POU TIUTE A LEOLEO

Pago Pago - AMERIKA SAMOA

MOLIA SE TINA I LONA FAAOOLIMA I SANA TAMA E 11 TAUSAGA

O le aoauli o le aso 29 o Oketopa na agai atu ai leoleo e sailiili se mataupu na o’o mai i le latou ofisa, i se tina ua masalomia i lona fa’aaogaina o se paipa e sasa ai sana tama teine e 11 tausaga le matua.

Ina ua taunu’u leoleo i le mea sa tupu ai le faalavelave, sa molimauina le faamanu’alia o le teineititi ma sa faapea loa ona valaauina le EMS mo le togafitiga o manu’a o le teineititi.

Sa faamatala e se molimau, o le tama matua lea o le teineititi ua a’afia i lenei faalavelave, na sulufa’i atu lana ‘granddaughter’ ia te ia mo se fesoasoani, ona ua tui e le ua molia ia lona vae i le paipa.  Sa ta’ua foi e lenei tama matua, sa ia taumafai e taofi le tina mai lona faaoolima i lana tama teine.

Sa faamatala e lenei tama matua i leoleo le fasi so’o e lenei tina o lana tama teine.

I se faamatalaga a le teineititi, sa ia ta’ua ai e faapea, na ita lona tina ona ua ia le faia le feau na fai atu ai lona tina e fai.  Ma i lona fefe tele, sa tamo’e ai i le fale o lona tama matua, ae o lo o tuliloa atu o ia e lona tina.

Ina ua faatalanoaina e leoleo lenei tina, sa ia faamatalaina le le usitai o lana tama teine ma o le mafua’aga lena o lona toatamai ma ona tago ai i le paipa sa i totonu o le umukuka ma sasa ai lana tama.  Sa fa’aalia foi e lenei tina lona le fiafia i le tama matua ona o le faapelepele o le faiga o lana tama teine.

Ua lokaina nei lenei tina ma ua molia o ia i lona sauaina o se alo talavou faapea ma le faia o ni gaioiga e ono a’afia ai le saogalemu o lenei teineititi.

E $5,000 le tinoitupe faatulagaina e mafai ona tatalaina ai lenei tina mai i le falepuipui.

LOKA SE ALII 18 TAUSAGA I LE FAIAIGA MA SE TEINEITITI 15 TAUSAGA

O le aso 25 o Aukuso, 2023, na lokaina ai se alii e 18 tausaga ina ua faamaonia lona faiaiga ma se teineititi e 15 tausaga.  E tusa ai ma faamaumauga a le faamasinoga, o le afiafi lava lea o le aso 25 o Aukuso, na  o ai le tina ma le ua a’afia i lenei faalavelave, e ripoti lenei mataupu I le ofisa a leoleo i Tafuna.

E tusa ai ma faamatalaga a le teineititi, sa ia ta’ua ai e faapea, sa ia maua le tala i le aso 20 o Mati, 2023, o lo o fia faauo atu lenei alii ia te ia ma o le aso lava lea na la faamasani ai, ma o la faiaiga ai.

Ae peitai, i le aso 15 o Aperila, 2023, e tusa ai ma le faamatalaga a le teineititi, sa faamalosia ai o ia e le ua molia.  Ae peitai, sa le i motusia ai le la mafutaga, seia o’o mai lava ia Aukuso 18, 2023, o le aso mulimuli lea na o la faatasi ai ma le ua molia.

O le aso 17 o Oketopa, 2023 na o’o atu ai leoleo i le fale o le ua molia, i Auma mo le faia o a latou suesuega.  A’o faatalatalanoaina e leoleo ia le ua molia, sa o latou vaai ai i le teineititi i le fale o le ua molia ma aveina fa’atasi ai loa i laua i le ofisa a leoleo i Fagatogo.

Sa faamaonia ai e le teineititi i leoleo i lea aso, na o la fa’atasi ma le ua molia i le aso 15 ma le aso 16 o Oketopa.

Na faamaonia e le ua molia ia le la faiga uo ma lo la faiaiga ma le teineititi 15 tausaga.  

O lo o ta’ua i faamaumauga a le faamasinoga le masalomia e le tina a le teineititi ia le faigauo a lana tama teine ma le ua molia.

Ua molia nei lenei alii i moliaga e tolu.  Ma e $5,000 le tinoitupe ua faatulagaina e mafai ona tatala mai ai o ia mai i le falepuipui.