Tala o le Pasefika

PASEFIKA

FA’AAUAU PEA LAPATAIGA MO LOLOGA I AMERIKA SAMOA

I le taeao ananafi na fa’aauauina pea ona tumau lapataiga mai i le Ofisa o le Tau i Amerika Samoa, i lologa tetele i totonu o le teritori, ina ua fa’aauau pea ona mamafa timuga i le aso ananafi.

Sa amata mai lapataiga o lologa tetele i totonu o le teritori i le po o le aso Gafua, Tesema 24, 2023, fa’atasi ai ma lapataiga mo va’a laiti, ona o le sou o le sami.  E le gata i lea, sa faapea foi ona fa’asalalauina ia lapataiga mo le pa pa o faititili.  Lea sa fautuaina mai ai e le Ofisa o le Tau a Amerika Samoa ia le mamalu o le atunu’u ina ia nonofo i totonu o maota ma laoa, pe a fa’alogoina le pa pa o faititili.

Sa iai foi i le taeao ananafi ia ni lapataiga i savili malolosi, e agi mai i le itu i Saute o le teritori. 

FA’ATAUNUUINA SE SAUNIGA FA’AMANATU MO NGAIRE A’ASA TUSI

O le afiafi o le aso Sa, Tesema 24, 2023, na faapotopoto ai nisi o uo ma aiga o le tina ia Ngaire A’asa Tusi, e manatuaina lona olaga ae o se avanoa e faamafanafana ai le tasi i le tasi, i le to’esea fa’afuase’i o lenei tina Samoa.

Sa mauaina le tino maliu o Ngaire e 31 tausaga i se paka i Tacoma, i Uasigitone, i le taeao o le aso Gafua, Tesema 18, 2023.

Sa ta’ua e le uso a Ngaire, o Natasha Aasa, i lea fa’atasiga, e le o se fuafuaga lea a le Atua mo lona uso.  E to’afitu se fanau a Ngaire, e i lalo uma o le ta’i 10 tausaga.  Na ta’ua e Natasha le alofagia o si ona uso ma o le a misia o ia.

E tusa ai ma se ripoti a leoleo mai i Tacoma, o lo o fa’aauau pea a latou su’esu’ega, ae e o’o mai lava i le taimi nei, e le o toe maua se tala po o ua molia seisi i lenei fa’alavelave, e pei ona sa fa’amaonia i le saunoaga a Natasha i lea afiafi.

I le saunoaga a le to’alua a Ngaire, le susuga ia Faatasiga Jr. Tusi, sa ia u’unaia ai aiga ma uo ina ia fa’atasi ma aiga, alofa ia i latou ma puipui ia i latou, ona e leiloa lava fuafuaga a le Atua.  Sa ia fa’aleoina lona alofa i matua ma aiga o Ngaire.  Ma sa ta’ua foi lona fa’alagolago malosi i le Atua.  Sa ia fa’aleoina foi lona alofa tele i le tina o si ana fanau, lea ua maliu fa’afuase’i.

TOE ILOILO LE FA’ATE’AINA O SE ALII LEOLEO I SAMOA

I se ripoti mai i le Samoa Observer, o lo o ta’ua ai le iloiloina e le Komesina a Leoleo pe ono fa’aleaogaina se tusi fa’ate’a, ua tu’uina atu i se tasi o alii leoleo sinia, lea na fa’ate’a ona o lona faia o se suesuega e aunoa ma se fa’atagana mai i taitai o le ofisa a leoleo, i se fa’alavelave tau ta’avale ua fai sina umi o ta’atia i le ofisa a leoleo.

O le masina ua mavae na fa’ate’a ai ia le alii leoleo su’esu’e o Lio Fa’ataumalama Auava, ina ua ia ioe i moliaga e fa, i lona faia o se su’esu’ega i le maliu o Tuuau Fa’asavalu, e aunoa ma se fa’atagana.  E 10 aso na tu’uina atu ia Lio, e tali mai ai i le fa’ate’aina o ia.

Ae ua fa’aalia mai e le Komesina a Leoleo, le susuga ia Auapaau Logoitino Filipo, o lo o toe Iloilo nei e lo latou ofisa lenei mataupu, i le fa’ate’aina o Lio.

SU’ESU’E E LEOLEO FITI IA LE MAFUAAGA O LE MALIU  O SE ALII 

Ripotia mai i le malo o Fiti, le lokaina o se ali’i o lo o masalomia i le maliu o se tamaloa, i le taeao o le aso Sa, Tesema 24, 2023.

O lo o iai se talitonuga a leoleo Fiti, na tula’i mai se fa’afitauli i le va o le ua molia ma le ua maliu, ua mafua ai lenei fa’alavelave.

O lo o fa’atalitali nei faaiuga o ni suesuega i le tino maliu, e fa’amautu ai le mafua’aga tonu o lenei fa’alavelave.