Fa’ai’u leaga le tafaoga a se ulugalii sa faia i le falekalapu

Pago Pago - AMERIKA SAMOA

I le aso 3 o Tesema, 2023, na valaau atu ai se tina i le ofisa a leoleo i Tafuna ma ripotia ai le fa’ao’olima o lona to’alua ia te ia, ina ua mae’a se la evaga na faia i se tasi o falekalapu.

(O le a le lomia suafa o lenei ulugalii ona o fanau o lo o a’afia i lenei mataupu).

E tusa ai ma fa’amaumauga a leoleo, na valaau atu se tina i le ofisa i lo latou ofisa, ma ripotia ai le fa’ao’olima o lona to’alua ia te ia, i lo latou aiga i Mapusaga Fou. Ina ua taunu’u leoleo i Mapusaga Fou, sa fa’ate’ia leoleo faapea ma tuaoi i se tina o lo o palauvale leotele i totonu o le fale.

Sa aga’i atu loa iai leoleo ma faatonuina le mafine lea e tatala le faitoto’a.  E tatala lava la le faitoto’a a lenei mafine, ae o lo o fa’aauau lava lana sauniga o le palauvale agai i seisi tina, lea na fa’ailoa mulimuli ane, o le tina a lona to’alua.

Ina ua fesiligia e leoleo ia le tina lea sa tatalaina le faitotoa, po o ai o ia, sa ia tali mai o ia o le toalua a le ua molia.  Sa faatonuina loa o ia e leoleo ina ia fai ni ona laei, ona e tatala mai le faitoto’a, o lo o sulu lona solo taele.

Ae na va’aia e leoleo ia ni ma’osia i lona ua, ona lima ma lona fatafata.

O lo o ua ta’ua foi i faamaumauga a leoleo, le aveina atu o lenei tina i lo latou ofisa mo le togafitiga o ona manu’a ma le fa’aauauina o su’esu’ega o lenei mataupu.

A’o latou agai atu i le ofisa a leoleo i Tafuna, sa faamatalaina e lenei tina, na tu’i fa’alua ona foliga e lona toalua, ma sa mau foi i lona ua, ma taumafai e titina o ia, ae sa ia taumafai e u’una’i ese. 

Sa ta’ua foi e lenei tina, e tupu lenei fa’alavelave, ae o lo o iai sona alo e ono tausaga le matua.

Sa faamatala foi e lenei tina e faapea, na mafua ona ‘ava’avau i le tina o lona toalua, ona e na te ‘kavakava’ lava i lana tama.

A’o agai pea le ta’avale a leoleo i le ofisa i Tafuna, sa fa’alogoina e leoleo le malosi o le manogi pia mai i le tina.

Sa ta’ua i fa’amaumauga a leoleo, le fa’atalanoaina o le tamaloa ma sa ia ta’ua e faapea, na mana’o lona to’alua e la te o e tafafao, ma o lea na o ai i se fale kalapu, ae ona vaaia ai le alii lea sa uo muamua ma lona toalua.  Ae ina ua sisiva lona to’alua ma lana uo muamua lea, o iina na ita ai loa ma fai iai e ‘fiafia la’ua’, ma ia alu ese loa mai i le falekalapu.

Sa ta’ua foi e le ua molia, sa piki ina o ia ma lona to’alua, e se tasi o ana uo ma momoli la’ua i le fale, ma o iina na amata ai le la misa.

Sa faapea ona lokaina le tamaloa ma molia i moliaga e tolu, e aofia ai le Fa’ao’olima i lona tulaga e tolu faapea ma le moliaga o le faia o ni gaioiga e ono a’afia ai le saogalemu o se tamaititi.

E $1,000 le vaegatupe ua faatonuina le ua molia, e totogi, e mafai ona tatala mai ai i tua e faatali ai lona faamasinoga.

O moliaga muamua ma le lona lua, i le faaoolima, e mafai ona faasala ai le ua molia, i le falepuipui mo le tausaga atoa, po o se sala tupe e i le va o le $150 ma le $1,000; po o fa’asalaga uma e lua.

Ae i le moliaga lona tolu, i le faia o se gaioiga e ono a’afia ai le saogalemu o lo la alo, e mafai ona fa’asala ai le ua molia i le tasi tausaga i le falepuipui, po o se sala tupe e i le va o le $150 ma le $1,000; po o fa’asalaga uma e lua.

Ina ua suesueina e leoleo ia le tina i totonu o lo latou ofisa, sa tete’e le tina i le faia o sana faamatalaga pe tali foi i fesili a leoleo.  Sa mafai ona tu’uina atu o ia e toe fo’i i lona aiga, ona o lo o manaomia ona ia tausia lana fanau.

LOKA SE ALII I LE NOFONOFO TELENOA I SE FALE FAATALI PASI

Na lokaina e leoleo ia se alii e 36 tausaga le matua mai i le afioaga o Faga’alu, i le aso 4 o Tesema, 2023, ina ua ripotia mai lona nofonofo telenoa i se fale fa’atali pasi i luma o lona fale.

Ua molia nei le susuga ia Jared Kupu i le Faatupu vevesi i nofoaga faitele; o se moliaga e mafai ona faasala ai se tasi i le falepuipui mo le ono masina, po o se sala tupe e $500; po o faasalaga uma e lua.

E le gata i lea, o lo’o ua molia foi Kupu i le fa’aalia o ona itutino sa i tagata; lea e mafai ona nofosala ai i le falepuipui mo se tausaga e tasi, po o se sala tupe e $1000; po o faasalaga uma e lua.

Fa’atasi ai ma le molia o ia i lona faia o se gaioiga e ono a’afia ai le saogalemu o fanau iti; lea e mafai ona nofosala ai i le falepuipui mo le tausaga e tasi, po o se sala tupe e $1,000 po o fa’asalaga uma e lua.

O le tina o le ua molia na vala’au i le ofisa o leoleo i Fagatogo, i le aso 4 o Tesema 2023, ma ripotia ai le nofonofo o le ua molia i le fale fa’atali pasi .  Sa ta’ua e le tina o le ua molia, sa amata ona pisa lona alo i luma o le latou fale, ae le malamalama se tasi i ana faamatalaga.  Sa ta’ua e le tina lona tulieseina o le ua molia, mai i le fale.

Sa faamatala foi e lenei tina le palauvale o le ua molia, i tagata sa o latou fetaui, a’o savali atu aga’i i le fale faatali pasi lea e i luma o le latou fale.  E le gata i lea, sa ia va’aia le nofonofo o le ua molia, i le fale faatali pasi, ua leai uma ni ona lavalava, ae o lo o feoai tagata i luga o le auala.

Sa ta’ua e lenei tina, na alu atu Jared i le fale, i le aoauli, ae e le o iai le tina i le fale, ma ta’ele telenoa i fafo o le fale, ae o lo o iai lana fanau teine e 25 ma 35 tausaga le matutua, faapea ma se pepe e tasi le tausaga, i le fale.

Ina ua toe fo’i atu lenei tina i le fale na ia va’aia Jared i tua o le fale, ma ia tulieseina o ia.

O lo o iai se talitonuga, e tusa ai ma fa’amaumauga a leoleo, na fo’i atu le ua molia i le fale fa’atali pasi ma palauvale atu i lona tina, ma o iina na valaau ai loa le tina i le ofisa a leoleo mo se fesoasoani.

Sa faamatala foi e le tina, le fa’afefe o ia e Jared, i se naifi ma na faapea atu, e iai le taimi e na te faia ai se mea i le tina ma lana fanau teine.

Ina ua aveina atu le alii o Jared i le ofisa a leoleo mo le fa’atalanoaina, sa musu le alii e fai sana faamatalaga.

O lea na lokaina ai loa o ia i le toese i Tafuna e fa’atalitali ai lona fa’amasinoga.

E $1,000 le vaegatupe, e mafai ona tatalaina ai le ua molia, mai i le falepuipui.