POU TIUTE A LEOLEO

Pago Pago - AMERIKA SAMOA

FAATAGA E LE FAAMASINOGA IA SE ALII NA MOLIA I FUALAAU FAASAINA ONA TU’UA LE TERITORI

O le taeao o le aso Faraile, Oketopa 13, 2023, na tulai ai le alii o Iosefa Su’a i luma o le faamasinoga maualuga ma tali ioe i lona moliaga o lona umia o se vaega o fualaau faasaina, o mariuana, i lalo o se maliliega ma le malo.

O Su’a na molia i le masina o Fepuari o le tausaga nei, i lona umia o ni vaega o fualaau faasaina ma se faamoemoega e faatau atu i isi.

Ae ua tu’uina atu nei e le faamasinoga maualuga ia le avanoa e toe fo’i atu ai lenei alii mo Honolulu, ae fa’ato’a lau lona faasalaga i le tolu tausaga o i luma.

Na talia e le faamasinoga ia se maliliega ma Su’a ma tu’uina atu ai le lauina o lona faasalaga i le tausaga e 2026, ae ua faatonuina le ua molia ina ia avea ma tagata tausi tulafono ma ia feso’otai ma lana loia, le susuga Talalelei Uiagalelei, i taimi uma.

O Su’a e malaga mai i Hawaii ma ua fa’atagaina nei o ia e toe fo’i atu i Hawaii.  Ae ua fautuaina o ia ina ia auai atu i ni vasega e fesoasoani ia te ia, ina ia alo’ese mai i le tagofia o fualaau faasaina ma ia faaooina mai i lana loia, ni faamaoniga o lona auai ma faamae’aina o nei vasega.

O le masina o Aperila i le tausaga fou ua fuafua e toe faia ai seisi iloiloga o le tulaga o le tausia e le ua molia ia aiaiga e pei ona fa’ata’atia e le faamasinoga.

O le susuga i alii faamasino ia Elvia Patea, Suapaia Pereira ma Paepae Iosefa Faiai, na o latou mataituina lenei mataupu.

MOLIA SE TAMAITAI I LONA GAOIA O SE TELEFONI FEAVEA’I

O le aso 5 o Oketopa, 2023 i le 10:39 i le taeao, na vala’au ai le pule o le faleoloa, ona o se fafine ua masalomia i le gaoia o se telefoni feaveai lea sa i totonu o se tasi o pusa tioata a le faleoloa.

Na agai atu sui malu o le malo i Nu’uuli ma talatalanoa ma le pule o lea pisinisi ma sa faailoa iai e le pule o le faleoloa, ua alu ese le mafine lea o lo o masalomia na gaoia le telefoni.  Sa mafai ona matamata ia leoleo i ata vitio o le faleoloa.

O lea na maua e leoleo ia le numera telefoni a le mafine na masalomia i le gaoia o le telefoni, le tamaitai o Telesia Toniga, ma sa faafeso’otaia o ia e leoleo ma faatonuina e agai atu i le ofisa a leoleo i Tafuna, ae tali mai le tamaitai, o ia lea ua taunu’u i le latou fale.

E tusa ai ma se ripoti mai i le pule o le faleoloa, na alu atu Toniga i lana pisinisi i le masina ua tuanai, mo se fesoasoani i le lipeaina o lana telefoni.  Ma sa faailoa iai e le pule e fai sina umi e toe faaleleia ai lana telefoni, ona e manaomia ona lafo i atunu’u i fafo e lipea mai ai.  Ma sa malie ai le ua molia.

Ae i le aso 5 o Oketopa, na toe alu atu ai Toniga i le pisinisi a le ua a’afia i lenei faalavelaev e siaki pe ua toe maua mai lana telefoni, ae na fai mai iai le pule o le pisinisi, e toe tu’u atu nisi aso se 10 ona e le i toe maua mail ana telefoni.

O le taimi lea na savali atu ai loa Toniga ma u’u mai se telefoni mai totonu o le faleoloa, ma alu ese atu mai le faleoloa.  E pei ona ta’ua e le pule o le faleoloa, na ave e Toniga le telefoni lea e sui ai lana telefoni lea o lo o faatali.

Sa toe taumafai leoleo e faafeso’otai le ua molia ina ia malaga atu i le ofisa a leoleo mo se faatalanoaga, ae peitai, na tete’e le tamaitai.

Ua iai nei se pepa saisai mo Toniga, e molia ai o ia i le gaoi ma e $1,000 le tinoitupe faatulaga e mafai ona tatala ai o ia i tua.