Molimau le Loia Sili i luma o le Faipule e faatatau i suiga mo le toe faaleleia o le ofisa o femalagaiga

Pago PAgo - AMERIKA SAMOA

Ua toe suia nei se fuafuaga na folasia mo le faamanatuga o le 75 tausaga a le Fono Faitulafono, mai i aso e fa (4), i le na’o le aso e tasi.  O se suiga lea na faia e le kovana sili e pasia ai le $1 miliona mo lea fuafuaga.  O le fesili la, ona o le $1 miliona lea o le a sau mai i le $3.1 miliona tupe faaopoopo mai i le tausaga tupe 2022, e toe fo’i la lea fuafuaga i aso e 4 e pei ona sa iai muamua.

Na auai atu nisi o taitai mai i le Ofisa o le Kovana i le iloiloga a Faipule sa faataunuuina i le aso Lulu na sei mavae atu nei mo le faamaninoina o poloketi ua lisiina i totonu o le pili o tupe faaopoopo o le $3.1 lea o lo o faatupeina mai i tupe maua e le i faasoasoaina, i le tausaga tupe o le 2022 – lea o lo o taofi le malo, o se tupe faasili.

Sa molimau le susuga i le Loia Sili, ia Fainuulelei Falefatu Alailima Utu, o lo o finagalo le kovana e toe faafoi le $1 miliona, mo le Iupeli a le Fono, aua o se fiafia lea, e le gata i le fono faitulafono, ae faapea foi le Teritori, o se tala faasolopito lea a le atunu’u.  Me aofia ai le tupe faasoasoa e $1.5 miliona mo meafale o le fale fono fou.

O isi poloketi o lo o aofia i totonu o lenei pili, o le $400,000 mo le faatinoga o galuega a le ofisa o femalagaiga; $75,000 mo le Criminal Justice, $500,000 mo le (ASSSA) vaega o lo o tosoina ma galuea’iina va’a a le malo, faapea ma le tupe mo le fale mata’aga a le Jean P. Hayden.

O le $400,000 mo le ofisa o femalagaiga, e mafai ai ona toe faaopoopo nisi tagata faigaluega se valu.  E $20,000 mo le tagata faigaluega e toatasi.  Atoa ai ma le faatauina o ni taavale ma laulau mo nei tagata faigaluega e toavalu, ma le aveina o i latou i fafo, e aoaoina mai ai, e $10,000 ia ma le faatinoga o a latou tiute faalekonakarate, e $80,000.

Sa faamanino e Fainuulelei, ina ua amata ona ia faigaluega i le ofisa a le loia sili, na tele ni mataupu sa manaomia ona fofoina, i totonu  o le ofisa o femalagaiga, e aofia ai totogi o tagata faigaluega, o a latou si’I, o ovataimi a’o galulue i le taimi o le Koviti ma ua mae’a ona fofoina nei mataupu, e aofia ai ma le siitaga o totogi, mai i le $12,000-$15,000 mo i latou e umia fa’ailoga.

Ma na saunoa le loia sili, talu lava ona faia nei suiga fou, ua vaaia le suiga i amioga ma le faatinoga o tiute a le aufaigaluega.

Ma e pau le mea o totoe, e pei ona saunoa le Loia Sili, o tagata ‘overstayers’.  Ma e le o se faafitauli fou, na tupu mai foi i na tausaga.  Na saunoa foi Fainuulelei e uiga i le pemita 7 aso lea ua faamalosia nei, i lalo o se maliliega faapitoa ma Samoa.

Na saunoa Fainu’ulelei, e le i fiafia tagata o le teritori i le pemita na o tagatanu’u o Amerika Samoa ae le aofia ai ma sitiseni o Amerika.  Ma o lea ua faia ai lenei maliliega.

Sa ia ta’ua, talu lava ona amataina lenei polokalama fou ia Oketopa 19, 2023, ua 84 tagata femalagai ua ulufale mai i totonu o Amerika Samoa, i le pemita 7 aso, ae na o le to’afa lea ua ‘overstayer’.  O lo o tau saili nei e le aufaigaluega a le Ofisa o Femalagaiga nei tagata ina ia mafai ona faasala ma toe faafoi.

O tagata faigaluega fou e toavalu ia na saunoa ai Fainuulelei, e aofia ai ni tagat su’esu’e se toafa (4), e toalua i luga o le uafu, ma le to’alua i le malae vaalele.

Na saunoa Fainuulelei, sa le i lava tagata faigluega toalima ia na iai, e latou te faafoeina le galuega mo tagata faimalaga mai ma tagata faimalaga ese atu, i luga o le uafu ma le malae vaalele.

Sa ia ta’ua foi le iai o ni nai faafitauli i le polokalama lea o lo o aumai ai tagata faigaluega a le Starkist, lea e manaomia ai ona auai atu se tasi o le aufaigaluega a le Immigration i le faamasinoga, ae o lo o galulue isi i fafo.

Na saunoa Fainuulelei, o se faafitauli ua leva ona tupu, e pei ona molimauina i totonu o le EOB, lea e vaaia ai laina uumi po o le faatumulia o le EOB i le mamalu o le atunu’u o lo o faatalitali i fono, kilia, pemita ma isi tautua manaomia i totonu o le ofisa o femalagaiga.

O le aso ananafi na faitauina faatolu ai lenei pili.