Sologa lelei feutagaiga a le Medicaid ma le falemai a Queens i Hawaii

Pago Pago - AMERIKA SAMOA

I se fa’aaliga mai i le Faatonusili o le ofisa a le Medicaid a Amerika Samoa (ASMSA), le faletua ia Sandra King Young, ua ia ta’ua ai le sologa lelei o a latou feutagaiga ma le falema’i a Queens i Hawaii, e mafai ai ona agai atu gasegase mai i le falemai a le teritori, mo a latou talavai.

Na ta’ua e Young, afai ae i’u manuia a latou taumafaiga, o se tala fiafia lea mo le teritori.

O lo o ta’ua foi e le ASMSA i sana fa’aaliga fa’alauaitele i le aso 20 o Tesema, 2023 e faapea, i le tausaga e 2014, na taofia ai e le falemai mai Hawaii, ona toe taliaina ni gasegase mai i Amerika Samoa, ona o tulaga fa’afetonu i le totogia o pili a Amerika Samoa, i tausaga ua tuanai.

Ma sa fiu e toe sailia se auala e toe talia ai gasegase mai Amerika Samoa, ae peitai, sa le i faamanuiaina ia taumafaiga.  Ae peitai, ona o se fesoasoani a le afioga i le Kovana, Lemanu P. S. Mauga, ua lata ina toe manuia ai nei taumafaiga.

O le vaiaso ua mavae, na toe feiloai ai Young ma pulega a le falemai a Queens, ma sa faapea ona ia taliaina ai ni suiga fou i se maliliega, e mafai ai ona agai i luma lenei taumafaiga, ina ia mafai ona iloiloina ma pasia mai e le pulega a Queens.

Sa saunoa foi Young, ina ua toe tatalaina tuaoi i le 2022, sa o latou toe o’o atu ai i le pulega a le falemai i Honolulu, e tusa ai ma se konekerate, ae peitai, sa le’i manuia a latou taumafaiga, se’ia o’o ina maua se fesoasoani mai i le Kovana i le masina o Iulai.

Na fa’aalia e Young lona agaga fa’afetai i le afioga i le Kovana, ona o lea ua mafai ona toe amataina feutagaiga ma le falemai mai I Honolulu, ma i masina na se’i mavae atu, sa faapea ona maua le avanoa latou te soalaupuleina ai se maliliega.

Sa fa’aalia foi e le Faatonusili lona fiafia tele ona o lo’o fa’agasolo lelei a latou feutagaiga ma le falemai i Hawaii.

Na iai se faamoemoega a Young e sainia se maliliega i le latou fonotaga i le vaiaso ua mavae, ae peitai, ona o lenei falemai, o se falemai tele ma e tele ona vaega e ao ona uia, o lea ua fai ai sina umi ona fa’amautu lenei fuafuaga. 

E tusa ai ma ripoti a nisi o vaega fa’asalalau, ua ta’ua ai e faapea, afai ae taliaina ma sainia e le pulega a le falemai i Hawaii lenei maliliega, o le a mafai loa ona toe aga’i atu gasegase a LBJ, i latou o lo o agava’a i le polokalama o le Medicare ma le Medicaid, mo talavai i Hawaii.

I le taimi nei, na o le falemai a le ‘Adventist Castle’ i Hawaii, o lo taliaina gasegase mai Amerika Samoa, i latou o lo o agava’a i le polokalama a le Medicaid.

I se tala mai a Young i le Samoa News, o lo o sologa lelei mea uma e tusa ai ma lenei faamoemoe, ma o lo o iai se manatu maualuga o le a mafai ona i’u manuia a latou feutagaiga ma Queens i le masina o Fepuali po o Mati, o le tausaga fou.