Faataoto le fuafuaga mo le Aso o Tu ma Aganu’u Samoa 2024, i Hawaii

Honolulu - HAWAII

I se fono tele sa faataunuuina i Honolulu, Hawaii i le aso 2 o Novema, 2023, ua fa’alauiloa mai ai nei e le ofisa a le malo o Amerika Samoa i Honolulu, le tapenapenaina o se Aso o Tu ma Aganuu a Samoa, e faataunuuina lea i le paka a le Ke’ehi Lagoon ia Iuni 2024.

O le susuga i le faatonusili ia Tuiafono Vaiuli Sua Jr., sa faatautaia lenei fonotaga sa faia i le maota o le galuega a Kanana Fou, i Kunia ma o le susuga ia Dr. Afu Lefaoseu sa fa’ata’atiaina le ata o le polokalama.

O le aso 15 o Iuni, 2024, ua faamoemoe e tatalaina aloaia ai lenei fuafuaga, i se solo tele.  O le a aofia ai ma Taaloga, o se po faa Evagelia, ae o le sauniga lotu o lenei faamoemoe, o le a faataunuuina i le aso 16 o Iuni.  Ona soso’o ai lea ma fa’aaliga o tu ma aganuu, pese ma siva, ia Iuni 17, 2024.

 O le aso 18 o Iuni, o le a faia ai se fa’aaliga o tu ma aganuu, siva ma pese mai atunu’u i fafo, ma tapunia ai loa le polokalama i lena afiafi.

O le liki kirikiti ua fuafua e amataina ia Aperila seia o’o atu lava ia Iuni, 2024, faatasi ma ta’aloga ua fuafuaina mo aso Toonai uma o ia masina.

Na fa’aalia e le susuga ia Tuiafono lona agaga faafetai i tagata Samoa i Hawaii o lo o fa’aauau pea ona fa’aalia lo latou lagolagosua i le kovana o Hawaii, le susuga ia Dr. Josh Green faapea ma tagata o Hawaii, e ala i foai mo Maui.  E 44 pailate o mea taumafa ma sapalai eseese sa mafai ona tuufatasia, faatasi ai ma se tinoitupe e $35,250 na mafai ona aoina, ma faaooina atu i le nofoaga o lo o teuina ai fesoasoani mo tagata na a’afia i le mu tele i Maui.

O le tamaitai ia Adrienne Camacho, sa avea ma lauga faapitoa o lea fono ma sa ia faasoaina mai nisi o avanoa faigaluega ma aoaoga o lo o mafai ona agavaa ai tagata Samoa ma o nei avanoa, o le a mafai foi ona aofia ai ma Amerika Samoa.

O nisi o i latou sa mafai ona auai i lenei fonotaga, na aofia ai nisi o faafeagaiga, o vetereni ma sui o faalapotopotoga eseese.