Ripoti a le FBI i taufaamata’u i le aoga a Tafuna

Pago Pago - AMERIKA SAMOA

E toalua ni alii talavou, ua toe tatalaina e leoleo i lalo o le vaavaaiga a matua, sa o la faia ni faasalalauga taufa’amata’u i luga o le initeneti, lea na mafua ai ona tapunia le aoga maualuga a Tafuna, i le vaiaso ua mavae.

E tusa ai ma se ripoti ua taulimaina e le Samoa News, mai i le aso 6 o Tesema, 2023, ua ta’ua ai e faapea, o le aso Lulu lava lea, i le 1:00 i le vaveao, na fa’afeso’ota’i ai e Agent Allyson Berry, o le vaega a le FBI ia le Ofisa Tutuotonu o Faalavelave Fa’afuasei (EOC) a Amerika Samoa

Ma sa ta’ua e Berry i totonu o lenei ripoti, ia se ata sa fa’asalalauina e se tamaititi 15 tausaga, i luga o lana ‘Instagram’, o se ata e foliga mai o se a’upega malosi (minigun) ma se faamatala e faapea, o taeao o le a ou tafanaina ai le aoga, o le a feoti tagata uma, e le o se tala taufa’aata.

O lenei alii talavou e aoga i le aoga maualuga a Tafuna.

O lo o ta’ua foi i le ripoti, i le 1:18 i le vaveao lava lea e tasi, na faapea ona fa’ao’o atu ai lenei fe’au mai i le FBI i ofisa uma a le malo, e aofia ai le Ofisa a Leoleo, Ofisa o Aoga, Ofisa a le Loia Sili faapea ma le Ofisa o le aoga maualuga a Tafuna.

O le 5:30 i lea lava taeao na faamaonia ai i suesuega a le vaega a le Homeland/OTICIDE, le faamautu o le alii talavou sa faia nei faasalalauga taufa’amata’u, i le afioaga o Aoloau.  Ina ua faamaonia foi le faamautu ai foi o nisi o Vaega Su’esu’e a leoleo i Aoloau, na aga’i atu loa sui o le OTICIDE i Aoloau mo le fa’aauauina o a latou suesuega, i le mea o nofo ai lenei alii talavou.

Na maua e le vaega a le OTICIDE e faapea, ua iai nei i a’ao o Vaega Su’esu’e a leoleo ia le alii talavou lea sa masalomia i lona faia o fa’asalalauga taufa’amata’u i luga o le initeneti.  O lea na agai atu ai loa le vaega a le OTICIDE i le ofisa a leoleo i Tafuna ma feiloai ai ma le ua molia.

Na faapea foi ona logoina e le OTICIDE ma leoleo ia le aoga maualuga a Tafuna ma fautuaina i latou ina ia faatinoina loa a latou fuafuaga mo le puipuiga o fanau aoga faapea le aufaigaluega, lea na mafua ai ona tapunia le aoga, i lea aso.

I le 7:30 o le taeao lava lea e tasi, o le aso Lulu Tesema 6, 2023, sa taunuu atu ai matua o le alii talavoua lea ua i a’ao o leoleo, ma seisi alii talavou, i le ofisa leoleo i Tafuna.  O le alii talavou lona lua lea na alu atu i le ofisa a leoleo i le taeao o le aso Lulu, e 15 tausaga ma sa suesueina faatasi i la’ua i luma o a la matua.

Sa faamatala e nei alii talavou, o le ata lea na fa’asalalauina i luga o le ‘Instagram’, o se ata o ni a la talanoaga, ua leva na fai i luga o le ‘Instagram’.

Sa faamatala e se tasi o nei alii talavou, o le ata o le fana lea na la fa’asalalauina, o se ata mai i luga o le initeneti ma e le o ia i la’ua se fana faapea.  

Ina ua mae’a ona faufautuaina nei alii talavou faapea o la matua, e sui o le ofisa a leoleo ma vaega a le malo, sa faapea loa ona tu’uina i latou e malaga atu i o latou aiga, a o fa’aauau pea su’esu’ega a le malo. 

I le taimi nei, o lo o galulue pea ofisa a le malo e auiliili ia tulaga o le tulafono ua a’afia i lenei matapuu, ma pe ono tatau ona molia nei alii talavou, i le tulafono.