Fa’alua ona taofi e leoleo i luga o le auala, fa’alua foi ona maua ai fuala’au fa’asaina

Pago Pago - AMERIKA SAMOA

I le aso 21 o Novema, 2023 na taofia ai e leoleo ia le ta’avale a se alii e 30 tausaga le matua, e suafa ia Anderson Ta’ala ona o le saoasaoa o lana ta’avale, ae maua ai se vaega o fuala’au fa’asaina.

Ae o le aso 29 o Novema, 2023, na toe taofia ai foi le ta’avale a Ta’ala i luga o le alatele, ae o lo o ta’ua le toe maua ai foi o nisi vaega o fuala’au fa’asaina, lea e ta’ua o le Aisa.

 I le taofiga muamua o Ta’ala, sa molia ai Ta’ala i ni moliaga e 4;

O le moliaga muamua, e aofia ai lona umia fa’asolitulafono o se vaega o fuala’au faasina, o le Aisa, ma o se solitulafono e mafai ona nofosala ai se tagata i le falepuipui, i le va o le 5 ma le 10 tausaga, po o se sala tupe i le va o le $5,000 ma le $20,000; po o fa’asalaga uma e lua.

O le moliaga lona lua; o lona umia lea o se vaega o fuala’au fa’asaina, o le maliuana, lea e mafai ona nofosala ai se tasi, i le falepuipui, i le va o le lima ma le sefulu tausaga, po o se sala tupe i le va o le $5,000 ma le $20,000; po o faasalaga uma e lua.

Moliaga lona tolua; o le umia o se vaega o fuala’au fa’asaina (Aisa), ma le faamoemoe e fa’atauina atu i tagata; o se solitulafono e mafai ona faafalepuipui ai se tasi, i le va o le 5 ma le 20 tausaga, po o se sala tupe e le silia ma le $20,000; po o faasalaga uma e lua.

Ma le moliaga lona fa; o le umia o se vaega o fuala’au fa’asaina (maliuana) ma le faamoemoe e fa’atauina atu i tagata; o se solitulafono e mafai ona faafalepuipui ai se tasi, i le va o le 5 ma le 15 tausaga, po o se sala tupe e le silia ma le $20,000; po o fa’asalaga uma e lua.

E $20,000 ua faatulagaina e mafai ona totogi e tatala ai i tua Ta’ala mai i le falepuipui, e fa’atalitali ai lona fa’amasinoga.

FA’ALAVELAVE MUAMUA

I le aso 21 o Novema, 2023 a’o feagai sui malu o le malo ma tiute fai i luga o le alatele i Utulei, na taofia ai e leoleo ia le ta’avale a Anderson Ta’ala ma tapaina lona laisene aveta’avale.  Ae tali Ta’ala e le o ia te ia lana laisene i le taimi lena.  O lea na fa’ailoa atu iai e leoleo, o le a toso lana ta’avale i le ofisa a leoleo, ona o lo o ia fa’afoeina se ta’avale i luga o le alatele, e aunoa ma se laisene aveta’avale.

Sa fa’atonuina e leoleo ia Ta’ala ina ia ulufafo mai i lana ta’avale, ma o le a ave fa’apagota o ia, ma tu’uina atu sana sala tusia.  A’o talatalanoa leoleo ma Ta’ala, sa talosagaina e le ua molia ia leoleo pe mafai ona tu’u atu pea na o sana sala tusia ae aua le avea o ia i le ofisa o leoleo.

Ina ua fesiligia Ta’ala po o iai ni ana mea totino taua o mana’o iai, mai totonu o lana ta’avale, sa tali Ta’ala na o lana sikaleti (vape) ma lana telefoni.  

Na va’aia e leoleo i totonu o le ta’avale se paipa tioata, ma e foliga mai o iai se vaega o fualaau fa’asaina, o le aisa.

Ina ua fesiligia e leoleo ia le ua molia e uiga i le paipa tioata ma aisa, na tali Ta’ala, e le o ni ana meatotino.

Sa ave’ese e leoleo ia nei meatotino mai totonu o le ta’avale, fa’atasi ai ma se tama’i ato, ma se ato fa’afafa lanu meamata, lea na ta’ua e Ta’ala, e le o ni ana meatotino foi.

Sa aveina e leoleo ia Ta’ala i lo latou ofisa autu i Fagatogo, ma su’esu’eina ai o ia e uiga i le ta’avale lea na taofia ai o ia.  Sa tali Ta’ala, e le o sana ta’avale.  Ina ua su’esu’e e leoleo ia le laisene o le ta’avale i le ofisa a le OMV, na faamaonia mai ai le tagata e ana le ta’avale, o Fu Chen Zhao mai Alofau. 

I le fa’auauina o suesuega a leoleo, na faamaonia ai, o le ta’avale sa ‘rent’ ia Ta’ala ma o le a taeao lava lena na alu ai Ta’ala i le kamupani ta’avale lea e ana le ta’avale, ma totogi iai le $120, e toe fa’aopoopo ai aso o le ‘rental’.

Ua ta’ua i fa’amaumauga a le malo, e le gata i le tamai ato uliuli lea na va’aia e leoleo i totonu o le ta’avale, lea na iai i totonu se paipa tioata ma tama’i aisa, ae faapea foi ni tamai taga pepa iila, o iai totonu ni laula’au lanumeamata, o se sikaleti ta’ai o iai ma ni lau la’au lanumeamata, ma nisi taga pepa iila laiti e le o iai ni mea i totonu.

Na faapea foi ona maua e leoleo i totonu o le ta’avale ia se ipu ti e iai se tapuni, na maua ai i totonu ia ni tama’i tagapepa i’ila e tumu i tama’i aisa, faapea se paipa tioata na maua ai foi i totonu ia aisa.

Ina ua mae’a ona suesueina e leoleo ia le ta’avale a Ta’ala, na faapea loa ona logoina le vaega su’esu’e o Fuala’au Faasaina (VNU) mo se fesoasoani.  Sa o latou suesueina ia mea sa maua i totonu o le ato ma le ipu ti, ma fa’amaonia ai o ni vaega o fuala’au fa’asaina, o le Aisa ma Maliuana.

FA’ALAVELAVE LONA LUA

I le mataupu lona lua lea na toe taofia ai e leoleo ia Ta’ala i le aso 29 o Novema, 2023, na iloa ai e leoleo, o lo o iai se tusi saisai mo le ua molia.  Ae i le mataupu lona lua lea, ina ua tapa e leoleo ia le laisene aveta’avale a le ua molia, sa ia te ia lana laisene. 

Na aveina atu ia Ta’ala i le ofisa leoleo i Fagatogo, mo le fa’auauina o suesuega a leoleo.

Sa logoina foi e sui malu o le malo ia le vaega su’esu’e mo fuala’au fa’asaina (VNU) e tusa ai ma mea sa mauaina i totonu o le ta’avale a le ua molia, e aofia ai se paipa tioata na ta’atia i le foloa o le ta’avale i le itu a le aveta’avale.  E le gata i lea, na maua foi i totonu o le ta’avale ia se ato fa’afafa lanu uliuli, lea na fa’amaonia e Ta’ala, o lana ato.

Ina ua mae’a su’esu’ega a le vaega o le VNU, sa faamaonia ai le iai o fua’ala’au fa’asaina, o le Aisa, i totonu o le paipa tioata.

Ae e le i fesiligiaina Ta’ala, na mua’i su’esu’eina lona tagata e leoleo, ma maua ai se tama’i taga pepa i’ila, lea na faamaonia foi le iai o ni vaega o fuala’au fa’asaina, o le Aisa.

E ui ina sa tete’e le ua molia i le faia o sana fa’amatalaga, ae na ia fa’atagaina le suesueina o lana ato fa’afafa, lea foi na maua ai nisi o vaega o fuala’au fa’asaina ma ni tama’i taga pepa, o iai ni fuala’au mumu i totonu.

Sa faapea loa ona aveina Ta’ala i le falepuipui ae tu’uina atu lana ta’avale i lona to’alua.

O lo o molia Ta’ala i le mataupu lona lua i moliaga e lua, e aofia ai le umia fa’asolitulafono o fuala’au fa’asaina, faapea ma le moliaga o le umia fa’asolitulafono o fuala’au fa’asaina ma se faamoemoe e fa’atauina atu i tagata.

E $20,000 le tupe fa’atulaga e mafai ona tatala ai i tua le ua molia, e fa’atali ai lona fa’amasinoga.