POU TIUTE A LEOLEO

Pago Pago - AMERIKA SAMOA

MOLIA SE TAMA MATUA I LONA FA’AO’OLIMA I SE TAMAITITI 10 TAUSAGA

Na molia i le tulafono i le aso 17 o Novema, 2023 ia se tama matua e 66 tausaga le matua, i moliaga o le fa’ao’olima i se tamaititi laititi e 10 tausaga le matua, ma o lenei moliaga e mafai ona fa’afalepuipuiina ai se tasi i le lima tausaga, pe sala tupe e $5,000 ia po o faasalaga uma e lua.

E $3,000 le tinoitupe ua faatulaga e mafai ona tatala ai o ia mai i le falepuipui, e faatali ai lona faamasinoga.

(O le a le lomia le suafa o lenei tama matua ona o le laititi o le tamaititi na a’afia i lenei faalavelave).

E tusa ai ma faamaumauga a leoleo, na valaau ai se alii i le ofisa a leoleo i Tafuna, i le aso 15 o Novema, 2023 e ripotia le faamanu’alia o se tamaititi e 10 tausaga, ona ua sasa e se tasi.  O le tamaititi ua a’afia i lenei faalavelave, o le uo a le atalii, a le tamaloa lea na valaau i leoleo.

O lo o ta’ua i faamaumauga a leoleo, e faapea, na taunuu leoleo i le nofoaga na tupu ai le faalavelave, ma feiloai ai ma le tina o lo o talitonuina, e tausia le tamaititi (guardian) ma sa molimauina ai e leoleo le manu’a i le lima taumatau o le tamaititi.  Sa faamatala e lenei alualutoto i leoleo, o lona tama matua sa sasaina o ia i se paipa e pipi’i ai se fao.

Na agai atu loa leoleo ma suesueina le tama matua.  Sa faamaonia e lenei tama matua lona fa’aaogaina o se paipa uga (PVC) o lo o pipii ai se fao, e sasa ai lona atalii laititi.  Sa aveina loa e leoleo ia lenei tama matua, faatasi ai ma le atalii laititi ma le ‘Aunty’ o lo o tausia o ia, i le ofisa a leoleo i Tafuna, mo le fa’aauauina o a latou suesuega.

O iina i le ofisa a leoleo i Tafuna, na mafai ona togafitia ai manu’a i le lima o le alii 10 tausaga.  Sa faamatalaina e le ‘Aunty’ a lenei tamaititi i leoleo, o si nei alualutoto, e iai ona manaoga faapitoa (special needs).  

Sa logoina foi e leoleo ia le Matagaluega mo Tautua Lautele (DHSS) mo sa latou suesuega. 

Ae na faamatala e le tama matua e faapea, sa ia faalogo mai i le tagi a le uso laititi a le alii 10 tausaga, ona o lo o fasi atu e le alii 10 tausaga lea.  I lona toatamai tele, na ia aapa atu ai i le paipa uga ma ta faatolu ai le lima o le alii 10 tausaga.  Ae na ia fa’ato’a iloa le manu’a o le atalii, ina ua mae’a ona sasa o ia.  O lea na ia togafitia ai loa lona lima.  

Sa ta’ua foi e le tama matua, ua mae’a ona o latou talanoa ma le puleaoga ma le faufautua aoga a le alii 10 tausaga ma ua mae’a ona faaleleia mea uma i le ofisa a lea aoga.

LOKAINA SE ALII INA UA MOLIA I LONA FAAOOLIMA I LONA TOALUA

Ua moliaina nei se alii o lo o masalomia i lona faaoolima i lona toalua, faapea ma le faatupu vevesi i totonu o se aiga, ona o se ata sa ia fa’aalia i lona toalua, sa pu’eina i se masini pu’e ata.

(Ua le lomia le suafa o le tina ua a’afia i lenei faalavelave po o le ua molia, ona o lo’o a’afia ni fanau iti, i lenei mataupu).

E tusa ai ma faamaumauga a leoleo, i le aso 12 o Novema, 2023, na valaau ai se tina i le ofisa a leoleo, e ripoti le faaoolima o lona toalua ia te ia, i le latou fale i Fogagogo.

Ina ua taunuu atu leoleo, sa o latou feiloai ai ma le tina mafatia ma sa ia faamatalaina I leoleo le mea na tupu ma fa’ailoa i leoleo, o lo o iai lona toalua i totonu o le fale.  O lea na agai atu ai loa leoleo i totonu o le fale.  Sa faamatala e lenei alii i leoleo faapea, na tulai mai se fe’ese’esea’iga i va o ia ma lona toalua, ae ua mae’a ona fofoina lea faafitauli.

Ae na talosagaina uma le fafine ma le tamaloa e latou te malaga atu i le ofisa a leoleo i Tafuna.

E tusa ai ma le faamatalaga tusia a le tina, sa ia ta’ua ai e faapea, na fafagu o ia e lana tama teine i le taeao ma faapea atu, o lo’o mana’o lona toalua (le ua molia) e alu atu e gasese se taumafa o le taeao.  Ina ua mae’a, sa ia agai mai loa i totonu o le potu malolo, lea o lo o taumafa ai le ti taeao a lona toalua.  Ae fesili atu lona toalua pe aisea e le i alu ese atu ai ma le fale, e alu e ai le lalolagi.  Na toe agai loa le tina i totonu o lona potu e tapena, ae savali atu lona toalua ma fa’aali atu se ata o se tagata i luga o lana telefoni.  Ma o iina na amata ai le la taugaupu.  Sa ta’ua e le tina lona poeseina o le telefoni ma fesili i lona toalua pe manao e lepetia le la ulugalii e aunoa ma se faamaoniga, ae ‘ava’avau atu lava lona toalua ia te ia.

A'o taumafai pea lenei tina e tapena lona potu, sa faatonu o ia e lona toalua e alu ese ma le latou fale, e alu e nofo ma lona toalua fou.  O lea, na agai atu ai loa le tina i le umukuka, e aunoa ma le faia o se tala i lona toalua.  Ae ina ua ia valaau atu i le la fanau teine matutua e o mai e a’ai, sa ia faapea atu i lona to’alua, o lona alofa pepelo, ae faatonu o ia e lona toalua e avel ana fanau ma o i lona toalua fou e na te tausia i latou.  Sa faapea atu foi le tamaloa, e faamatala i le la fanau lana uo fou.  Ma ia faapea atu foi, afai e na te vaai ia te ia (le tina) ma lona toalua fou i totonu o le fale, o le a ia tipitipia i la’ua (se’i tulou).  

O lo’o ta’ua foi i faamaumauga a leoleo ia tuuaiga a le fafine e faasaga i lona toalua, i lona taumafai e titina lona ua, ona ua ita le tamaloa i le leotele o le fafine.  O iina na tagi ai le la tama teine laititi ma taumafai e faaofiofi i lo la va.  Ma valaau atu ai loa le fafine i le ofisa a leoleo, mo se fesoasoani.

Ae i le molimau tusia a le tamaloa, sa ia ta’ua ai le tulai mai o se fe’ese’esea’iga i le va o ia ma lona toalua i le aso 12 o Novema, 2023 ina ua ia fa’aali atu i lona toalua se ata na pu’eina I se mea pu’eata i le latou fale.

O lo o iloa atu i lea ata vitio se tagata o lo o tatalaina le faitotoa o le fale.  Ma sa fia suesue e le tamaloa po o ai lea tagata, ae tali lona toalua, e na te le iloa. Ma na ta’ua e le ua molia e faapea, o iina na amata ina faatetele ai le la finauga ma lona toalua, on aua palauvale atu lona toalua ia te ia, ma lau lona lotoleaga.  Ma o iina na ia taumafai e tapuni le gutu o lona toalua, ae faamanu’alia ai le gutu o lona toalua i lona atigilima, ma i’u ai ina valaau e lona toalua ia leoleo.

Ua lokaina nei le ua molia i le falepuipui e faatali ai lona faamasinoga.

O lo o molia o ia i le Faaoolima i lona tuaga e tolu, o se solitulafono e mafai ona loka ai se tasi i le tasi tausaga, po o se sala tupe e i le va o le $150 ma le $1,000.  Atoa ai ma le moliaga o le Faatupu vevesi i totonu o aiga; lea e mafai ona lokaina ai se tasi i le 15 aso, o se sala tupe e I le va o le $150 ma le $300 po o faasalaga uma e lua.

E $1,000 le tinoitupe ua faatulagaina e mafai ona totogi e tatalaina ai le ua molia mai i le falepuipui, e faatali ai lona faamasinoga.