TAPUNIA AOGA MAUALUGA TAFUNA ONA O FAIGA TAUFA’AMATA’U

Pago Pago - AMERIKA SAMOA

O le aso Lulu na sei mavae atu nei, Tesema 6, 2023, na tapunia ai e le Ofisa o Aoga ia le aoga maualuga a Tafuna ma faatonuina matua ina ia taofi alo ma fanau i aiga, ona o se ripoti e faapea, ua iai se fanau aoga ua faia sana faasalalauga i luga o Api o Foliga (Facebook), o le a ia o’o atu ma e au’upega malosi e faatama’ia ai ola ma soifua o fanau aoga.

Sa faatonuina foi ia le fa’aaogaina e fanau aoga o a’upega tafa’ilagi mo le faataunuuina o a latou a’oa’oga o lea aso.

E le i toe iai nisi faamatalaga ua maua mai e tusa ai ma lenei mataupu.

Ae sa faatumulia le fale’ai a le aoga a Tafuna i le aso Lulu, i se fono faatopetope a le Kovana ma lana kapeneta, faapea ulu o aoga a Tafuna, faiaoga ma le aufaigaluega, mo le soalaupuleina o lenei mataupu.

I se fa’aaliga mai i le alii kovana, ua fa’alauiloa mai ai e faapea, o le itu e ave iai le faamuamua ma le faataua, o le puipuiga o alo ma fanau.  Na ta’ua e le kovana, o so’o se taimi po o auala e ono lamatia ai lo latou saogalemu, e a’afia ai le malo atoa. 

Sa fa’aalia e Lemanu le o’o atu o le ripoti ia te ia i lena taeao, e tusa ai ma lenei taufaamata’u, ma talu mai lena taimi, sa o latou galulue tinou e saili e faamautu ma faamalosia puipuiga i totonu o aoga

Ae peitai, sa ia fesiligia i latou na auai i lea fonotaga e faapea, ‘Aisea o lo o tutupu ai nea mea? O aiga? O malo? Po o taitai ma faiaoga? Na ia ta’ua foi, e tatau ona fesili lava le tagata ia te ia, po o le a se mea e mafai ona fai faatasi e mafai ona fesoasoani ai i fanau o le lumanai.

Ma sa ia lu’itauina i latou um ana auai i lea lava fonotaga ina ia galulue faatasi, e saili auala e mafai ona foia ai nei faafitauli o lo o tulai mai i totonu o aoga, lotu ma le atunu’u atoa.

Sa saunoa le faatonusili o le Homeland Security, le susuga ia Samana Ve’ave’a, i le aso ananafi e faapea, o mea o lo o tutupu i Amerika, ua tutupu nei i totonu o Amerika Samoa.  Ma sa ia fa’ailoa atu i le KVZK-TV e faapea, o ripoti uma o lenei mataupu, ua faaooina atu i le vaega a le FBI.

Sa ia ta’ua e faapea, o se tamaititi e aoga i le aoga maualuga a Tafuna sa faia sana faasalalauga i luga o le ‘Instagram’ e faapea, o lo o ia te ia se fana ma o le a alu i le aoga a Tafuna.  

Sa mafai ona faia e leoleo se su’esu’ega e tusa ai ma lenei taufaamata’u, ma o latou sailia ma maua le alo sa ia faia lenei fa’asalalauga.

O le fa’atolu ai lea ona tulai mai o se faalavelave faapenei, i ni tulaga tau faamata’u i luga o upega tafa’ilagi. 

Ma sa mafai ona mauaina e le FBI le alii o lo o masalomia, o lona suafa ma ona tausaga ma ripoti atu loa i le Loia Sili.

Sa saunoa Samana, e le o se pomu ae o se taufa’amata’u i uiga.

I se fautuaga a le alii faatonusili, e mafai ona faia ni polokalama faufautua e uiga i nei ituaiga faalavelave, ae e manaomia ona nofo malamalama matua i mea o malaga iai le fanau.  Sa ia lapataia foi matua, afai e latou te le iloa le mea o iai le fanau, saili po o fea le fanau.

I se fautuaga a le afioga i le kovana, sa ia u’unaia ai le tatau ona saili le a’a autu o nei faalavelave ma galulue faatasi ina ia puipuia alo ma fanau. 

Sa ia fautuaina foi le faamamafaina o nei ituaiga mataupu ma faatalitali seia tupu se faalavelave.