POU TIUTE A LEOLEO

Pago Pago - AMERIKA SAMOA

LIPOTIA SE ALII I LE FASI O LANA UO TEINE

O le aso 31 o Oketopa 2023, na o’o atu ai se tama i le ofisa a leoleo i Tafuna ona ua na masalomia le faaoolima o se alii i lona afafine.  Na ta’ua e lenei tama lona vaaia o se manu’a i foliga o si ona alo ma ina u ana fesiligia lona afafine po o le a le mea na tupu, na tali atu lona afafine, na fasi o ia e lana uo tama.

O lea lava aso na fa’atalanoaina ai e leoleo le tamaitai o Beverly Fatu ma sa ia ta’ua e faapea, sa manao lana uo tama, e suafa ia Tafaotaua Bryce, e alu atu i lona fale ae peitai na fai iai Fatu, e le faataga e ona matua.  Ae ina ua maua se avanoa, sa ia fa’ailoa loa ia Bryce, o lea o le a alu atu.  Ae na muamua alu tapena mai sana meaai.

Ae ina ua o’o atu Fatu i le fale o Bryce, e le o iai, pe a ma le 2-5 minute sa ia faatali ai.  Ae ina ua o la feosofi i totonu o le taavale, na po o ia ma palauvale atu Bryce ma fesili atu pe aisea ua tuai atu ai.  Sa faapea ona ia kolaina lona ofu ma tatu’i ona foliga.  Na ta’ua e Fatu e faapea, sa manatu Bryce, ua mafua ona tuai atu o ia, ona o lo o faatasi ma seisi.  

E tusa ai ma faamaumauga a le malo, sa malaga atu leoleo ma auina mai Bryce i lo latou ofisa mo le faatalanoaina.  E tusa ai ma se faamatalaga a lenei alii, sa fai se la tauga upu ma Fatu ae i lona ita tele sa ia tu’iina ai ona foliga.  Ae na mafai ona o la fofoina le la faafitauli, ae e le i alu Fatu i le fale.

Ua lokaina nei Bryce i le falepuipui, ma e $3,000 le tinoitupe e mafai ona tatala ai o ia I tua, e faatali ai lona faamasinoga.

O lo’o molia Bryce i faatupu vevesi lea e mafai ona faafalepuipui ai se tasi i le 15 aso po o se sala tupe e $300, po o faasalaga uma e lua.

E le gata i lea, o lo o molia foi o ia i le faaoolima, lea e mafai ona faafalepuipui ai o ia i le tasi tausaga po o se sala tupe e $1,000, po o faasalaga uma e lua.

MOLIA SE ALII I LONA FAIA O AMIOGA MATAGA I SE TEINEITIITI E 15 TAUSAGA

 O le aso 25 o Aukuso 2023, na ripotia ai e se tina loto mafatia ma sona alo tamaitai, ia le alii o Michael Taupau, i le ofisa o leoleo i Tafuna, i lona faia o ni amioga mataga i sona alo teine e na o le 15 tausaga le matua. I le faamatalaga a lenei tamaitai ua fa’aigoaina o K.S., na nofo i le fale o lona uso ia Mati 19, 2023.  O iina na fetaui ai ma Taupau ma sa amata le la faigauo I le aso 23 o lea lava masina, ma o le aso muamua lava o le la faigauo, na o la faiaiga ai.

Ae peitai, i le aso 15 o Aperila, na ta’ua e K.S., na faamalosia ai o ia e Taupau.  Ae sa le i tu’ua ai lo la faiaiga seia o’o mai i le aso 18 o Aukuso.

O le aso 17 o Oketopa na maua ai e leoleo ia Taupau i lona fale, ae sa iai foi K.S. i le fale i le aso lava lea.  O lea na ave faatasi atu ai la’ua i le ofisa a leoleo i Fagatogo.

E tusa ai ma faamaumauga a le malo, sa faamatalaina e K.S. i leoleo i lea aso, le fa’aauau pea ona o la faiaiga ma Taupau, ma sa faamaonia e Taupau lea tulaga ina ua faatalanoaina o ia e leoleo.

Ua ta’ua foi i faamaumauga a le malo e faapea, na silafia e le tina o le tamaitai le faigauo a lona alo ma Taupau, ae na te le i iloaina o lo o la faiaiga.

GAOI TUPE ONA SOLA LEA AE LE UMA ONA TOTOGIA

I se faalavelave ua tulai mai i Auseetalia, o lo o ua ripotia mai ai nei le tamaitai o Ester Aleli, ina ua na gaoia se tupe a se tama pipili sa ia tausia, ona sola lea ae le uma ona toe totogi le tupe.

Sa faamatala e Peter Spickler e faapea, a’o galue Aleli o se tausi ma’i ia te ia, ona o ia ua pipili ona o se faalavelave na tupu mai i lana galuega, sa ia gaoia ai se tinoitupe e $90,000 (tupe Ausetalia) mai i lana tusitupe.

Sa taua foi e Spickler, sa faia foi e lenei tamaitai ni uiga taufa’asese e gaoi mai ai nisi tupe mai ia Spickler.

Ina ua molia o ia, sa faamaonia e Aleli lana solitulafono na faia i le va o Tesema 2018 ma Aperila 2019.  Ae na le faafalepuipuiina o ia, ae na faatonuina o ia e le faamasino ina ia toe totogi le tupe a Spickler.

Ae peitai, e na o le $450 le tupe na toe maua e Spickler.

Ina ua fesiligia o ia e Spickler po o afea e faamaea atu ai le totogia o le tupe, ae tali Aleli, e maua atu ia Oketop po o Novema o le tausaga ua tuanai.

I luma o le faamasinoga, sa faamatala ai e Aleli, na ia lafoina le $40,000 o le tupe na ia gaoia, i se tamaloa i Samoa.

Sa ta’ua e Spickler, sa ia faatuatuaina Aleli ma sa la faauo foi, o le mafuaaga lea na ia tu’uina iai tupe ma lana folafolaga o le ia toe totogi atu ina.

Ae i le fa masina, sa nono mai ai e Aleli se tinoitupe e $87,500 mai i le tusi tupe a Spickler, e aunoa ma lona silafia.

O lo o ua tau saili nei le tamaitai o Aleli.