TALA O LE PASEFIKA

PASEFIKA

I’U MANUIA TA’OTOGA A LE TAMAITAI PALEMIA O SAMOA

I se ripoti fa’asalalau a le nusipepa a le malo tuto’atasi o Samoa, o Le Savali, e tusa ai ma le fa’ata’otolia o le afioga i le Palemia a Samoa i gasegase o le tino, i se falema’i i Niu Sila, ua ta’ua mai ai le i’u manuia o ta’otoga a le afioga Fiame Naomi Mata’afa.

O se fa’aaliga mai i le sui Palemia, le susuga ia Tuala Tevaga Iosefo Ponifasio, na ta’ua ai le faimalaga ese atu o Fiame i atunu’u i fafo mo Fono Faavaomalo i le masina o Novema, fa’atasi ai le Fono Tele #28 a le lalolagi.

Ina ua mae’a ia fonotaga, sa faapea loa ona faimalaga atu Fiame i Niu Sila mo ana talavai masani, ma o iina sa faataunu’uina ai loa lona taotoga i lona a’ao.

Ua ripotia mai le fa’asolosolo manuia o Fiame ae o lo o manaomia sina taimi e malolo ai ina ia mafai ona toe atoatoa lona malosi ae e le i toe faimalaga i Samoa.

FINAU FAIPISINISI CNMI MO VISA MO TURISI MAI SAINA

O lo o ua ta’atia nei i luma o le afioga i le Kovana o le Atu Mariana (CNMI), ia se talosaga mai i fa’auluuluga o ni pisinisi tetele se lua a lea atunu’u, ina ia lagolagoina e le faigamalo ia le fa’avaeina ma le pasiaina o se polokalama ua ta’ua faaperetania o le “Economic Vitality & Security Travel Authorization Program” (EVS-TAP).

E pei ona ta’ua e le vaega a le Homeland Security a le CNMI, o lenei polokalama o le a mafai ai ona tatalaina le avanoa i tagata o le  atunu’u o Saina, ua mae’a ona iloiloina, ona faimalaga mai i le CNMI e aunoa ma le umia o ni VISA.

Sa ta’ua e le Komisi o Fefa’atauaiga a Saipan ma le Asosi o Faletalimalo a le atu Mariana i Matu, i la latou tusi sa fa’ao’oina atu i le susuga Arnold I. Palacios, le kovana a le CNMI, o le a avea lenei polokalama (EVS-TAP) ma vaifofo i se fa’afitauli o lo o tula’i mai ona o se polokalama o lo o fa’aaogaina i le taimi nei, lea o lo o fa’atagaina ai tagatanu’u o Saina, ona ulufale mai i totonu o le CNMI, o ni tagata turisi.

Ua faapea foi ona fa’ao’oina atu lenei talosaga i le Lutena Kovana, David M. Apatang, o le sui Faipule a le CNMI i le Konekeresi, o Gregorio Kilili Sablan, o le Peresetene o le Senate ia Edith Deleon Guerrero faapea afioga i Senatoa, ma le Fofoga Fetalai ia Edmund Villagomez atoa ai ma afioga i Fapule, ma nisi.

A’AFIA LUMANA’I O TAMAITAI TALAVOU I FITI ONA O LE FAAIPOIPO LAITI

Ua finau le fa’atonusili o le Faalapotopotoga mo Aia Tatau a Tamaitai ma Fafine (FWRM) i le malo o Fiti e faapea, ua avea le fa’aipoipo laiti o tamaitai o le atunu’u ma tulaga ua a’afia ai o latou lumana’i.

I se su’esu’ega lata mai nei i tamaitai i le va o le 20-29 tausaga, ua fa’aalia ai e faapea, e 12 pasene tamaitai mai i le itu i Matu ma le 9% mai i le itu i Sisifo o Fiti, e fa’aipoipo ae e le i atoa le ta’i 18 o latou tausaga.

Sa fa’aalia e Nalini Singh, o lenei tulaga ua a’afia ai le alualu i luma o tamaitai talavou ma limiti ai a latou avanoa.

 Ua ta’ua foi e Singh le soalaupuleina o lenei mataupu e le FWRM ma nisi o fa’auluuluga o ofisa ma matagaluega ale malo, o taitai ma fa’alapotopotoga faale lotu faapea ai ma nisi o faalapotopotoga a le atunu’u, o lo o talitonu ua tatau ona taofia lenei tu ma aganu’u, o le faamalosia o alo ma fanau teine talavou, e faaipoipo.