POU TIUTE A LEOLEO

Pago Pago - AMERIKA SAMOA

VALAAU LE TINA I LEOLEO INA UA MISA LE FANAU

I le aso 23 o Novema, 2023, na ripotia ai e se tina lana fanau, i le ofisa a leoleo, ona o le faatupu vevesi a lana fanau, ma i’u ai ina sana tama teine e 19 tausaga le matua, i lona tagofia o le ava malosi, o se solitulafono e mafai ona faasala faafalepuipui ai se tasi i le lima (5) masina, po o se sala tupe e $500; po o moliaga uma e lua.

E $300 le tinoitupe ua fautuaina e totogi, e mafai ona tatala ai lenei tamaitai i fafo, e faatali ai lona faamasinoga.

O lo o ua ta’ua i faamaumauga a le faamasinoga e faapea, Na tulai mai lenei faalavelave i le afioaga o Nu’uuli.

Ina ua taunuu leoleo, sa o latou talanoa ma le tina ia Faafetai Fiso, ma sa ia faamatalaina ai le tupu o se faalavelave i le va o sana fanau e to’alua.

Sa suesueina e leoleo ia le fanau a lenei tina, e leoleo, ma ave faapagotaina ai le tamaitai o Grace Fiso.  Sa sogia foi e leoleo le manogi o le ‘ava malosi i lenei tamaitai.  Ma na aveina atu o ia i le ofisa a leoleo i Tafuna mo le fa’aauauina o ona suesuega.

(Ua lomia e le Samoa News ia le suafa o lenei tamaitai ona ua 18 ona tausaga ma ua ta’ua o se tagata matua i tulaga o le tulafono, ae peitai, e le i atoa ona tausaga faatulafonoina e mafai ai ona ia tagofia ‘ava malosi).

Sa faatonuina foi le uso matua a Grace, o Rotonia F. Smith, e malaga atu i le ofisa a leoleo, mo suesuega.

O lo o ua ta’ua i totonu o faamaumauga a le malo e faapea, sa ta’ua e Smith, i le aso na tulai mai ai le faalavelave i le va o ia ma lona uso laititi, o lo o faia se latou evaga ma nai ona tei ma le uo tama a Grace.

Ae sa toatamai Grace ina ua na iloa, o lo o fai se inuga a lana uo tama ma nai ona tei, lea e aofia ai ma lona uso matua o Rotonia.  Sa iai se taimi na valaau atu ai Grace i lana uo tama, ae le lagona mai o ia, o lea na savali atu ai ma kola mai le ofu a lana uo tama, ma po ona foliga.  O iina na u’unai ‘ese ai o ia e lana uo tama.

Na taumafai tei matutua o Grace e vaovao le la misa, ma taumafai e fa’ato’ato’a o ia.  Sa ta’ua e Rotonia, o le taimi lena na la misa ai ma Grace, lea na mafua ai ona valaau lona tina i le ofisa a leoleo, mo se fesoasoani.

Sa mafai ona faamaonia e isi tei o Grace ia le faamatalaga a Rotoria.

Ina ua fa’atalanoaina e leoleo ia Grace, sa ia ta’ua lona le fiafia tele ina ua ‘inu pia lana uo tama ma nai ona tei matutua, ma ia le usita’ia lana valaau atu e sau loa e moe.  O iina na ia tosoina mai ai lona ofu ma po lona papatua.  

Ae sa ta’ua e Grace, na liliu mail ana uo tama ma u’u lona ua, ma o iina na feosofi mai ai lona ona tei ma fa’ao’olima ia te ia.

Sa ia faamatalaina foi e leoleo e faapea, o leisi mafuaaga na valaau ai e lona tina ia leoleo, ona sa amata mai lana inuga pia i le 10 i le taeao o le aso na tupu ai le faalavelave.

Sa lokaina loa Grace e faatali ai lona faamasinoga.

FALEPUIPUI SE ALII I LE ESEESE O NUMERA O LAISENE A LANA TAAVALE

O le aso 21 o Novema, 2023 na vaaia ai e leoleo sa galulue i luga o le alatele i Satala, ia se ta’avale o agai mai i le itu i Sasa’e, e leai ni pepa o lana laisene, e faamaonia ai ua maea ona lesitala lana taavale.  Ae ina ua pasi atu le taavale i luma o leoleo, na va’aia ai foi e leoleo, e eseese fuainumera o le laisene pito i luma o le taavale, ma le fuainumera o le laisene o lo o i le pito i tua.

O lea na taofia ai loa e leoleo le taavale a le susuga ia Mike Uele, ma logoina loa le ofisa a leoleo mo se faamatalaga e uiga i nei laisene.

Sa faamaonia ai i suesuega a leoleo, e le o le taavale lea e ana laisene ia o lo o pipi’i ai, i luma ma tua.

Ina ua tapa e leoleo ia le laisene avetaavale a le susuga Uele, na faamaonia ai foi, ua leva ona pasi le aso e tatau ona toe fa’afou ai lana laisene avetaavale.

O lea na ave faapagotaina ai loa e leoleo ia Uele ma aveina atu o ia i le ofisa autu a leoleo i Fagatogo.  O iina sa faamatala ai e Uele e faapea, sa ia faatauina mai le taavale mai i sana uo, ae na sa na o le laisene pito i luma na iai, e leai se laisene pito i tua.

O lenei solitulafono ua molia ai Uele, e mafai ona faasala ai se tasi i le falepuipui, mo le lima (5) tausaga, po o se sala tupe e $5,000.  Po o faasalaga uma e lua.

E $3,000 ua faatonuina Uele e totogi ina ia tatalaina ai o ia i tua, e faatali ai lona faamasinoga.

O le susuga Uele, o se tagatanu’u mai Samoa.