TALA I VAIFANUA

Pago Pago - AMERIKA SAMOA

TAUNU’U MAI I LAUFANUA IA FOMAI MO FANAU ITI

O le aso Tofi o le vaiaso ua mavae sa faapea ona fa’afeiloaia aloaia ai e le pulega a le LBJ ia fomai mai i le falemai a tamaiti i Hawaii, le Shriners lea e masani ona asiasi mai e faalua i le tausaga e asi tagata o le teritori o lo o mafatia i gasegase o ponaivi ma maso.

Na saunoa le Faatonusili o le LBJ, le susuga i le alii fomai ia Dr. Akapusi Ledua, ua silia ma le 30 tausaga talu ona galulue so’o tau’au ia le LBJ ma le Shriners aua le tautuaina o le atunu’u o Amerika Samoa.  E le gata i gasegase masani, ae faapea foi nisi o tagata mama’i fou.

O susuga i fomai ia Craig Ono, Richard Haynes ma Hanna Imlay, o lo o aofia ai i totonu o lenei aumalaga mai i Hawaii.

O lo o u’unaia foi e Dr. Ledua ia matua o iai ni alo ma fanau o lo’o a’afia i gasegase o le ponaivi ma maso ina ia valaau atu i le 633-1222 fesootaiga 310, ina ia faatulaga se taimi e mafai ona siaki ai alo ma fanau.

FA’AALIGA TATAU MA MALU LONA 18 I LE FALE MATA’AGA A TISA

O le aso a taeao, Oketopa 24, se’ia o’o atu i le aso Toonai o le vaiaso nei, o le a faataunuuina ai le Fa’aaliga Tatau ma Malu e pei ona masani ai, i le afioaga o Alega, i le Tisa’s Barefoot Bar.  O le lona 18 ai nei o tausaga o fa’afoeina e le tamaitai ia Tisa Fa’amuli ia lenei fa’aaliga taua.

Ina ua fesiligia Faamuli pe o le a faataga so’o se tasi e ta sona tatau po o sona malu, ia po o ai e mafai ona taina sana tatau po o sona malu, sa tali Faamuli, o le tufuga e na te faia le faaiuga.  Ae o lona tiute o le fa’alauiloa atu lea o lenei tu ma lenei aganu’u matagofie a Samoa.

O le 1993 sa fa’ataunuuina ai le uluai fa’aaliga ta tatau ma malu, ae peitai, na fa’ato’a amata ona amanaiaina e tagata i le 2005, lea ua o’o mai lava i nei vaitaimi, ua toatele nisi o le atunu’u e auai atu ona o le fia ta ina o a latou tatau po o malu foi mo tamaitai.

O lenei tausaga ua auai mai le afioga i le tufuga ia Suluape Junior ma lana aumalaga mai i Samoa e latou te fa’afoeina lenei fa’aaliga.

O lo o mafai ona fesoasoani mai le malo e ala i se fesoasoani tau tupe e $5,000 i le $10,000 mo lenei faamoemoega, ae o le fesoasoani tele lava e sau mai i pisinisi eseese i totonu o le teritori.  

SAUNI ATU LE KOMITI O TA’ALOGA A AMERIKA SAMOA MO TA’ALOGA O LE PASEFIKA I LE ATU SOLOMONA

O lo o ua galulue fita ia le Komiti o Ta’aloga a Amerika Samoa (ASNOC) e faamautu le lisi o au ta’alo ma faiaoga faapea ma faauluuluga o le ASNOC, e to’a 189, ua fuafua e faimalaga atu i le atu Solomona i le masina fou, mo Taaloga o le Pasefika lona 17.

E 12 asosi taaloga a le teritori, o le a auina atu ni a latou sui mo Taaloga o le Pasefika.  O nei asosi e aofia ai le Pasiketipolo, Volipolo (alii ma tamaitai), Si’isi’i u’amea mamafa, o fa’aaliga tino masoa, kalapu fusu, golf, volipolo i totonu (alii ma tamaitai), Lakapi ta’ito’afitu (alii ma tamaitai), Soka, Miliga a’au ma miliga tamo’e.

Ua fa’alauiloa mai e le Failautusi a le ASNOC, le susuga Ethan Lake, o lo o faamoemoe sui ta’alo a Amerika Samoa e faimalaga atu mo le atu Solomona ia Novema 14.  E to’a 144 totino o le ASNOC o le a faimalaga i lea aso i se malaga tu’usa’o mai Amerika Samoa mo Solomona.  Ae o leisi to’a 45 o le a ese vaalele ma faigamalaga ole a o atu ai.

O le taitai malaga, o le susuga Trevor Kaitu’u o se tagata Solomona ua loa ona aumau i totonu o Amerika Samoa ma o lo o galue nei i le Ofisa a le DMWR.  Ae lagolago iai ia Toafa Tuimaloa Lani Tilo.

O le aso 19 o Novema lea o le a tatalaina aloaia ai Taaloga o le Pasefika lona 17, ae o taamilosaga o soka ma volipolo e amata ia Novema 17.

O le aso 2 o Tesema lea e faamoemoe e tapunia aloaia ai nei ta’aloga ona toe taliu mai lea o le aumalaga a Amerika Samoa i le aso 5 o Tesema.