TALA I VAIFANUA

Pago Pago - Pago Paho 

O LE PURINISESE MA LE KUSI SINASINA

I aso a la ua leva na iai se Purinisese, e fiafia lava e nofonofo ma tilotilo i fafo i lona faamalama maualuga ma matamata i le to’ulu mai o le kiona.  

O lenei purinisese, e na o le pau lea o le afafine a le Tupu ma le Masiofo o lea malo.  O lona uiga, ua fa’alagolago le lumana’i o le malo ia te ia.

I totonu o le maota o le tupu, e leai se mea e fa’asa mai i le Purinisese, o le a lava le mea e mana’o iai, e fai lava e le tupu ma le masiofo mo ia.  Ae pau lava le tulaga e fa’asa i le Purinisese, o le alu lea i fafo mai i le maota o le tupu.

O aso uma lava la, e nofonofo ai lava le purinisese ma tilotilo atu i fafo i le tafafao saoloto mai o tamaiti o le malo, ma mo’omo’o lava lona loto, i le fia alu atu ma ia e tamo’e solo ma ta’alo ma tamaiti o le malo.

E  na o le pau lava le mea a le Purinisese e fai, o le auai i ana aoaoga ma ta’alo i ana mea ta’alo i totonu o potu o le maota a le tupu.

I se tasi o aso, ina ua amata ona mou atu le tau mafanafana ma ua amata ona agi agi mai savili o le tau malulu, sa fa’alogoina ai e le purinisese le leotetele o kusi, ua amata ona felelei i le Saute e nonofo ai i atunu’u mafanafana, e faatali ai le toe mou ese atu o le tau malulu mai i le malo o le tupu ma le masiofo.

A’o nofonofo le Purinisese ma matamata i le felelei atu a nei manu, ae na faateia o ia ina ua tu se kusi i lalo tonu ifo lava o lona faamalama.  Na iloa atu e le Purinisese, e le matua tele le manu ma atonu ai na tau ai se pulufana a se fanam anu, ua mafua ai ona pa’u tonu lava i lalo o le faamalama a le purinisese.

Na va’ava’ai atu le Purinisese, a’o toe taumafai le manu e fa’aloloa ona apa’au ma taumafai e toe lele ese, ae paga lea, ua na o le ta’atiatia ua le mafai ona lele ese.  

E le’i umi ae va’ai atu le Purinisese, ua tamo’e mai se Alope ma u atu le kusi i lona gutu.  Ua oso atu nei le Purinisese ma tamo’e fa’atopetope atu i fafo e tuliloa le tamo’e ese atu o le Alope ma le manu i lona gutu.

Na matua’i le ano lava le Purinisese i le palapala o ona se’evae fou ma ua amata ona susu lona ofu talaloa i le kiona ma liu enaena i le palapala.  E tasi lava le mea o lo o mata’i e le Purinisese, o le mea o lo o tamo’e atu ai le Alope ma le manulele.

E le’i leva lava ae va’ai atu le Purinises ua tamo’e mai seisi Alope ma se’i atu le manu mai i le gutu o le alope muamua lea o lo o ia tuliloaina, ma tamo’e loa le alope lona lua agai i le itu taumatau, e alu ese atu agai mai i le maota o le tupu.

Ua tago atu nei le Purinisese ua ao mai i luga lona ofu talaloa ma toe faaopoopo seisi malosi i lana tamo’e.  

E fetaui lava le taunu’u o le tamo’e a le Purinisese i luga o le tama’i aega sa alu agai iai le alope lona lua, ae ona va’aia loa le alope o taumafai e kolosi se vaitafe ua malo i le aisa.  E le’i umi lava na tamo’e le alope i luga o le aisa, ae ta’e ma le aisa, ma pa’u ai loa le alope i totonu, ae o le taimi lena ua matala ai lona gutu ma pa’u ese atu le manu sa i lona gutu ma se’e atu agai i leisi itu vai.

Ua tamo’e atu nei le Purinisese ma si’i mai le kusi ma ave’ese lona pulupulu, ma ta’ai ai le manu ina ia mafai ona faamafanafana.  Ona o lenei Purinisese, o se tamaitai alofa tele, o lea na ia tago ai i se la’au umi lava ma fa’alala atu i le alope lea e i totonu o le vai ma toso mai ai loa i fafo.

Ua tago atu nei le Purinisese me si’i mai le kusi ma fusi mau mai, ma toe tamo’e faatopetope atu loa i le maota a le tupu ma le masiofo.

Ina ua nofo malamalama matua o le Purinisese i le mea na tupu ia te ia, sa faapea ona o la oteina le Purinisese.  Ua faapea atu le masiofo, “Oka, semanu e te pa’u i totonu o se vaitafe pe gau loe vae, pe e te malemo foi.  Se’i vaai ua masaesae ma palapala lou ofu fou, ua leiloloa foi ou se’evae fou.  Ma se’i va’ai o uvae na ua manu’a.”

Ae e ui i le ote a ona matua, ae na ataata lemu le purinisese ona o lona toe mafaufau i lana ta’amilosaga lea na fai i fafo atu ma pa o le maota a lona tama ma lona tina.  Sa ia mafaufau i le la tuliga ma le alope.  Ae o le taimi lena i tagata o le nu’u, ua leai seisi mea e toe talatalanoa iai, ua na o le talanoa i le mea a le Purinisese na fai.

Ua fai mai nisi o le nu’u, oka se loto alofa o lenei Purinisese, ma le tu’ua o lona potu ae alu atu e fa’asaoina mai lenei manu.

Ua fai mai nisi, o le matua’i loto tele lava o le Purinisese, ona e le i fefe i se manu feai, po o se alope, ae na alu lava e fa’asao mai le manulele.

Ina ua fa’alogo le tupu ma le masiofo i tala a tagata o le atunu’u e uiga i le Purnisese, sa o la fiafia tele ona ua la iloa, o le a saogalemu le lumanai o le malo i le Purinisese loto alofa ma le loto tele.

[IA MANUIA TOE FUAFUAGA O LENEI VAIASO]