Fa’ate’a sui Minisita o Leoleo a Samoa ona o le tu’uaiga i le fa’aaoga le faatulafonoina o tusi folau

Apia - SAMOA

Ona o sana malaga lata mai nei i Amerika Samoa, ua talosagaina ai nei le sui Minisita o Leoleo a le malo o Samoa, le susuga Fepulea’i Fa’asavalu Su’a, ina ia tu’ua lona tofiga i totonu o le malo, ina ua masalomia lona fa’aaogaina o lana tusi folau faalemalo, e ulufale mai ai i totonu o le teritori, e aunoa ma se faatanaga mai i le malo o Amerika Samoa.

Sa mafai ona faamaonia mai lenei ripoti e nisi o taitai sinia o le Ofisa o Femalagaiga.

O lo o ta’ua foi le taofia o Fepuleai e sui o le Ofisa o Femalagaiga mo sina taimi, ona toe tatalaina loa o ia i tua.

I se fa’atalanoaga a le Komesina o Leoleo a Samoa, le susuga Auapa’au Logoitino Filipo, ma se sui o le Samoa News, sa faamaonia mai ai e Auapa’au le fa’ate’aina o Fepulea’i mai lana galuega, ona o le faafitauli na tulai mai ina ua malaga mai i Amerika Samoa.

Na ta’ua foi e Auapa’au le faatonuina o leoleo, e le Kapeneta, ina ia ave’ese uma aseti a le malo, e aofia ai ma ta’avale, mai ia Fepuleai.

I se ripoti mai i le Samoa Observer i Apia, ua ta’ua ai le faamaonia mai e nisi o taitai o le malo o Samoa, le pasiaina mai e le Palemia o Samoa, Fiame Naomi Mata’afa, le fa’ate’aina o Fepuleai, ae e le i tu’ua le atunu’u i le aso Faraile o le vaiaso ua mavae.

Sa le mafai ona maua se faamatalaga mai i le sui Palemia, le afioga Tuala Iosefo Ponifasio, faapea le susuga ia Faualo Harry Schuster, le Minisita o Leoleo ma Falepuipui.  Sa taumafai foi le nusipepa e maua se fesootaiga ma Fepuleai i le faaiuga o le vaiaso na sei mavae atu nei, mo se faamaoniga o le fa’ate’aina o ia, ae peitai, sa le i maua se fesootaiga.

Ae sa fautuaina le Observer, o le faaiuga a le Palemia mo le fa’ate’aina o Fepuleai, e iai lona sootaga ma le mataupu tau i femalagaiga lea na tulai mai i Amerika Samoa, lea na masalomia ai le ulufale mai o le sui Minisita i totonu o le teritori, e aunoa ma se pemita po o se faatanaga mai i le ofisa a le Loia Sili a Amerika Samoa.

Ua fa’ate’aina le sui Minisita, ae o le masina ua tuanai, na faaulu ai e le Faipule a Faleata Numera 3, ia Lealailepule Rimoni Aiafi, lea foi o lo o avea ma failautusi a le HRPP, ia sana tagi e faasaga ia Fepuleai.  

Sa fa’ailoa mai e Lealailepule i nisi o vaega o sui fa’asaslalau, e lua ni tagata ua o latou molimauina le fesoasoani o Fepuleai ia Sam Su’a ma lona toalua, ae le gata i lea, e tele nisi molimau ua faapea tulai mai e fesoasoani i lana mataupu.  O le alii o Sam Su’a lea o lo o faapea, o le molimau lea sa vaai i le taavale ma le ave ta’avale, lea na maliu ai se alii e 18 tausaga, o Tuuau Faasavalu, ia Aperila 2021, lea ua tuuaia ai nei Lealailepule, o ia le aveta’avale o le taavale lea na maliu ai Tuuau.

I se talanoaga a Fepuleai ma le sui o le Samoa News, sa ia fa’ailoa mai ai, le leai o sona malamalama i tulaga o lo o tu’uaia ai o ia e Lealailepule.

Ae le gata i lea, sa teena e Fepuleai ia faamatalaga e faapea, o ia sa pikiina ia Sam ma lona toalua, ma aveina atu i la’ua i se faletalimalo, lea o lo o ta’ua e Lealailepule, o lo o ta’ua mai e ana molimau, o lo o fa’aalafi ai Sam.