POU TIUTE A LEOLEO

Pago Pago - AMERIKA SAMOA

$20,000 E TATALA AI I TUA SE TAMALOA UA MOLIA I LE FASI TOALUA

Ua molia nei ia le susuga ia Lima Talosia i le faaoolima ma e $20,000 le tinoitupe ua faatulaga e le faamasinoga e mafai ai ona tatala i tua.

O le 1 i le aoauli o le aso 20 o Oketopa, 2023, na agai atu ai leoleo i le fale faigaluega o se tina, ina ua alu atu le tina e faigaluega ma ni manu’a i ona foliga ma pito i luga o lona tino.  Sa ta’uina e lenei tina i leoleo, o nei manu’a na maua ina ua fasi o ia e lona to’alua.

Na faamatala e le tina e faapea, o le taimi muamua na fasi ai o ia, o le aso 12 o Oketopa, i lo latou aiga i Fagasa ina ua suesueina o ia e lona to’alua po o fai sana uo tama.  E ui ina tete’e lenei tina i tuuaiga a lona toalua, ae peitai, tago atu lona toalua ma sasae lona ofu ma faanofo o ia i luga o le nofoa.

Sa ta’ua foi e le tina le a’apa o lona to’alua i le u’u mai se samala ma faamata’u ai o ia ina ia ta’u atu le igoa o le tagata o lo o la fa’auo.  Ina ua tago atu le tina ma se’i ese le samala, ae a’apa lona toalua ua u’u mai se naifi ma fa’aauau ona faamata’u o ia, pe a le ta’u atu le igoa o le tagata o lo o la fa’auo.

Ina ua mafai ona ave’ese e le fafine ia le naifi, sa faapea loa ona fasi o ia e le tamaloa i ona foliga, ma tu i lona ua.  Ina ua mafai ona sola’ese lenei tina, sa faapea ona lauina o ia e lona to’alua, o se ‘paumutu’.

Sa faamatalaina e lenei tina i leoleo, e le o se faatasi pe faalua lea ona fasi faapea o ia e lona toalua, ae sa fefe e valaau leoleo.  Na aveina atu loa e leoleo ia lenei tina i le maota gasegase i Faga’alu mo le siakiina o ona manu’a, ae o latou agai atu loa i le fale faigaluega a Talosia i Futiga, ma loka mai ai o ia.

LOKA NI TAGATA SE TOALUA ILE GAOI

O le aso 22 o Oketopa, 2023 na amatalia ai suesuega a leoleo e faasaga ia Kelly Mulipola ma Salaevalu Pula, lea sa tu’uaia i lo la fa’aaogaina o se ‘credit card’ a se tagata e fai ai se la faatauga e $600 le tau.  Na maua ai foi e leoleo ia Mulipola ma Pula ia se $400 mai i totonu o le ato a si mafine lea e ana le ‘credit card’.

O le taeao lea o Oketopa 22, 2023, na faafesootai ai e si mafine e ana le ato tupe ia le ofisa a leoleo i Tafuna, e ripotia ai le gaoia o lana ato faapea ai ma le nofoaga o lo o iai ia Mulipola ma Pula, lea ua molia nei i le gaoi.

Sa faamatala e si mafine e ana le ato tupe, na gaoia mail ana atom ai i le ‘hall’ a le malumalu a Ierusalema Fou i Petesa i le aso 20 o Oketopa.  Ma sa manatu o ia, o la e galo i totonu o se tasi o ana koneteina o lo o iai ana oloa lea sa tapenaina ai fuafuaga mo le Mosooi.

Ae peitai, o le aso na soso’o ai, na faafesootai atu ai o ia e lana faletupe ona o le fa’aaogaina o lana ‘credit card’ i le faleoloa a Jimmy’s Mart i Petesa.  O lea na agai atu ai loa le tina lenei e saili po o ai sa fa’aaogaina lana ‘credit card’ e ala i ata vitio a le faleoloa.

O iina na molimauina ai Mulipola ma Pula o la fa’aaogaina le ‘credit card’ i le taimi e pei ona sa ripotia mai e le faletupe a lenei tina.

Na tago loa lenei tina ua fa’asalalau ata o le toalua lenei ua molia, i luga o upega tafailagi, ma se faamoemoe o le a iai nisi e masani ia Mulipola ma Pula.  E le i umi ae maua e lenei tina le fale tu’ufua i Petesa o lo o nonofo ai i la’ua lenei ua molia.

Na agai atu loa le tina lenei i le nofoaga sa faasino ifo o lo o iai le to’alua lea ua masalomia na gaoia lana ato, ma ina ua mafai ona faamaonia, o la’ua ia sa i luga o le ata vitio, sa valaau loa e lenei tina ia leoleo.

Ina ua suesueina e leoleo ia Mulipola ma Pula, sa faamatala e Mulipola, o le afiafi o le Aso Faraile, na alu atu ai se alii e igoa ia Toni, e le masani ai, ma tu’u atu ia te ia le ‘credit card’ ma se uati telefoni ma fai atu e mafai ona o la’ua fa’aaogaina.

O le aso na soso’o ai, na agai atu ai loa Mulipola ma Pula i le faleoloa ma fai ai le la faatauga, e le gata o meaai, ae faapea foi se ogaumu, o ‘speakers’ ma ‘earphones’.  Na faamaonia foi e Mulipola le iai o seisi faatauga a Pula sa fai.

Na fa’ailoa atu e Mulipola i leoleo, na ona silafia e le o se ‘credit card’ lea a la’ua ae na la fa’aaogaina pea, seia o’o ina alu atu le tagata lea e ana le ‘credit card’ i le fale na la nonofo ai.

Sa tutusa le molimau a Mulipola ma le molimau a Pula na fai i leoleo.  Sa faamaonia e Pula sa le gata i le faleoloa a le Jimmy’s Mart, ae sa faapea foi ona ia alu atu ma fai isi ana faatauga i le Happy Mart ma le TSM.

Sa mafai ona toe maua mai e leoleo ia le ‘credit card’ a si tina  o lo o a’afia i lenei faalavelave, faatasi ai ma lana uati telefoni, ae lokaina Mulipola ma Pula.

E ta’i $1,000 le tinoitupe faatulagaina e mafai ona tatalaina ai Mulipola ma Pula mai i le falepuipui.

MOLIA SE ALII 32 TAUSAGA INA UA MA’ITAGA AI LONA LAVA ‘NIECE’

Ua tu’uaia nei e le malo ia se alii e 32 tausaga i lona faiaiga ma se teineititi o lona lava aiga (o se tamaitai e tau toto iai lenei alii) ma ua ma’itaga ai lenei teineititi, i le la faigauo i le va o Aperila ma Iulai o lenei tausaga.

O lo o ta’ua i faamaumauga a le faamasinoga le aveina e le tina o lenei teineititi i le falemai, ina ua le ‘ai le teineititi ma fa’asuati.  Sa faatolu ona faia suesuega a le falemai ina ua le talitonu le tina o le teineititi i le faaiuga a le suega muamua, ua maitaga si ona alo.

Sa ta’u atu e le teineititi i lona tina, sa faamalosia o ia e lona ‘uncle’.

Ina ua fesiligia e le tina o le teineititi ia le ‘uncle’, e na te le i tete’e i tuuaiga, ae na ia faailoa mai i le tina o le teineititi, e mafai ona ia totogia la pasese ma le teineititi e la te malaga ai i atunu’u i fafo, e fa’apa’u ai le pepe.