POU TIUTE A LEOLEO

Pago Pago - AMERIKA SAMOA

MASALOMIA E SE TAMALOA LONA TOALUA MA LONA ATALII

O le aso 21 o Novema, 2023, na valaau atu ai se tina i le ofisa a leoleo i Tafuna, e molia lona toalua i le faaoolima ia te ia, ona ua masalosalo lona toalua ia te ia ma lona atalii.

Ua molia nei ia le tama o le aiga i le Faaoolima i lona tulaga e tolu, lea e mafai ona faasala ai i le falepuipui i le tasi tausaga po o se sala tupe e $1,000; po o faasalaga uma e lua.

Atoa ai ma le moliaga lona lua, i le faatupu vevesi i totonu o le aiga, lea e mafai ona faasala ai o ia i le falepuipui i aso e 15 po o se sala tupe e $300; po o faasalaga uma e lua.

(O le a le lomia le suafa o le tina ma le ua molia, ina ia puipuia ai le alii talavou o lo o a’afia i lenei mataupu).

E tusa ai ma faamaumauga a le faamasinoga, o lo o ta’ua ai e faapea, i aso 21 o Novema, 2023, sa valaau ai se tina mai i Fagaima, i le ofisa leoleo i Tafuna, mo se fesoasoano ona o uiga taufa’amata’u o lo o fa’aalia e lona toalua, ma o le mafua’aga lea na sulufa’i i le fale o lona tuaoi, mo se fesoasoani.

Na agai atu leoleo i le nofoaga o tupu ai le faalavelave ma talatalanoa ma le tina, lea sa ia faamatalaina i leoleo, ua o ese atu lona toalua ma lona uso (le uso o lona toalua), ma e na te le o silafia po o fea ua o iai.

O lo o ta’ua foi i faamaumauga a leoleo e faapea, na ta’ua e lenei tina, e le o se taimi muamua lea ua fasi ai o ia e lona toalua.  Sa ta’ua e lenei tina, i le aso Sa, Novema 19, 2023, sa fasi ai o ia e lona toalua i se faga meme’i.  Sa ia ta’ua e faapea, e fa’afa ona ta e lona toalua lona lima tauagavale ma una’oa ai.

Na faamatala foi e lenei tina e faapea, sa ia valaau muamua i le ofisa a leoleo ma faamatala i le leoleo na tali mai i le telefoni, le faaoolima o lona toalua ia te ia, ae peitai, i se taimi mulimuli ane, na ia toe valaau atu ai i le ofisa a leoleo, e fa’ailoa iai, ua mae’a ona fofoina le la faafitauli.

Ae sa ta’ua e lenei tina, o le aso na soso’o ai, na alu atu ai lona toalua i lana fale faigaluega ma su’esu’e o ia e uiga i se la mafutaga faaleulugalii ma le la tama tama.  Sa taumafai lenei tina e faamanino i lona toalua, e leai se mea faapea o tupu i le va o ia ma lana tama.

Ae peitai, i le aso 21 o Novema, 2023, a’o agai mai le tina i lona fale, sa faapea foi ona toe suesueina o ia e lona toalua, po o le a le umi o le la mafutaga faaleulugalii ma lana tama tama.  Ma o iina, e pei ona ta’ua e lenei tina, sa taumafai ai lona toalua e fasi o ia, ma faia ni uiga taufa’amata’u, ae o lo o tu lana tama teine i ona tafatafa.  Sa ta’ua e le tina le faapea atu o lona toalua ia te ia, ‘o le aso lenei e iai le mea e tupu ai’, ma o iina na sulufa’i ai loa lenei tina i le fale o lona tuaoi, ma tau saili se fesoasoani.

O le aso lava lea, na aveina ai e leoleo ia le tina ma lana fanau e toatolu, i le ofisa a leoleo, mo nisi suesuega ma se fesoasoani mo le ua a’afia i lenei mataupu.  A’o latou aga’i atu i le ofisa a leoleo, na faasino e le tina ia le taavale a le uso o lona toalua, o lo o tu i luma o se faleoloa ma sa faapea ona agai atu iai leoleo, ma lokaina mai ai loa le ua molia i lenei mataupu.

Na faapea foi ona faafesootai e leoleo ia le vaega a le ‘Social Services’ mo sa latou suesuega i le fanau, ae i le faaiuga o le latou suesuega, sa mafai ona toe foi le tina ma lana fanau i lo latou lava aiga.

Ae ua lokaina le tama o le aiga.  E $1,000 sa faatonuina e totogi ina ia mafai ona tatala mai ai mai i le falepuipui, e faatali ai lona faamasinoga.

MOLIA I LE TAU’AI FALE MA LE FAATUPU FAALAVELAVE, AE FAI MAI UA FA’AVAIATAU E SE TAGATA

O le aso 27 o Novema, 2023, na lokaina ai e leoleo se alii i le faatupu vevesi i totonu o le afioaga o Mesepa.  Ae peitai, na faamatala e lenei alii i leoleo, o faiga faataulaitu na mafua ai ona ia faatupu vevesi.

Ua molia nei le susuga ia Mateloi Otuhouma i moliaga o le Faatupu Vevesi i nofoaga faitele, o se solitulafono e mafai ona nofosala ai i le falepuipui mo le ono (6) masina po o se sala tupe e $500; po o faasalaga uma e lua.

E tusa ai ma faamaumauga a leoleo, na fa’afeso’ota’i e se tamaitai le ofia a leoleo i le aso 27 o Novema, 2023, ona o se tasi o lo o tau’aia le latou fale i ni ma’a.  Sa ta’ua e le tamaitai i leoleo, ua mae’a ona ia logoina le pule o le fale (landlord) e uiga i le mea o tupu.

Na ta’ua foi e lenei tamaitai, o Otuhouma lea sa e’e solo ma faatupu vevesi i le latou fale i Mesepa.  Ina o faataunuu suesuega a leoleo, sa maua ai se molimau lona lua mai i seisi tamaitai e faapea, sa taumafai le pule o le fale (landlord) e saili ia Otuhouma, lea na pisa i fafo ma tau’ai le fale o le aiga.

Ina ua taunuu leoleo i le nofoaga na tupu ai le faalavelave, na o latou va’aia le alii o Otuhouma i fafo o lona fale faatasi ma nisi o lona aiga, o lo o taumafai e taofi o ia mai i le sola ese.

Sa faatamala e le ‘landlord’ i leoleo e faapea, na amata ona laulauvavale le alii o Otuhouma ona tago lea i ni ma’a mai autafa o lona fale, ua tau’ai ai le fale o lona tuaoi.

Sa aveina e leoleo ia Otuhouma i le ofisa a leoleo i Tafuna mo le suesueina o ia.

Sa faamatala e Otuhouma, sa iai o ia i lona fale, ae na amata ona vevela.  Sa ia ta’ua foi e faapea, o ia ua pei ua faavaiatau e se faataulaitu, o le mafuaaga lena ua ia faapisa ma tauai ai le fale o lona tuaoi.

E $500 ua faatonuina e totogi e le ua molia ina ia mafai ona tatala ai i tua mai i le falepuipui, e faatali ai lona faamasinoga.