O OE O LO’U TAMA?

VAEGA 19

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i totonu o Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

***************************

Na gata mai le tatou Fagogo i le vaiaso ua mavae ina ua le fiafia le tamaitai o Naomi i le tala a le alii fomai o Taki lea na fai atu ia te ia, e le mana’o e galulue ma se tausima’i e le mafai ona alu lona mafaufau i lana galuega.

Ae na mafua ona saunoa faapea le alii fomai ona e maua atu e Taki ia Naomi, o lo o nofonofo i totonu o le potu a fomai ma tausimai o le falemai lea la te galulue ai, ma ona foliga e pei o le a tagi.  Aua o lea na fa’ato’a uma ona fetaui ia Naomi ma lona fili lea ua avea nei ma Supavaisa o Tausimai i totonu o le falemai lea o lo o galue ai Naomi, le tamaitai o Salome.

Ae e le i manatua e Salome ia Naomi, ona sa gata lava ona o la fevaaia’i, o le taimi na la aooga ai a’o la talavou.  Ae manatua foi, o le taimi lena e fai sina lapo’a o si teine o Naomi ma o le mafuaaga lea sa fai ai ma mea ula a le teine o Salome, a’o la a’o’oga.

Ae ina ua la toe feiloai i le falemai, sa matuai le iloa lava e Salome, o Naomi lea sa la aooga faatasi, lea sa fai ma ana mea ula a’o la talavou.  

E maua atu la e Taki ia Naomi, o lo o nofonofo ma tau toe faato’ato’a ona mafaufauga mai i le la feiloaiga ma Salome, e ui ina e le o manatua o ia e Salome.

Ae na avea le su’esu’e e Taki o le mafuaaga o le foliga faanoanoa o Naomi, ma mea na ave sese ai e Naomi uiga o fesili a si fomai, ma tu sasa’e ai lava i luga ma savali ese atu.

Ua ataata le alii fomai o Taki ina ua savali ese Naomi ma le faalii ona ua sili atu ia Taki le ita o Naomi nai lo le faanoanoa.

Ua agai atu nei le alii fomai e fa’aauau foi lana galuega, ae na alu lena aso ua le mafai ona ave’esea lona mafaufau mai i foliga faanoanoa o le tamaitai o Naomi ma ua atili ai ona naunau e fia iloa pe aisea na faanoanoa ai le tamaitai tausimai.

Ua o’o i le taimi o malologa i le aoauli.  O le taimi foi lea na fai atu ai Naomi ia Taki, o le a faatali mai ai ona matua e alu atu le alii fomai latou te talanoa, ona o lea e mana’o Taki e nofo i le potu totogi i le fale a le aiga o Naomi.

Ua alu atu nei Taki ma sauni e alu i le fale o le aiga o Naomi, ma na toeititi lava a o’o le alii fomai i le faitotoa, ae toe liliu mai lava ma savali atu e su’e mai Naomi.  Na fa’ate’ia Naomi o la e fai ana galuega, ae mau le tagata i lona lima ma toso mai o ia i fafo.

E FAIA PEA...