O OE O LO’U TAMA?

VAEGA 16

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 16.

*********************************

E le i oso lelei i lalo Naomi mai i le pasi lea e usu atu ai, ae mau le tagata i lona lima.

Na matua’i fa’ate’ia lava Naomi ina ua tepa a’e i luga, o le alii fomai o Taki lea o lo o u’uina lona lima.  Ua taumafai Naomi e lulu ese le lima a Taki, ae ua mau lava lana u’u i le lima a le teine o Naomi.

“O le a se tali mai i ou matua?” o le fesili lea a Taki.

“Ae a pe a se’i lava mai lau onosai, o lea fa’ato’a tu le pasi,” o le tali atu lea a Naomi ma taumafai lava e sei mai lona lima, ae ua atili ai le mau o le u’u a Taki.

“Vaai ua manaomia lava ona ou alu ese ma le faletalimalo lea ou te nofo ai nei.  E ui lava o a’u o se fomai i le falemai, ae e le gafatia e a’u ona totogi le faletalimalo mo sina taimi umi,” o le pepelo atu lea a Taki ia Naomi.

Manatua foi, o le falemai lea o lo o totogia le fale lea e faamautu ai le alii fomai o Taki.

“O la ua malilie mai o’u matua e tou te talanoa i le aoauli nei.  Ae e manaomia ona e alu atu ma se faamaoniga o tala’aga o lou olaga faapea lau tusi mai i le pule o le falemai,” o le tala lea a Naomi.

Ua faamaamulu loa e Taki le lima a Naomi ma la savavali faatasi atu i totonu o le falemai.

“E mafai ona ou fesili atu, pe aisea na e alu ai e faamavae mai i lau galuega, ananafi?” o le fesili atu lea a Taki ia Naomi.

Na ataata le teine o Naomi ma ia faapea atu ia Taki, “Aua e te popole ai.  E le o se mea e tatau ona e iloa.”

E tali atu lava Naomi ma savali ese atu, e amata ana galuega.  Ae ua na o le tu o Taki ma tilotilo atu i le savale ese atu a Naomi.

E liliu loa Naomi i se tasi o pioga o le auala e agai atu ai i le mea o faapotopoto ai Tausimai, ae o la fetaui tutu lava ma se tagata. 

Na toeititi matapogia ia Naomi ina ua ea a’e i luga, ae tau lava pupula ia Salome.

Ua ata atu Salome ia Naomi ma ia faapea atu, “E faamalie atu.” 

Ua na o le tu o Naomi ma faataupupula atu ia Salome, e pei ua vaai i se aitu.

E FAIA PEA.....