TALA I VAIFANUA

Pago Pago - AMERIKA SAMOA

AMATA NEI POLOKAMA PEMITA FOU MO TAGATA SAMOA

O le aso, Oketopa 19, 2023, lea o le a amataina ai le polokalama fou mo pemita mot agata mai Samoa (PW7) lea e mafai ai ona ulufale mai se tagata mai Samoa e aunoa ma le faia o se pemita, ae e na o le 7 aso e mafai ona iai i totonu o Amerika Samoa.  

O lenei fa’aaliga sa faasalalauina i luga o le upega tafailagi a le Ofisa o Femalagaiga ma le Ofisa o le Loia Sili i le aso Lua.

E pei ona ripotia e le Samoa News i se taimi ua mavae, na fa’alauiloaina mai e le ofisa a le Loia Sili i le amataga o Setema o le tausaga nei, se tulafono taufa’aofi, mo se polokalama e amatalia i le masina nei, lea e mafai ai e sitiseni mai le malo tutoatasi a Samoa, ona faimalaga mai i Amerika Samoa, mo le 7 aso, e aunoa ma se pemita, ma se faamoemoe o le a mafai foi ona faimalaga atu Nesionale a Amerika Samoa i Samoa, e aunoa ma le toe totogia o ni pemita.

O lo o aofia foi i totonu o le tulafono mo lenei polokalama, le faatagaina o se sitiseni Samoa e leai se tusi folau, ona malaga mai i Amerika Samoa, e ala i le fa’aaogaina o seisi ID faatulafonoina.

I lenei polokalama fou, o le a mafai ona faatagaina ai na o le to’a 400 i le masina, ona faimalaga mai i Amerika Samoa.

O faamaumauga e manaomia mo le agava’a i lenei polokalama fou (PW7), e aofia ai se Tusi Folau po o so’o se ID, o se pepa malaga (ticket) o le malaga mai i Amerika Samoa ma le toe fo’i, o se faamaoniga o le nofoaga o le a faamautu ai (faletalimalo po o le fale o se aiga); Totogi le $10USD. 

Mo so’o se tasi o fia auai i lenei polokalama fou, e tatau ona apalai mai i le 3 aso ae le’i o’o i le aso e faimalaga mai ai.

E pei ona faamamafaina mai e le Ofisa a le Loia Sili ma le Ofisa o Femalagaiga, e le agava’a i latou o lo o faamoemoe e faimalaga mai i Amerika Samoa mo va’a fagota po o isi va’a faigaluega.

E lua ni fesili ma tali sa aofia i totonu o le fa’aaliga mai i ofisa a le malo o Amerika Samoa e tusa ai ma lenei polokalama fou:

1. O le a le mea e tupu pe a pasia le talosaga mo le PW7: TALI:  O le a e maua se fa’aaliga e fa’ailoa atu ai, ua faatagaina oe ona e ulufale mai i totonu o Amerika Samoa, ma o lea fa’aaliga mai e tatau ona fa’aali i le Ofisa o Femalagaiga pe a e taunu’u mai.
2. O le a se mea e tupe pe afai ou te le i apply mo se PW7 ae ua ou faimalaga mai i Amerika Samoa? TALI:  O le a toe fa’afo’i oe i Samoa pe afai e le i maua atu se faatanaga mai i le Ofisa a le Loia Sili.

Mo nisi faamatalaga e tusa ai ma lenei polokalama fou, e mafai ona imeli mai i le [email protected].  Po o le asiasi i luga o le upega tafa’ilagi i le https://www.legalaffairs.as.gov/copy-of-entry-permit-waiver-program-1). O le a mafai foi ona maua ai ma le pepa faatumu e talosagaina ai sou avanoa i lenei polokalama.

FAATULAGA E LE KOVANA SE FONOTAGA FAALEMASINA MO RIPOTI I PAKETI MA TUPE MAUA

Ua fa’atulagaina nei e le afioga i le kovana sili ia Lemanu P. S. Mauga se tulafono fou e faamalosia ai le faia o ni fonotaga faalemasina, e faatatau i tala o le tupe a le malo.  O lenei fonotaga o le a faataunuu i aso Tofi lona lua o masina uma.  Ma o lenei fuafuaga fou ua tatalaina aloaia ai le tausaga tupe fou o le 2024, lea na amataina mai i le aso muamua o Oketopa o le tausaga nei.

O lenei fonotaga faalemasina sa aofia i totonu o se fa’aaliga aloaia a le kovana mo faatonusili o le Ofisa o Tupe, Ofisa o Paketi faapea le ofisa o Uafu ma Malaevaalele, a le malo.

Ua ta’ua foi i totonu o lenei fa’aaliga ia ni ripoti ma’oti i tala o le tupe, o lo o finagalo le kovana, e ao ona fa’aooina atu e le Ofisa o Tupe ma le Ofisa o Paketi i le 48 itula, ae e lei faataunu’uina nei fonotaga i masina taitasi.

Mai i le Ofisa o Tupe, o lo o finagalo le kovana ia tauaaoina atu se ripoti i tupe aoina mai i masina ua te’a; o le aofaiga o tupe aoina i le tausaga; o se tala o tupe aoina pe a faatusatusa i tausaga ua tuanai, faalemasina ma faaletausaga; faapea ma se tala o tupe aoina pe a faatusatusa i le sini faatuina mo tupe aoina o le tausaga.

Mai i le Ofisa o Paketi, ua finagalo le kovana ia ma’oti le latou ripoti i tupe fa’aalu; o aofaiga pasia mo tupe fa’aalu i le masina ua te’a; o le aofaiga pasia o tupe fa’aalu i le tausaga; o se tala o tupe fa’aalu pe a faatusatusa i le tausaga ua tuanai (faale masina ma le tausaga atoa); faapea se ripoti i tupe fa’aalu pe a faatusatusa i sini faatuina o tupe fa’aalu o le tausaga nei.

Ua talitonu Lemanu i le taua o le mataituina o tulaga o le tupe (tupe aoina ma tupe fa’aalu) i le sologa lelei o se faigamalo.  Ma o nei fonotaga, o le a mafai ona iloiloina ai ma soalaupuleina ai tulaga o le tupe i lea masina ma lea tausaga.

Na ta’ua e nisi o sui faitulafono le leai o se ripoti po o se faamalamalamaga ua o’o atu i le Maota Fono e tusa ai ma lenei fuafuaga fou a le kovana – e ui ina o se fuafuaga lelei – ae o lo o nofo pogisa le maota fono pe aisea ua faia ai lenei tulaga, ae o lo o ripotia i totonu o tala o tupe a le faigamalo, le iai o tupe totoe mai i tausaga tupe e tolu lea fa’ato’a mae’a atu nei.  

Sa fa’aalia mai foi e se tasi o sui faitulafono i le Samoa News e faapea, i sona talitonuga, sa tatau ona fa’ailoa atu e taitai o le faigamalo, aemaise le Tausitupe a le malo ma sui o le ofisa a le kovana, lenei fuafuaga fou, ina o latou fesaga’i i le iloiloina o le paketi fou a le faigamalo.