAI O LENEI AE O LENA

O LE TEINE O LILI MA MEA NA TUTUPU I LE KERISIMASI

Na taumafai lava le teine o Lili ina ia aua ne’i moe, ae fa’atali le sau a Santa Claus e aumai lana meaalofa o le Kerisimasi.

Ua lata i le tu lua o po ma ao, a o loma le Kerisimasi ma ua le ma nofo lelei le teine o Lili, i le fia vaai ia Santa Claus.

Ua amata ona popole Lili ma ua amata ona toe ia toe to manatu i le tausaga atoa, pe sa teine lelei.  Aua afai sa le i usitai i ona matua, o lona uiga e le sau Santa Claus e aumai sana meaalofa.

A’o fa’agasolo mafaufauga a Lili, ae ona fa’alogoina loa se pa’o mai tua o le fale.

Ua leiloga se taga a Lili e fai.  Ua tamo’e faatopetope atu i le faitoto’a i tua o le fale ma tatala.

Ae tilotilo atu Lili, e le o Santa Claus lea e tu mai tua o le latou fale.  Ae ua matuai fa’ate’ia o ia i le vaai atu, o le manu toso ta’avale a Santa la e tu mai i tua o le fale.

Na tapuni vave lava e Lili le faitoto’a o le fale ma tamo’e faatopetope i lona potu e aumai lona peleue, aua ua malulu le po.

Ma savali atu loa i fafo i le mea o tu mai ai le manu a Santa Claus.

Na fai sina fefe o Lili ona e va’ai atu i le tele o le tino o le manu.

Ua soso atu lemu lava Lili i le manu ma ia iloa ai, e pei lava o iai se mea o fa’aletonu i le manu.  Ua fa’ata’amilomilo nei Lili i le manu e va’ai po o iai ni ona manu’a, ae na te le i va’ai i se manu’a, ae na o le sela leotele o le manu lea na te fa’alogoina.

Ona manatua lea e Lili, o taimi uma lava e malosi ai lana ta’alo ona sela lea, ae alu lona tama aumai sana ipu vai e inu ai.

Ua toe faatopetope atu nei ia Lili i totonu o le fale e aumai se ipu vai a le manu.  Ae manatua e Lili, e leai ni lima o le manu e na te mafai ai ona u’uina le ipu vai.

O lea na ia ligiina ai se vai i totonu o se ipu fa’aofuofu ma si’i mai i fafo, ma tu’u lemu lava i lalo i luma tonu o le gutu a le manu.

E le i atoa se minute na punou ai le manu i le ipu vai, ae vaai atu Lili ua leai se mea.

Ua va’aia e Lili e pei ona toe maua e le manu lona malosi.  Ua toe ea a’e i luga le manu ma tilotilo mai ia Lili, ae o le taimi lena ua soso atu lemu lava Lili i le manu.

Ua va’aia e Lili le punou mai o le manu ia te ia, e pei o la e fai mai, “Fa’afetai mo le ipu vai”.

Ua faapena foi ona punou atu le ulu a Lili i le manu.

Ua liliu nei le manu ma tilotilo i se mea o ta’atia i luga o le vao ma ina ua savali atu iai Lili, na ia iloa atu o le taga o lo o tumu i ni meaalofa.

Ua oso atu nei Lili ma su’e pe maua ai lana meaalofa, ae paga lea.  Na uma mai i fafo ia meaalofa, ae leai se meaalofa o tusia ai le igoa a Lili.

Na va’aia le punou o le ulu a Lili i le faanoanoa.  O le gase o le manu, na ea atu ai le ulu a Lili ma ona vaaia le taumafai a le manu e kiki atu se meaalofa ia te ia.

Ua piki i luga e Lili le meaalofa ma ia faapea mai, “E le o sa’u meaalofa lea.  O le meaalofa a Siaosi.”

Ae ua na o le tu o le manu ma tilotilo atu ia Lili.  “E te mana’o e fesoasoani atu ia te oe e kiliva le meaalofa a Siaosi?” o le fesili atu lea a Lili.  Na te’i Lili i le lulu mai o le ulu a le manu, “Ioe”.

Na malamama Lili, o lea e mana’o le manu, e la te o e kiliva meaalofa ia o lo o i totonu o le taga.

Ua tago atu nei Lili ma si’i mai le taga meaalofa ma tu’u i luga o le papatua a le manu.  Ae ua faapea atu Lili i le manu, “Ou te le iloa le mea e nonofo ai tamaiti ia.”

Ua na o le tilotilo mai o le manu ia Lili, e pei o lo o fai mai, “Aua e te popole.”

IA MANUIA TOE FUAFUAGA O LENEI VAIASO MA IA MANUIA LE TAUSAGA FOU!