Molia ni alii e toalua i le fa’aoolima i se isi alii, i le taimi inu-ga pia

Pago Pago - AMERIKA SAMOA

O le aso 7 o Oketopa, na faia ai se suesuega a le Matagaluega o le Saogalemu Lautele i ni tagata se toalua na tuuaia i latou na faaoolima i se alii e ala i le sasaina o le na aafia i se maa, ma tuua ai le na aafia i ni maosiosi i le itu taumatau o lona laugutu ma lona isu na pi’o.

Na tali atu ali’i Leoleo i le valaau, ma latou matauina ai le ulua’i masalomia o Alo Va’ali’i, o lo o tu i fafo o le nofoaga o lo o nofo ai o ia. Na taofia loa Va’ali’i ma tuu i totonu o le ta’avale a leoleo, a o latou taamilo i le nofoaga e su’e ai Siamupigi Sila, le ua molia lona lua lea na sola ese mai le nofoaga ae le’i taunuu atu leoleo.

Ona momoli lea e Leoleo alii na a’afia ma Va’ali’i i le Ofisa o Leoleo i Tafuna (TPS), ma le faia o sailiiiga. Ona filifili loa lea o Va’ali’i e galulue fa’atasi ma tu’uina atu se fa’amatalaga tautala e uiga i lea tulaga.

Na taua e le ua molia, sa la inupia ma le na a’afia ma Sila i le latou fale. Ina ua mavae sina taimi, na amata loa ona fautua le alii na a’afia ia Va’ali’i ma Sila, ina ia mafai ona momoe se tasi o i laua i totonu o lona potu. Na taua e Va’ali’i e fa’apea, sa ia fai atu i le ali’i na a’afia e taofi le aga’i atu i luma o ia tala faapea, ae sa fa’aauau pea ona uiga ese le na a’afia ia i latou. Na taua e Va’ali’i e fa’apea, o le taimi lea na ia tosoina ai le lauulu o le ali’i na a’afia ma tu’i lona gutu i lona moto.

Na tuuina atu foi e le na aafia se faamatalaga tautala i leoleo. Na taua e le na a’afia e fa’apea, sa la inupia ma le ua molia uma e to’alua ma sa la fiafia, ae faafuasei loa ona kiki o ia e Sila ma fai atu e alu. Sa ia toe tali atu i le ta’u atu i i latou uma ua molia e le o alu, ona o ia lea na faatau meainu.

I le ripoti mai le ali’i na a’afia o lo o taua ai e fa’apea, na toso e Va’ali’i lona lauulu ma tu’i lona gutu. O le taimi lena na ia tu ai i luga ma tamoe i luga o le auala mo se fesoasoani. Na taua atili e le na a’afia e fa’apea, ina ua toe fo’i mai i le mea sa latou inupia ai, na osofa’i atu ai loa o ia e Sila ma tu’i ona foliga i se ma’a.

Ona maua lea e Leoleo o Sila i le isi itu o le auala mai le mea na tupu ai le fa’alavelave, ma momoli atu ai loa i le TPS, lea na latou fa’amamaluina ai o ia. Sa tuuina atu foi e le itu tete’e lona lua se faamatalaga tuugutu.

Na taua e Sila e fa’apea, sa latou inupia mo ni nai minute ae ia vaaia ai le na a’afia o tago atu ma le le talafeagai ia Va’ali’i. Na taua e Sila e fa’apea, o le taimi lea na tu’i ai e Va’ali’i foliga o le ali’i na a’afia. Na taua fo’i e Sila e fa’apea, ina ua toe fo’i mai le na a’afia ina ua sola, sa ia [Sila] fo’i ona tu’i foliga o le ali’i na a’afia i lona moto. E le gata i lea, na fa’ailoa fo’i e Sila i Leoleo e fa’apea, sa ia fa’ao’olima i le tama’ita’i na a’afia, ona o lona le fiafia i ana aga’i i luma.

O lo o molia uma nei alii i le faaoolima i le tulaga tolu.E $500 le tupe ua fa’atulaga e le fa’amasinoga e totogi.