POU TIUTE A LEOLEO

Pago Pago - AMERIKA SAMOA

TU’UA’IA SE ALII 42 TAUSAGA I LONA FA’AO’OLIMA I LONA TINA

O le aso 22 o Oketopa, 2023, na valaau atu ai se tina i le ofisa leoleo i Tafuna, ma ripotia le fasi ina o ia e sona alo alii e 42 tausaga le matua, i se la’au ma una’i o ia i fafo mai i le fale.

E tusa ai ma faamaumauga a leoleo, ina ua o latou taunu’u i le fale o lenei  tina, sa ia fa’ailoa i leoleo, ua sola ese lana tama o Tovio Poynton mai i le latou fale ma sa fiu leoleo e su’e Kokoland, le nu’u o lo o faamautu ai lenei aiga, ae peitai, sa le i mafai ona maua Tovio.

Sa faatalanoaina e leoleo le tina i le ofisa a leoleo i Tafuna ma sa ia faamatalaina e faapea, sa faia le talanoaga a le latou aiga, o ia ma lona tuagane, e uiga i ni fa’alavelave faaleaiga ma sa iai ma Tovio, o lo o fa’alogologo atu i le la talanoaga ma lona tuagane.  O le mae’a o le talanoaga a le tina ma lona tuagane, na amata ai se la fe’ese’eseaiga ma Tovi’o, ina ua mana’o Tovi’o e toe totogi mai e lona tina, ia tupe uma ia sa ia tu’uina atu i lona tina.

Na i’u ina si’isi’i le leo o le alii o Tovi’o i lona tina ma fa’aali lona le fa’aaloalo.  Ae ina ua tu atu le tina e ta i le la’au, na liliu mai Tovi’o se’i le la’au ma sasau mai i lona tina, ma tau lana ta, i tua o lona ulu ma lona taliga.

Sa faamatala e le tina, sa taumafai e savali mai i lana tama, ae tago atu Tovi’o i le si’i mai o ia, ma togi o ia i fafo mai i le faitoto’a pito i luma o le latou fale.  Ona e na o le ie lavalava a le tina sa sulu, na pa’u mai i fafo, ua pa’u ese lona ie lavalava, ma mapeva ai lona vae.

O le mafuaaga lea na valaau ai loa e tina ia le ofisa o leoleo mo se fesoasoani.

Na valaauina foi le vaega a le EMS ona sa lagona e le tina ia le tiga o lona tuli ma lona vae lea na mapeva.  Na o’o vaega o le EMS ma faia a latou suesuega, ae peitai, sa musu le tina e ave o ia i le falemai.

Ina ua mae’a ona faatalanoaina le tina i le ofisa o leoleo, sa agai atu leoleo e toe momoli o ia i lona maota, ma maua atu ai e le tina ia le alii o Tovi’o i totonu o le fale ma ia toe valaau atu i leoleo ma fa’ailoa atu i leoleo, o Tovio lea o lo o i totonu o le fale.  Sa faapea lona ave faapagotaina ai o ia e leoleo.

Sa faamatala e Tovi’o i leoleo, na mafua ona tupu mea ia sa tutupu i le aso Toonai, Oketopa 21, 2023, ona sa taumafai lona tina ma lona aiga e fasi o ia.  Sa ta’ua e Tovi’o, e leai sana gaioiga na faia i lona tina, e pepelo lona tina.  Ae sa ia ta’ua e faapea, sa ia tago u’una’I ese lona tina.  

Ua lokaina nei Tovi’o Poynton i le to’ese i Tafuna ma e $2,000 le tinoitupe ua faatonuina e totogi e tatala ai o ia i tua e faatali ai lona faamasinoga.

MOLIA SE ALII I LE FAAO’OLIMA I LONA TUAFAFINE MA LANA TAMA TEINE

E le o mautinoa i le taimi nei pe ua maua e leoleo ia se alii mai i Vaitogi ua molia i lona faaoolima i lona tuafafine ma sana tama teine, e 1 tausaga le matua, i se faalavelave na tulai mai i le aso 11 o Oketopa, 2023.

E tusa ai ma faamaumauga a le faamasinoga, o lo o ta’ua ai le vala’au atu a se tamaitai i le ofisa a leoleo ona o lona tuagane o lo o faatupu faalavelve i totonu o le latou aiga i Vaitogi.  Ae ina ua taunu’u leoleo, ua sola ese lenei alii.

(Ona e na o le 1 le tausaga o le na a’afia i lenei faalaevlaev, o le a lomia ai lona igoa faatasi ma le igoa o lona tina ma le alii na faatupu faalavelave).

Sa faamatala e le tina o le pepe e tasi le tausaga, na tu’uaia o ia e lona tuagane i le faaleagaina o lana ili ma amata ona palauvale atu ia te ia.  Sa taumafai le tamaitai e faato’ato’a lona tuagane, ae peitai, na liliu mai lona tuagane ma taumafai e fasi o ia.  Ae oso atu lo la tina ma vaovao lana tama, ae faateteleina ai le ita o lenei alii ma ia po ina ai le pepe e tasi le tausaga a lona tuafafine, ma tau ai lona ulu i le pa sima o le fale.

O lo o ta’ua i faamaumauga a le malo le fiu o le tina e tau fa’ato’ato’a lenei alii, ae peitai, sa fa’aauau pea lana sauniga o le laulauvavale agai i lona tuafafine, ma I’u ai lava ina matapogia lona tina ma aveina atu I le falemai.

Sa faamatalaina e le tuafafine, e le o se taimi muamua lea ua faia ai e lona tuagane lenei mea, o le faatupu vevesi i totonu o le latou aiga.  Sa lokaina muamua foi lona tuagane ona o le mea lava lea e tasi.

Sa fautuaina le tuafafine ina ia ave lana tama (le pepe e tasi tausaga) i le falemai mo le siakiina, ona sa vaaia le mumu o lona alafau taumatau.

Sa iai se molimau 15 tausaga na faamauina lana faamatalaga e leoleo, ona sa ia molimauina le po ina e le ua molia ia le pepe e tasi tausaga agai i le pa sima.

O lo o ta’ua i faamaumauga a leoleo le iai o ni tamaiti laiti, i le va o le 1 ma le 15 tausaga, i le fale ina ua tupu mai lenei faalavelave, ae e le o fa’asuaava le ua molia.

A’o taumafai leoleo e saili le ua molia i totonu o le afioaga o Vaitogi, na o latou vaaia o ia i tafatafa o se faleoloa, ae ina ua ia iloa mai le taavale leoleo, na ia toe sola ese.  Ma sa fautuaina lona tuafafine, a toe foi atu lona tuagane i le fale, ia vave valaau atu le ofisa a leoleo.

E tolua moliaga ua molia ai nei lenei alii, o le faitauga muamua o le Faatupu vevesi ma o se solitulafono e mafai ona loka ai se tasi i le ono masina, po o se sala tupe e $500 po o solitulafono uma e lua.  O leisi solitulafono ua molia ai lenei alii, o le Faaoolima i lona tulaga e 3, ma e mafai ona lokaina ai o ia i le 5 tausaga, po o se sala tupe i le va o le $150 ma le $5,000, ia po o faasalaga uma e lua.  Ma le moliaga lona tolu, o le faia o se tulaga e ono a’afia ai le saogalemu o se alualutoto, lea e mafai ona faasala ai lenei alii i le 5 tausaga, po o se sala tupe e i le va o le $150 ma le $5,000; po o faasalaga uma e lua.