O OE O LO’U TAMA?

VAEGA 30

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 30.

****************************************

A’o aga’i atu le taavale a le alii fomai o Taki ma le tamaitai tausimai o Naomi, i le falemai.

Na faapea atu Naomi ia Taki, “Faafetai lava mo lau meaalofa mo si o matou aiga.  Atonu o le a mafai ona maua ai foi se malologa a si o’u tama mai ana galuega.  Ou te matamuli lava ona o le mea lea sa tatau na fai e matou, o lana fanau.  Ae faafetai atu lava I lau susuga i le fomai mo lou alofa i nai o’u matua.”

Ua ‘ata’ata le alii fomai ma faapea atu ia Naomi, “Vaai, ua fai sina umi o o’u nofo i le tou aiga ma ou te faafetai i nai ou matua, i le le fai’esea o a’u, ua la tausia lava a’u e pei o se la tama moni.  O le mea lea ua ou fuafuaina ai lenei tafaoga, e fa’aali ai lo’u agaga fa’afetai i nai ou matua…ia ma outou foi, lou uso ma si ou tuagane.”

Ua na o le punou o Naomi ma faapea atu i si ona leo tau le lagona, “Faafetai lava.”

Ina ua taunuu le toalua lea i le nofoaga e masani ona tu’u ai Naomi i tafatafa o le auala, e savali faao’o i le falemai, sa liliu mai le tamaitai i le fomai ma faapea mai, “Se’i o’u alu e vaai pe mafai na fai sa’u faanoi mo le weekend.”

Ae tali atu Taki, “Aua e te popole, ua uma ona ou talanoa i le pule, o la ua talia ou livi mo le weekend.”

Ua oso i fafo ia Naomi ma na vaaia e Taki, le maligi o loimata o le tausi ma’i.

Ua tapuni mai e Naomi le faitoto’a ma toe faapea mai, “Faafetai lava Taki.”  Ona amata lea ona savali atu agai i le falemai.

O le ta o le taimi ‘ai o le aoauli o lena aso, na vaaia ai le faatopetope atu o le supavaia o Tausimai a le falemai, le tamaitai o Salome, i le fale’aiga lea e masani ona fetaui ai ma le tuagane a Naomi, le alii o Iakopo, mo le la taumafataga o le aoauli.

Na va’aia e Salome foliga fiafia a le alii o Iakopo ma sa manatu, ai ua ova le fiafia o Iakopo e vaai ia te ia.

Ae i le ogatotonu o le la taumafataga, na faapea mai ai Iakopo, “Salome, e le mafai ona ta tafafao i le weekend nei, ona ua iai fuafuaga a le matou aiga lea e fia fai.”

Na va’aia e Iakopo le suia o foliga fiafia o Salome, i le faanoanoa, soso’o mai ai ma le ita.

“Ae ua leva na fai a ta fuafuaga.  E faafefea ona e tiai a ta fuafuaga fa’afuasei faapena?” o le fesili le fiafia mai lea a Salome.

“Malie lou loto, o le taimi muamua lenei i se taimi umi lava, ua fai ai se fuafuaga a le matou aiga.  Ma ou te fia faatasi atu ma si o’u aiga i lenei weekend,” o le augani atu lea a Iakopo.

“Oi, ua faapena ona fai a ta fuafuaga.  A iai lava mea a lou aiga e fai, e tiai atu ai a ta’ua fuafuaga ua leva ona fa’ataatia.  I aua lelei, mea sili lea ua ou iloa atu,” o le tala lea a Salome, ma tago atu lava i lana ato ma toso mai, ma tu sasa’e a’e i luga ma savali atu loa i fafo mai i le faitotoa.

Ua fiu si tama o Iakopo e toe valaau atu ia Salome, ae ua faatopetope ese atu lava le savali a Salome.

Na alu lena po o taumafai le alii o Iakopo e telefoni si ana manamea o Salome, lea ua tiga lona loto, ua le taunuu la fuafuaga o le weekend ona o lea la’a alu Iakopo i le tafaoga a le latou aiga.

O le aso na soso’o ai, na vave usu lava le tama o Iakopo i le falemai e faasalavei ia Salome ae lei amata galuega.  Ina ua o la nonofo ifo i lalo i nofoa o lo o i le potu pito i luma o le falemai, na faapea atu Iakopo ia Salome, “Ou te mana’o e ta te o nanei e te feiloai i o’u matua ma le matou aiga, pe a manava au galuega.”

{E FAIA PEA]